A e meki wan kefalek bigi winti kon saka
Kapitel 44
A e meki wan kefalek bigi winti kon saka
HERI dei Jesus abi foeroe foe doe. A e gi leri toe na den ipi sma tapoe a se-sjoro èn baka ten, te a de nanga den disipel foe en wawan, a e tjari den agersitori kon na krin gi den. Te neti doro, a e taki: „Meki wi koti abra go na a tra sjoro.”
Na abrasei foe a Se foe Galilea na a sjoro na a owstoesei, joe abi a kontren di nen Dekapolis, foe a Griki wortoe deʹka, di wani taki „tin”, èn poʹlis, di wani taki „foto”. Den foto foe a Dekapolis na a mindribere foe a Griki koeltoeroe, ala di a no abi misi, taki foeroe djoe e libi drape toe. Ma Jesus no e wroko foeroe ini a kontren. Soleki fa wi sa si baka ten, dan srefi te a e go drape a leisi disi, sani e tapoe en foe tan langa.
Te Jesus e aksi foe go na a tra sjoro, dan den disipel e teki en go nanga boto. Ma sma e si taki den e hari gowe. Heri esi tra sma toe e teki den boto foe den foe go makandra nanga den. A no de toemoesi fara foe go na a tra sei. Te joe loekoe en boen, dan a Se foe Galilea na soso wan bigi pisi watra di langa so wan 20 kilometer èn di no bradi moro leki 12 kilometer.
Wi kan froestan taki Jesus weri. So boen, no langa baka te den hari gowe, Jesus e go didon na bakasei na ini a boto, e poti en ede na tapoe wan koensoe èn a e fadon go na ini wan dipi sribi. Difrenti foe den apostel sabi heri boen fa foe tjari wan boto na watra, foe di den ben go fisi ini a Se foe Galilea foeroe. So boen, na den e teki a frantiwortoe na den tapoe foe tjari a boto.
Ma a waka disi no sa de wan makriki wan. Foe di a moro waran na tapoe a pisi watra, di lagi so wan 210 meter moro leki a se srefi, èn a loktoe moro kowroe na ini den bergi di de krosibei, meki son leisi tranga winti e saka kon èn e meki taki hebi bigi winti e wai wantronso na tapoe a pisi watra. Disi na san e pasa now. Fosi joe denki, den skwala e naki a boto èn watra e kon na inisei, so taki a boto pikinmoro foeroe nanga watra. Ma Jesus e sribi go doro!
Den botoman di abi ondrofeni, e wroko boen tranga foe meki a boto tan go na a joisti sei. Tweifri no de, taki den pasa bigi winti kaba. Ma a leisi disi den no sabi moro san foe doe. Foe di den frede taki den o lasi den libi, meki den e wiki Jesus. ’Masra, joe no e broko joe ede kwetikweti? Wi e soengoe!’, den e bari. ’Jepi wi, wi o dede na watra!’
Jesus e opo èn e komanderi a winti nanga a se: „Tan pî! Tan tiri!” Èn a krasi winti e tapoe foe wai èn a se e bedari. Jesus e drai loekoe den disipel foe en, èn a e aksi den: ’Foe san ede oenoe e frede so? Oenoe no abi bribi ete?’
Ne wan freimde sortoe frede e kon na tapoe den disipel. ’Soema na a sma disi troetroe?’, den e aksi makandra, ’bika a e komanderi srefi den winti nanga a watra, èn den e gi jesi na en.’
Jesus e sori bigi krakti troetroe! A de troetroe wan korostoe firi foe sabi taki a Kownoe foe wi abi makti tapoe den natoeroe elementi èn taki, te a Kownoekondre foe en sa tiri, dan a sa poti ala en prakseri na tapoe a grontapoe foe wi, so taki ala sma sa libi ini seikerfasi, sondro frede gi den boen takroe natoeroe rampoe!
No langa baka te a bigi winti saka, Jesus nanga den disipel foe en e doro boen na a sjoro na a owstoesei. Kande den tra boto no ben miti a hebi foe a bigi winti èn ben drai go boen baka na oso. Markus 4:35–5:1; Mateus 8:18, 23-27; Lukas 8:22-26.
▪ San na a Dekapolis, èn pe a de foe feni?
▪ Sortoe sani foe a natoeroe e meki taki hebi bigi winti e kon na tapoe a se foe Galilea?
▪ San den disipel e doe, te a koni foe den leki seiriman no kan jepi den?