A e leri den san na sakafasi
Kapitel 62
A e leri den san na sakafasi
BAKA DI Jesus dresi a boi, di wan ogri jeje ben de na en tapoe, na ini a kontren krosibei foe Cesarea Filipi, A wani drai go baka na en oso na Kaperna-um. Ma na a waka disi Jesus wani de nanga den disipel foe en wawan, foe kan sreka den moro fara gi a dede foe en èn den frantiwortoe di den sa kisi baka dati. „Den sa gi a Manpikin foe libisma abra na ini den anoe foe libisma,” a e tjari kon na krin gi den, „èn den sa kiri en, ma, ala di den o kiri en, tokoe a sa opo baka dri dei.”
Ala di Jesus ben taki kaba foe a tori disi, èn dri apostel ben si troetroe a transfiguratie, pe den ben taki foe a ’gowe di a sa gowe’, tokoe den bakaman foe en no e froestan na afersi disi ete. Ala di no wan foe den e proeberi foe taki dati den no sa kiri en, soleki fa Petrus ben doe kaba, tokoe den no e prefoeroe foe aksi en moro foe a tori disi.
Te foe kaba, den e doro Kaperna-um, di, na ini a ten foe a diniwroko foe Jesus, ben de leki wan sortoe tanpe foe den. A de so srefi a tanpresi foe Petrus nanga wan toe tra apostel. Drape, man di e teki a belastingmoni foe a tempel, e kon na Petrus. Kande foe di den e proeberi foe kragi Jesus taki a no e hori ensrefi na wan gwenti di ala sma ben teki, meki den e aksi: „A leriman foe joe no e pai den toe drakme [tempel] belasting?”
„Ija”, Petrus e piki.
Jesus, di kon na a oso kande sjatoe baka dati, e froestan san pasa. So boen, bifo Petrus kan taki foe na afersi, Jesus e aksi: „San joe prakseri, Simon? Foe soema den kownoe foe grontapoe e kisi edemoni noso belasting? Foe den manpikin foe den noso foe den freimdesma?”
„Foe den freimdesma”, Petrus e piki.
„So boen, den manpikin no abi foe pai belasting, te joe loekoe en boen”, Jesus e taki. Foe di Jesus Tata na a Kownoe foe na universum, a Sma di den e anbegi na ini a tempel, dan a wet no e froeplekti a Manpikin foe Gado troetroe foe pai a tempel belasting. „Ma foe no meki den naki foetoe,” na so Jesus e taki, „go na se, trowe wan oekoe na watra, èn graboe a fosi fisi di kon na tapoe èn, te joe opo en mofo, joe sa feni wan statermoni [fo drakme]. Teki dati èn gi den foe mi nanga joe.”
Te den disipel e kon makandra, baka di den drai kon baka na Kaperna-um, kande na ini na oso foe Petrus, den e aksi: „Soema na troetroe a moro bigiwan na ini a kownoekondre foe hemel?” Jesus sabi san meki den e poti na aksi dati, foe di a sabi san ben pasa na den mindri, di den ben drai kon baka foe Cesarea Filipi e waka kon na en baka. Foe dati ede a e aksi: „Foe san oenoe ben haritaki nanga makandra na pasi?” Foe di den disipel e sjen, den no e piki, bika den ben haritaki nanga makandra soema ben sa de a moro bigiwan.
Joe kan bribi, a no so, taki baka di Jesus gi leri pikinmori dri jari kaba, den disipel ben sa haritaki nanga makandra foe so wan sani? We, disi e sori a tranga krakti di libisma onvolmaaktifasi kan abi, èn so srefi a tranga krakti di wan relisi background kan abi na tapoe wan sma. A djoe relisi di den disipel ben gro kon na ini, ben poti foeroe krakti na tapoe posisi noso hei presi na ini ala fasi fa sma e wroko nanga makandra. Boiti dati, kande a ben de so, taki Petrus ben firi ensrefi moro hei moro den trawan, foe di Jesus ben pramisi en taki a ben sa kisi wan toe „sroto” foe a Kownoekondre. Kande Jakobus nanga Johanes ben abi den sortoe prakseri dati toe, foe di den ben kisi a grani foe si a transfiguratie foe Jesus.
Awansi fa a tori de toe, Jesus e sreka wan moi situwâsi foe proeberi foe meki den kisi wan joisti denki. A e kari wan pikin kon na en, e poti en na den mindri, e poti en anoe lontoe a pikin, èn a e taki: „Efoe oenoe no e drai oensrefi èn e tron leki jongoe pikin, dan oenoe no sa kon na ini a kownoekondre foe hemel kwetikweti. Foe dati ede, a sma di sa saka ensrefi leki a jongoe pikin disi, na a sma dati na a moro bigiwan na ini a kownoekondre foe hemel; èn a sma di e teki so wan jongoe pikin na ini mi nen, e teki mi toe.”
Disi na troetroe wan toemoesi moi fasi foe meki den disipel kisi wan joisti denki! Jesus ati no e bron nanga den èn a no e taki dati den abi bigimemre, bigi-ai noso taki den wani abi wan bigi nen noso kon goedoe. Nôno, ma na wan agersi fasi a e leri den foe abi wan joisti denki, foe di a e meki gebroiki foe na eksempre foe jongoe pikin, di abi na eigifasi foe de bescheide èn di moro foeroe no abi a prakseri foe abi wan bigi nen noso foe kon goedoe. Nofo tron te den de nanga makandra, dan den no e denki foe abi wan hei presi. Jesus e sori na so fasi, taki den disipel foe en moesoe kweki den eigifasi disi di de wan prenspari eigifasi foe pikin-nengre di abi sakafasi. Soleki fa Jesus e bosroiti: „A sma di e tjari ensrefi leki wan mendriwan na oen mindri, a sma dati bigi.” Mateus 17:22-27; 18:1-5; Markus 9:30-37; Lukas 9:43-48.
▪ Sortoe leri Jesus e gi agen, te den e drai kon baka na Kaperna-um, èn fa sma e teki a leri dati?
▪ Foe san ede Jesus no de froeplekti foe pai a tempel belasting, ma foe san ede tokoe a e pai disi?
▪ San ben meki kande taki den disipel ben haritaki nanga makandra, èn fa Jesus e meki den kisi wan joisti denki?