Kapitel 64

A e leri den foe gi sma pardon

KANDE Jesus nanga den disipel foe en de ete na ini na oso na Kaperna-um. A ben taki nanga den san den moesoe doe te problema e kon na mindri brada, èn foe dati ede Petrus e aksi: „Masra, omeni tron mi brada kan sondoe na mi èn mi moesoe gi en pardon?” Foe di den djoe relisi leriman e gi leki rai taki wan sma moesoe gi pardon te dri tron, meki Petrus feni en wan heri boen sani kande foe taki: „Te seibi tron?”

Ma a heri prakseri foe teri so wan sani, no boen. Jesus e meki Petrus kisi a joisti fasi foe denki: „Mi e taigi joe, no seibi tron, ma seibitenti na seibi tron.” A e sori taki no wan skotoe moesoe poti na den omeni leisi di Petrus e gi en brada pardon.

Foe poti krakti gi den disipel taki den de froeplekti foe gi sma pardon, meki Jesus e froeteri den wan agersitori. A tori abi foe doe nanga wan kownoe di wani seti moni afersi nanga den srafoe foe en. Den e tjari wán srafoe kon na en, di ben moesoe pai en 60.000.000 denari. Na no wan fasi a kan pai a moni disi. Foe dati ede, na so Jesus e tjari kon na krin, a kownoe e gi komando foe den seri a srafoe nanga en wefi nanga en pikin, so taki a moni kan pai.

Now a srafoe e saka kindi fadon na a foetoe foe en meester èn a e begi: „Abi pasensi nanga mi èn mi sa pai joe ala sani baka.”

Foe di a meester e sari en, meki a e taigi a srafoe na wan sari-atifasi taki a no abi foe pai a boen bigi paiman disi. Ma so esi leki disi pasa, na so Jesus e go moro fara, a srafoe disi e go na dorosei èn a e miti wan kompe srafoe di moesoe pai en soso 100 denari. A man e graboe en kompe srafoe na en neki èn a e bigin tjokro en, ala di a e taki: „Pai mi baka san joe moesoe pai mi.”

Ma a kompe srafoe no abi a moni. Foe dati ede a e saka kindi fadon na a foetoe foe a srafoe di a moesoe pai, èn a e begi en: „ Abi pasensi nanga mi èn mi sa pai joe baka.” Tra fasi leki en meester, a srafoe no abi sari-ati, èn a e meki den trowe a kompe srafoe foe en na doengroe-oso.

We now, na so Jesus e go doro, den tra srafoe di ben si san ben pasa, e go froeteri disi na a meester. En ati e bron èn a e kari a srafoe kon na en. „Ogri srafoe,” na so a e taki, „di joe ben begi mi tranga, dan mi ben taigi joe taki ala moni di joe ben moesoe pai mi, joe no ben abi foe pai dati moro. Dan joe, foe joe sei, no ben moesoe sori sari-ati gi joe kompe srafoe, neleki fa mi ben sori sari-ati gi joe?” A meester di ati kon bron srefisrefi, e gi a srafoe di no ben sori sari-ati, abra na den waktiman foe doengroe-oso meki a tan drape, te leki a pai ala en paiman baka.

Dan Jesus e bosroiti: „Na so mi hemel Tata sa doe toe nanga oenoe, efoe oenoe no gi oen brada pardon nanga oen heri ati.”

Disi e leri wi troetroe na wan toemoesi moi fasi fa foe gi sma pardon! Te wi teki a bigi sondoe paiman, di Gado gi wi pardon foe dati, gersi iniwan fowtoe sani di wan kresten brada ben doe wi kande, dan foe troe dati na wan pikin sani. Boiti dati, Jehovah Gado gi wi pardon doesoendoesoen tron. Nofo tron wi no sabi srefi foe den sondoe di wi e doe en. Foe dati ede, wi no kan gi wi brada pardon wan toe tron, awinsi wi abi wan boen reide foe kragi? Hori na prakseri taki, soleki fa Jesus ben leri na ini a Bergitaki, Gado sa „gi wi pardon foe den paiman foe wi, soleki fa wi toe e gi pardon na den wan di doe wi ogri”. Mateus 18:21-35; 6:12; Kolosesma 3:13.

▪ San e meki Petrus poti wan aksi ini a tori foe a gi di wan sma moesoe gi en brada pardon, èn foe san ede a e feni en kande wan heri boen sani dati a e taki dati wan sma moesoe gi wan trawan pardon seibi tron?

▪ Fa a fasi fa a kownoe e handri na tapoe a tranga begi foe en srafoe di ben aksi en foe a sori en sari-ati, de heri tra fasi leki fa a srafoe srefi e handri na tapoe a tranga begi foe en kompe srafoe?

▪ San wi e leri foe na agersitori foe Jesus?