Kapitel 63

A e gi moro rai foe meki den kisi wan joisti denki

TE JESUS nanga den apostel foe en de ete na ini na oso na Kaperna-um, dan boiti taki den apostel ben haritaki nanga makandra ini a tori foe na aksi soema na a moro bigiwan, den e taki foe ete wan tra afersi. Kande a sani disi pasa toe di den ben drai go baka na Kaperna-um, di Jesus srefi no ben de drape. Na apostel Johanes e froeteri: „Wi ben si wan seiker sma e poeroe ogri jeje na sma tapoe, foe di a e gebroiki joe nen èn wi ben proeberi foe tapoe en foe doe dati, foe di a no ben e waka makandra nanga wi.”

A de krin, taki Johanes e si den apostel leki wan spesroetoe groepoe sma di den wawan abi a makti foe dresi sma. So boen, a e denki taki a man no ben abi a reti foe doe krakti wroko, foe di a no ben de foe a groepoe foe den.

Ma Jesus e gi a rai: „No proeberi foe tapoe en, bika no wan sma di sa doe wan krakti wroko na ini mi nen, sa kan de esi-esi foe skempi mi; bika a sma di no de teige wi, de nanga wi. Bika a sma di e gi oenoe wan beker watra foe dringi, foe di oenoe de foe a Krestes, foe troe mi e taigi oenoe, a no sa lasi en pai kwetikweti.”

A man disi no ben abi foe waka troetroe na Jesus baka, foe de na en sei. A kresten gemeente no ben opo ete, so boen, taki a man no ben de wan pisi foe a groepoe foe den, no ben wani taki dati a ben de foe wan tra gemeente. A man ben poti bribi troetroe na ini a nen foe Jesus èn foe dati ede a ben man foe poeroe ogri jeje na sma tapoe. A ben e doe wan sani di ben de pikinmoro a srefi sani, di, soleki fa Jesus ben taki, ben sa meki wan sma kisi en pai. Jesus e sori taki foe a sani disi ede, a man no sa lasi en pai.

Ma fa a ben sa de, efoe a man ben naki foetoe na den wortoe èn den doe foe den apostel? Disi ben sa de wan toemoesi serjoesoe sani! Jesus e taki: „A sma di e meki wan foe den pikinwan disi di e bribi, naki foetoe, a ben sa moro boen gi en taki den anga wan miriston na en neki, di wan boeriki e hari drai lontoe, èn den trowe en troetroe go na se.”

Jesus e taigi den bakaman foe en, taki den moesoe poeroe ala sani na ini den libi, di ben sa kan meki den go naki foetoe, awinsi a de wan sani di warti srefisrefi gi wi, leki wan anoe, wan foetoe, noso wan ai. A moro boen foe tan sondro so wan sani di warti srefisrefi gi wi, èn go na ini Gado Kownoekondre, leki foe tan hori na en èn trowe go na ini Gehèna (wan doti-ipi di e bron krosibei foe Jerusalem), di e agersi têgo pori.

Jesus e warskow toe: „Sorgoe taki oenoe no e si no wan foe den pikinwan disi leki lagi sma; bika mi e taigi oenoe taki den engel foe den na hemel, alaten e si a fesi foe mi Tata di de na hemel.” Baka dati a e gebroiki wan agersitori foe sori a wartifasi foe den „pikinwan”, te a e froeteri foe wan man di abi wan hondro skapoe, ma di e lasi wán. A man sa libi den 99 na baka foe go soekoe a wán lasi skapoe, na so Jesus e tjari kon na krin, èn efoe a feni en, dan a sa prisiri moro foe en, leki foe den 99. „Na so a de toe”, Jesus e bosroiti dan, „taki mi Tata, di de na hemel no wani, taki wán foe den pikinwan disi lasi gowe.”

Kande foe di Jesus abi na prakseri ete, a hari di den apostel foe en ben haritaki nanga makandra, meki a e gi den tranga: „Abi sowtoe na ini oensrefi, èn tan abi vrede nanga makandra.” Den e poti sowtoe na ini njanjan di no abi tesi na ini, foe meki en tesi moro switi. Na so agersi sowtoe e meki san wan sma e taki, moro makriki foe sma teki dati. Efoe wan sma abi a sowtoe disi, dan a sa jepi en foe tan abi vrede.

Ma foe di libisma onvolmaakti, meki wanwan tron serjoesoe kesekese sa kon. Jesus e sori so srefi fa foe handri, te disi e pasa. „Te joe brada e doe wan sondoe,” Jesus e taki, „dan joe nanga en wawan moesoe taki èn joe moesoe sori en tapoe en fowtoe. Efoe a e arki joe, dan joe wini joe brada.” Efoe a no e arki, na so Jesus e gi leki rai, „dan teki wán noso toe trawan nanga joe ete, so taki foe a mofo foe toe noso dri kotoigi, den kan taki foe ibri afersi taki a ben de so”.

Soso leki wan lasti sani di wan sma kan doe, na so Jesus e taki, den moesoe tjari na afersi go na fesi „a gemeente”, dati wani taki, na den frantiwortoe opziener foe a gemeente di kan meki wan kroetoe bosroiti. Efoe a sondari no wani saka ensrefi na ondro a bosroiti foe den, na so Jesus e tapoe, „dan a moesoe de gi oenoe leki wan sma foe den nâsi èn leki wan sma di e teki belastingmoni”.

Te den opziener e teki so wan bosroiti, dan den moesoe hori densrefi soifri na den sani di skrifi na ini a Wortoe foe Jehovah. So boen, efoe den feni taki wan sma abi fowtoe èn taki a moesoe kisi strafoe, dan a kroetoe ’sa tai kaba na hemel’. Èn efoe den „loesoe [wan sani] na grontapoe”, dati wani taki, dati den feni taki wan sma no abi fowtoe, dan a sa „loesoe [kaba] na hemel”. Jesus e taki dati „pe toe noso dri sma e kon makandra na ini mi nen,” na den sortoe kroetoe disi, „dan drape mi de na den mindri”. Mateus 18:6-20; Markus 9:38-50; Lukas 9:49, 50.

▪ Foe san ede a no ben de fanowdoe na ini a ten foe Jesus foe waka makandra nanga en?

▪ O serjoesoe a de foe meki wan pikinwan naki foetoe, èn fa Jesus e gebroiki wan agersitori foe sori a prensparifasi foe den sortoe pikinwan disi?

▪ San e meki Jesus gi den apostel deki-ati kande foe abi sowtoe na den mindri?

▪ San ’e tai’ èn san ’e loesoe’ wani taki?