Kapitel 43

A e gi leri nanga jepi foe agersitori

SOLEKI fa a sori, dan Jesus de na Kaperna-um te a e piri-ai gi den Fariseiman. Baka ten, a e gowe libi na oso a srefi dei dati, èn a e waka go na a Se foe Galilea di de krosibei, èn pe ipi-ipi sma kon makandra. Drape a e go na ini wan boto, den e wai gowe pikinso foe sjorosei, èn a e bigin leri den sma di de na sjoro, foe a Kownoekondre foe hemel. A e doe disi nanga jepi foe wan toe eksempre, noso agersitori. Ibriwan foe den abi wan sani na ini di den sma sabi heri boen na ini na aladei libi.

Fosi, Jesus e froeteri foe wan saiman di e sai siri. Wan toe siri e fadon na sei pasi èn fowroe e njan den. Wan tra pisi foe a siri e fadon na tapoe wan gron di abi ston na ondro. Foe di den roetoe foe den jongoe pransoen no e go dipi nofo na ini a gron, den e drei foe di son e bron den. Dan wan tra pisi foe a siri e fadon na mindri den makamaka, di e kiri den prani te den e bigin gro kon. Te foe kaba, wan toe siri e fadon na tapoe boen gron èn e meki froktoe hondro tron, wan tra pisi e meki froktoe siksitenti tron, èn ete wan tra pisi dritenti tron.

Ini wan tra agersitori Jesus e teki a Kownoekondre foe Gado gersi wan sma di e sai siri. Ala di den dei e pasa, den siri e gro èn disi e go doro, ala di a sma e sribi, èn te a wiki. A sma no sabi fa a gro disi e feni presi. A siri e gro foe ensrefi èn a e meki tarwe. Te a tarwe lepi, a sma e go koti en.

Jesus e froeteri wan di foe dri agersitori foe wan man di e sai a joisti sortoe siri, ma „ala di sma ben e sribi”, wan feanti e kon èn e sai takroe wiwiri na mindri foe a tarwe. Den foetoeboi foe a man e aksi en efoe den moesoe hari a takroe wiwiri poeroe. Ma a e piki: ’Nôno, bika oenoe sa hari pikinso foe a tarwe poeroe toe. Meki ala toe gro makandra te leki koti-ten doro. Dan mi sa taigi den kotiman taki den moesoe tjari a takroe wiwiri kon makandra èn bron den èn den moesoe poti a tarwe na ini a maksin.’

Jesus e go doro foe taki nanga den ipi sma di de na a sjoro, èn a e gi den ete toe agersitori. A e tjari kon na krin taki „a kownoekondre foe hemel” de leki wan mosterdsiri di wan sma e prani. Ala di a de a moro pikinwan foe ala den siri, na so Jesus e taki, tokoe a e gro kon tron a moro bigi bon foe ala den bon foe wan djari. A e tron wan bon pe fowroe e feni wan presi foe go tan na tapoe den taki foe en.

Na ini a ten disi joe abi son sma, di e taki dati moro pikin siri de leki mosterdsiri. Ma Jesus no e leri sma sani di abi foe doe nanga den prani èn nanga den bon. Foe ala siri di den Galileasma na ini Jesus ten sabi, a mosterdsiri de troetroe a moro pikinwan. So boen, den e froestan heri boen taki Jesus e froeteri ini na agersitori foe en foe wan boen bigi gro.

Te foe kaba, Jesus e teki a „kownoekondre foe hemel” gersi sroedeki, di wan oema e teki èn e moksi nanga dri bigi marki blon. Baka wan pisi ten, na so Jesus e taki, dan a heri blon e kon swa.

Baka di Jesus gi den feifi agersitori disi, a e gi den ipi sma primisi foe gowe èn a e drai go na a oso baka pe a e tan. Heri esi den twarfoe apostel nanga trawan e kon drape na en.

Abi winimarki foe den agersitori foe Jesus

Te den disipel e kon na Jesus, baka di a ben taki nanga den ipi sma tapoe a se-sjoro, den angri foe sabi moro foe a njoen fasi fa Jesus e gi sma leri. Ija, a de so, taki den jere en e gebroiki agersitori kaba, ma noiti ete na so wan bradi fasi. Dati meki den e aksi en: „Foe san ede joe e taki nanga den nanga jepi foe agersitori?”

Wán reide foe dati de, taki a wani meki den wortoe foe a profeiti kon troe: „Mi sa opo mi mofo nanga agersitori, mi sa taki sani di ben de kibritori sensi di a fondamenti poti.” Ma dati a no ala sani ete. A e gebroiki agersitori foe meki a fasi fa na ati foe sma tan, kon na krin.

Te joe loekoe en boen, dan moro foeroe foe den sma abi belangstelling gi Jesus soso foe di a de wan kefalek boen froeteriman èn foe di a de wan sma di e doe wondroe, ma no foe di a de wan sma di den moesoe dini leki Masra èn di den moesoe waka na en baka sondro foe prakseri densrefi nomo. Den no wani foe sma pori a fasi fa den e si sani noso a fasi fa den e libi. Den no wani, taki a boskopoe saka go so dipi na ini den ati.

Jesus e taki foe dati ede: „Dati meki mi e taki nanga den nanga jepi foe agersitori, so taki, ala di den e loekoe, den e loekoe foe soso, èn ala di den e jere, den e jere foe soso, èn den no e froestan toe san a wani taki; èn ini a tori foe den, a profeititori foe Jesaja e kon troe di e taki: ’ . . . Bika na ati foe a pipel disi no e teki sani.’”

„Ma kolokoe foe oen ai”, Jesus e go moro fara, „foe di den e si, èn oen jesi foe di den e jere. Bika foe troe mi e taigi oenoe: Foeroe profeiti nanga regtfardiki sma ben angri foe si den sani di oenoe e si èn tokoe den no ben si den, èn foe jere den sani di oenoe e jere èn tokoe den no ben jere den.”

Ija, den twarfoe apostel nanga den sma di de na den, abi ati di e teki leri. Foe dati ede Jesus e taki: „Oenoe e kisi a grani foe froestan den santa kibritori foe a kownoekondre foe hemel, ma den sma dati no e kisi a grani disi.” Foe di den disipel foe en angri foe froestan sani, meki Jesus e tjari na agersitori foe a saiman kon na krin gi den.

„A siri na a wortoe foe Gado”, Jesus e taki, èn a gron na a ati. Foe a siri di sai na tapoe a tranga gron na sei pasi, a e tjari kon na krin: „Didibri e kon èn e teki a wortoe poeroe foe na ati foe den, so taki den no kan bribi èn kisi froeloesoe.”

Na a tra sei, siri di sai na tapoe gron pe ston de na ondro, e sori tapoe na ati foe sma di e teki a wortoe nanga prisiri. Ma foe di a wortoe no man soetoe en roetoe pasa go dipi na ini den sortoe ati disi, meki den sma disi e fadon gowe te wan ten foe tesi noso froefolgoe e kon.

A siri di ben fadon na mindri den makamaka, na so Jesus e go moro fara, abi foe doe nanga sma di jere a wortoe. Ma den broko den ede someni nanga goedoe èn nanga den prisiri foe a libi disi, so taki den e dede èn den no e tjari noti kon na wan boen kaba.

Te foe kaba, siri di sai na tapoe toemoesi boen gron, na so Jesus e taki, na den sma di, baka di den jere a wortoe nanga wan boen ati, e hori en èn e meki froktoe foe di den e horidoro.

Fa den disipel disi na blesi sma foe di den go soekoe Jesus foe a tjari den leri foe en kon na krin gi den! A de a prakseri foe Jesus taki sma froestan den agersitori foe en, so taki waarheid kan froeteri na tra sma. „Sma no e teki wan lampoe foe poti en na ondro wan baskita noso foe poti en na ondro wan bedi, a no so?”, a e aksi. Nôno, „den e teki en foe poti en na tapoe wan kandratiki”. So boen, Jesus e taki moro fara: „Foe dati ede, poti prakseri na tapoe a fasi fa joe e arki.”

A e blesi den nanga moro leri

Baka di Jesus tjari na agersitori foe a saiman kon na krin gi den disipel, den wani foe leri moro. „Tjari kon na krin gi wi”, na so den e aksi, „na agersitori foe a takroe wiwiri na tapoe a gron.”

Ija, a fasi foe den disipel de heri tra fasi leki a tra pisi foe na ipi sma na tapoe a se-sjoro! Den sma dati no abi wan opregti angri foe leri san den agersitori wani taki troetroe, foe di den de tevrede kaba foe jere den agersitori nomo. Jesus e teki den disipel foe en di angri foe sabi moro èn di kon na en na ini na oso, gersi den arkiman dati na a sjoro foe a se, te a e taki:

„Nanga a marki di oenoe e marki sani, nanga dati den sa marki oenoe, ija, oenoe sa kisi moro ete.” Den disipel abi opregti belangstelling gi san Jesus e taki èn den e poti prakseri na tapoe dati èn den wani sabi moro foe a tori. Dati meki den blesi foe kisi moro leri. So boen, leki wan piki tapoe na aksi foe den disipel foe en, Jesus e tjari kon na krin:

„A saiman foe a toemoesi boen siri na a Manpikin foe libisma; a gron na grontapoe; a toemoesi boen siri, dati na den manpikin foe a kownoekondre; ma a takroe wiwiri na den manpikin foe na ogriwan èn a feanti di ben sai den, na Didibri. A kotiwroko na wan bosroiti foe wan seti foe sani, èn den kotiman na den engel.”

Baka di Jesus sori san ibri pisi foe na agersitori foe en wani taki, a e froeteri foe a bakapisi di e kon te foe kaba. Na a bosroiti foe a seti foe sani, na so a e taki, den kotiman, noso den engel, sa prati den falsi kresten di joe kan teki gersi takroe wiwiri, foe den troe „manpikin foe a kownoekondre”. Dan „den manpikin foe na ogriwan” sa de den sma di sa kisi pori, ma den manpikin foe a Kownoekondre foe Gado, „den regtfardiki sma”, sa skèin krin na ini a Kownoekondre foe a Tata foe den.

Dan Jesus e blesi den disipel foe en, di angri foe leri moro, nanga ete dri agersitori. Fosi, a e taki: „A kownoekondre foe hemel de leki wan goedoe di kibri na ini a gron, di wan sma ben feni èn ben kibri; èn ini a prisiri foe en, a e go èn a e seri ala san a abi èn a e bai a gron dati.”

„Agen”, na so Jesus e go moro fara, „a kownoekondre foe hemel de leki wan bisnisman di e waka doe bisnis èn di e soekoe peri di moi srefisrefi. Di a feni wán peri foe bigi waarde, a ben gowe èn wantewante a ben seri ala san a ben abi èn ben bai en.”

Jesus srefi de leki a man di e feni wan goedoe di kibri èn leki a bisnisman di e feni wan peri foe bigi waarde. A ben seri ala sani, foe taki en so, foe di a ben gowe libi en lespeki posisi di a ben abi na hemel foe tron wan libisma di abi sakafasi. Dan, leki wan libisma na grontapoe, a e kisi sjen nanga takroe froefolgoe, foe sori taki a warti foe tron a Tiriman foe Gado Kownoekondre.

Den bakaman foe Jesus e kisi foe doe toe nanga a tjalensi foe seri ala sani foe kisi a bigi pai. Disi wani taki dati den sa de wan kompe tiriman nanga Krestes noso wan borgoe foe a Kownoekondre na grontapoe. A de so, taki wi sa si a grani foe abi wan prati na a Kownoekondre foe Gado, leki wan sani di warti moro ala tra sani ini a libi, leki wan diri goedoe noso wan peri foe bigi waarde?

Te foe kaba, Jesus e teki „a kownoekondre foe hemel” gersi wan srepi di e tjari difrenti sortoe fisi kon makandra. Te den e teki den fisi foe prati den na den sortoe, dan den e trowe den fisi di no boen, ma den boen fisi den e hori. Na so, Jesus e taki, a sa go ini a bosroiti foe a seti foe sani; den engel sa prati den ogri sma foe den regtfardiki sma, èn den ogri sma den sa hori kibri foe kisi pori.

Jesus srefi e bigin nanga a fisiwroko disi, foe di a e kari den fosi disipel foe en foe kon tron „fisiman foe libisma”. Ala den jarihondro di pasa a fisiwroko go doro, ala di den engel hori ai na dati tapoe. Te foe kaba, a ten doro foe hari a „srepi” kon na inisei, di e prenki ala den organisâsi na grontapoe di e taki dati den na kresten, so srefi a gemeente foe salfoe kresten.

Ala di den e trowe den fisi di no boen, foe kisi pori, tokoe a e meki wi de nanga tangi taki den ’boen fisi’ e kisi kibri. Te wi e sori a srefi opregti angri leki den disipel foe Jesus, foe kisi moro sabi èn foe froestan sani, dan Gado no sa blesi wi nanga moro leri wawan, ma nanga a blesi foe têgo libi toe. Mateus 13:1-52; Markus 4:1-34; Lukas 8:4-18; Psalm 78:2; Jesaja 6:9, 10.

▪ O ten èn pe Jesus e taki nanga den ipi sma nanga jepi foe agersitori?

▪ Sortoe feifi agersitori Jesus e froeteri den ipi sma now?

▪ Foe san ede Jesus e taki dati a mosterdsiri na a moro pikinwan foe ala siri?

▪ Foe san ede Jesus e taki nanga agersitori?

▪ Fa den disipel foe Jesus e sori taki den de tra fasi leki den ipi sma?

▪ San Jesus e tjari kon na krin foe na agersitori foe a saiman?

▪ Fa den disipel foe en de tra fasi leki den ipi sma tapoe a se-sjoro?

▪ Soema noso san a saiman, a gron, a boen siri, a feanti, a kotiwroko, nanga den kotiman, e agersi?

▪ Sortoe dri tra agersitori Jesus e gi ete, èn san den e leri wi?