Kapitel 15

A fosi wondroe foe Jesus

SOSO wan toe dei pasa, sensi Andreas, Petrus, Johanes, Filipus, Natanaèl, èn kande Jakobus ben tron den fosi disipel foe Jesus. Now den wan disi de na pasi foe go na oso ini a distrikt Galilea, pe den alamala komoto. Den e go na Kana, a libipe foe Natanaèl. A foto disi de ini den pikin bergi no fara foe Nasaret, pe Jesus srefi ben gro kon bigi. Den kisi wan kari foe go na wan trow-oso na Kana.

A mama foe Jesus kon na a trow-oso toe. A gersi leki Maria, leki wan mati foe a famiri foe den sma di trow, ben jepi foe sorgoe gi den foeroe sma di kon na a trow-oso. So boen, a e si wantewante taki wan sani mankeri, èn a e froeteri dati na Jesus: „Den no abi win.”

So boen, te Maria e aksi Jesus, te joe loekoe en fini, foe doe wan sani na a mankeri di win e mankeri, dan ini a bigin Jesus no e firi foe doe dati. „San mi abi foe doe nanga joe?”, a e aksi. Leki a sma di Gado poti leki Kownoe, dan famiriman noso mati no abi foe froeteri en san a moesoe doe. Foe dati ede Maria de so koni foe libi na afersi gi en manpikin èn a e taigi den jepiman nomo: „Awansi san a e taigi oenoe toe, doe dati.”

We, siksi bigi ston watrakan de drape, di ibriwan foe den kan hori so wan 40 liter. Jesus e komanderi den jepiman: „Foeroe den watrakan nanga watra.” Èn den jepiman e foeroe den te na a lanki. Dan Jesus e taki: „Teki pikinso foe en now, èn tjari dati go na a fesiman foe a fesa.”

A fesiman foe a fesa e froewondroe taki a win na so wan kefalek boen win, ala di a no sabi taki disi ben meki nanga jepi foe wan wondroe. A e kari a man di e trow èn e taki: „Ibri tra sma e poti a moro boen win fosi, èn te den sma kon droengoe kaba, dan a e poti a win di no de so boen. Joe kibri a moro boen win te leki a momenti disi.”

Disi na a fosi wondroe di Jesus e doe, èn te den njoen disipel foe en e si disi, dan a bribi foe den e kon moro tranga. Baka ten, makandra nanga en mama nanga den afoe-brada foe en, den e teki waka go na a foto Kaperna-um, krosibei foe a Se foe Galilea. Johanes 2:1-12.

▪ O ten na ini a diniwroko foe Jesus, a trow-oso na Kana e feni presi?

▪ Foe san ede Jesus no wani doe san en mama taigi en?

▪ Sortoe wondroe Jesus e doe, èn sortoe krakti dati abi na tapoe tra sma?