A e njan nanga wan Fariseiman
Kapitel 76
A e njan nanga wan Fariseiman
BAKA DI Jesus gi piki na den sma di e kroetoe en foe feni fowtoe na en èn di e tweifri foe pe a feni a makti foe en foe dresi wan man di no ben man taki, dan wan Fariseiman e kari en foe kon njan na en oso. Bifo den e njan, den Fariseiman e hori densrefi na a gwenti di den abi foe wasi den anoe te na den baka-anoe. Den e doe disi bifo èn baka te den njan, èn srefi te den e njan. Ala di a gwenti disi no de teige a wet foe Gado di skrifi, tokoe a e go moro fara leki san Gado e aksi ini a tori foe a de di sma moesoe de krin na ceremonia fasi.
Te Jesus no e hori ensrefi na a gwenti, dan a man di kari en kon na en oso, e froewondroe. Ala di a no taki nanga wortoe kande, taki a e froewondroe, tokoe Jesus e si disi èn a e taki: „Oen Fariseiman now, oenoe e krin a dorosei foe a beker èn foe a skotriki, ma na inisei foe oenoe lai nanga foefoeroe èn ogridoe. Oen onreidelek sma! A sma di meki a dorosei, a no meki na inisei toe?”
Na so fasi Jesus e tjari a hoigrifasi foe den Fariseiman kon na krin di e wasi den anoe akroederi gwenti, ma di no e krin na ati foe den foe poeroe ogridoe. A e gi den a rai: „Gi den sani di de na inisei leki presenti foe sari-atifasi, èn loekoe! ala tra sani foe oenoe sa de krin.” A gi di den e gi sani, moesoe de foe wan lobi ati ede, no foe di den wani foe sma e froewondroe nanga san den e kari a regtfardikifasi foe den.
„Heloe foe oenoe, Fariseiman,” Jesus e go moro fara, „bika oenoe e gi wan di foe tin pisi foe a mint èn foe a wijnruit èn foe ibri tra sortoe groentoe, ma a retidoe nanga a lobi foe Gado, oenoe e libi na wan sei! Den sani disi oenoe ben de froeplekti foe doe, ma sondro foe misi foe doe den tra sani.” A Wet di Gado ben gi Israèl, e aksi foe den pai wan di foe tin pisi foe den froktoe foe den pranigron. A mint nanga a wijnruit, na pikin pransoen noso wiwiri di sma e gebroiki foe gi a njanjan tesi. Den Fariseiman e pai soifri wan di foe tin pisi foe srefi den wiwiri disi di no abi foeroe waarde, ma Jesus e kroetoe den, foe di den no e doe a moro prenspari sani di den moesoe doe foe sori lobi, foe sori switifasi, noso foe no prakseri toemoesi foeroe foe densrefi.
Jesus e kroetoe den moro fara, èn a e taki: „Heloe foe oenoe, oen Fariseiman, bika oenoe lobi den fesisei presi na ini den snoga èn den odi di sma e gi oenoe na den wowojo! Heloe foe oenoe, bika oenoe gersi den memre-grebi di sma no e si, so taki den e waka na den tapoe sondro foe den sabi dati!” Sma no e si taki den Fariseiman no krin. A relisi foe den Fariseiman gersi boen na dorosei, ma na inisei a no warti notinoti! A gron na tapoe hoigrifasi.
Wan sabiman foe wet, wan foe den sma di sabi a Wet foe Gado heri boen, e arki a kroetoe disi èn a e kragi: „Leriman, te joe e taki den sani disi, dan joe e afrontoe wi toe.”
Gi Jesus den man disi di sabi a Wet heri boen, de frantiwortoe toe, èn a e taki: „Heloe foe oenoe toe, di sabi a Wet heri boen, bika oenoe e poti lai na den sma tapoe di moeilek foe tjari, ma oenoe srefi no e fasi den lai nanga no wan foe oenoe finga! Heloe foe oenoe, bika oenoe e bow den memre-grebi foe den profeiti, ma oen fositen tata kiri den!”
Den lai di Jesus e taki foe den, na den gwenti di gi abra nanga mofo, ma den sabiman disi foe Wet no wani poeroe no wán pikin wet foe meki en moro makriki gi a pipel. Jesus e tjari kon na krin taki den e agri srefi nanga a kiri di den e kiri den profeiti, èn a e warskow: „’A broedoe foe ala den profeiti, di ben lasi gowe sensi di grontapoe seti, den sa aksi foe a geslakti disi, foe a broedoe foe Abel te na a broedoe foe Sakaria di den kiri na mindri na altari nanga na oso.’ Ija, mi e taigi oenoe, den sa aksi disi foe a geslakti disi.”
A grontapoe foe a libisma famiri di boen foe kisi froeloesoe, ben doe kon di Adam nanga Eva ben kisi pikin; so boen, Abel ben libi di „grontapoe [ben] seti”. Baka di den kiri Sakaria na wan ogri-ati fasi, wan legre foe Siria ben pori Juda. Ma Jesus e taki na fesi dati en eigi geslakti sa kisi wan moro ogri pori, bika na ogridoe foe den de moro takroe srefi. A pori disi e feni presi so wan 38 jari na baka, na ini 70 G.T.
Te Jesus e go moro fara nanga en kroetoe, a e taki: „Heloe foe oenoe, di sabi a Wet heri boen, bika oenoe ben poeroe a sroto foe a sabi; oenoe srefi no ben go na inisei, èn den sma di e go na inisei, oenoe ben tapoe den foe doe dati!” Den man di sabi a Wet heri boen, de froeplekti foe tjari a Wortoe foe Gado kon na krin gi a pipel, èn foe sori den san disi wani taki. Ma den no e doe disi èn den e poeroe srefi na okasi di den sma e kisi foe froestan a Wortoe foe Gado.
Den Fariseiman nanga den man di sabi a Wet heri boen, ati e bron srefisrefi nanga Jesus, foe di a tjari kon na krin sortoe sma den de troetroe. Te a e gowe libi na oso, dan den e bigin gens en srefisrefi èn den e bigin poti wan lo aksi gi en. Den e proeberi foe tjari en go na ini wan trapoe foe a taki wan sani di kan gi den wan reide foe kisi en. Lukas 11:37-54; Deuteronomium 14:22; Mika 6:8; 2 Kroniki 24:20-25.
▪ Foe san ede Jesus e kroetoe den Fariseiman èn den man di sabi a Wet heri boen?
▪ Sortoe lai den sabiman foe Wet e poti na tapoe den sma?
▪ O ten „grontapoe [ben] seti”?