Kapitel 27

A e kari Mateus

SJATOE baka di Jesus dresi a lanman, a e komoto na Kaperna-um foe go na a Se foe Galilea. Agen ipi-ipi sma e kon na en, èn a e bigin gi den leri. Te a e waka go moro fara, dan a e si Mateus, di nen Leifi toe, e sidon na a belasting kantoro. „Kon, tron wan bakaman foe mi”, na a kari di Jesus e gi en.

Soleki fa a sori, Mateus sabi den sani kaba di Jesus e leri, neleki fa Petrus, Andreas, Jakobus nanga Johanes ben sabi den leri disi toe, di Jesus ben kari den. Èn neleki den, Mateus e piki tapoe a kari wantewante. A e opo, e libi den frantiwortoe di a abi leki wan belastingman, èn a e waka na Jesus baka.

Baka ten, kande foe sori taki a e prisiri taki a kisi a kari, Mateus e hori wan bigi njanjan-fesa na en oso. Boiti Jesus nanga den disipel foe En, sma di fosi ben de kompe foe Mateus, de drape toe. Moro foeroe a de so, taki den kompe djoe foe den e tegoe foe den man disi, foe di den man disi e teki belastingmoni gi den tirimakti foe Rome, di den djoe no wani si na ai srefisrefi. Boiti dati, foe di foefoeroe e kiri den, meki nofo tron den e aksi moro moni leki a belastingmoni di wet taki dati den sma moesoe pai.

Te den Fariseiman e si Jesus nanga den sortoe sma disi na a fesa, dan den e aksi den disipel foe en: „Foe san ede a leriman foe oenoe e njan nanga belastingman èn nanga sondari?” Jesus e jere na aksi foe den Fariseiman èn dati meki a e piki den: „Gosontoe sma no abi wan datra fanowdoe, ma den sikiwan abi en fanowdoe. Go foe dati ede, èn leri san disi wani taki: ’Mi wani sari-ati, mi no wani srakti-ofrandi.’ Bika mi no ben kon foe kari regtfardiki sma, ma sondari.”

Soleki fa a sori, dan Mateus kari den belastingman disi kon na en oso, so taki den kan kon arki Jesus foe kon betre na jejefasi. Dati meki Jesus e boemoei nanga den, so taki a kan jepi den foe kon ini wan boen matifasi nanga Gado. Jesus no e tegoe foe den sortoe sma disi, soleki fa a de nanga den Fariseiman, di e soekoe den eigi regtfardikifasi. Na presi foe dati, foe di a firi sari-ati gi den, dan te joe loekoe en boen, Jesus de gi den leki wan datra na jejefasi.

So boen, a sori di Jesus sori sari-ati gi sondari, no wani taki, dati a feni den sondoe foe den boen, ma dati a e sori a srefi sortoe safoe firi di a ben sori den wan di ben siki na skinfasi. Prakseri baka, foe eksempre, di a ben sori taki a ben abi foeroe sari-ati gi a gwasiman èn ben langa en anoe foe fasi a man, ala di a ben taki: „Mi wani dati. Kon krin.” Meki wi sori sari-ati toe, foe di wi e jepi sma di de na nowtoe, spesroetoe na jejefasi. Mateus 8:3; 9:9-13; Markus 2:13-17; Lukas 5:27-32.

▪ Pe Mateus de te Jesus e si en?

▪ Sortoe wroko Mateus e doe, èn foe san ede tra djoe e tegoe foe den sortoe sma disi?

▪ Foe sortoe sani den e kragi Jesus, èn fa a e piki?

▪ Foe san ede Jesus e boemoei nanga sondari?