Kapitel 84

A frantiwortoe di wan sma abi te a de wan disipel

BAKA DI Jesus gowe libi na oso foe a prenspari Fariseiman, di, soleki fa a sori, de wan memre foe a Sanhedrin, a e teki waka baka go na Jerusalem. Bigi ipi sma e waka na en baka. Ma foe san ede den e doe so? San de troetroe ini a tori te wan sma de wan troetroe bakaman foe en?

Te den e waka go moro fara, dan Jesus e drai loekoe den ipi sma èn kande a e skreki den te a e taki: „Efoe wan sma e kon na mi sondro foe a no wani si en papa nanga mama nanga wefi nanga pikin nanga brada nanga sisa, na ai, ija, èn srefi en eigi sili, dan a no kan de mi disipel.”

San Jesus wani taki nanga disi? Djaso Jesus no e taki dati den bakaman foe en troetroe no moesoe wani si den famiriman foe den na ai. Ma moro foeroe a de so, taki den no moesoe wani si den na ai na a fasi disi taki den moesoe lobi Jesus moro leki den lobi famiriman. Den e taki foe Jesus fositen tata Jakob, taki „a no ben wani si [Lea] na ai” èn taki a ben lobi Rakel, san wani taki dati a no ben lobi Lea someni leki a ben lobi en sisa Rakel.

Prakseri toe, taki Jesus ben taki, dati wan disipel no moesoe wani si „srefi en eigi sili”, noso en libi, na ai. Èn agen a de so, taki san Jesus wani taki, na dati wan troe disipel moesoe lobi En moro leki a lobi en eigi libi. Na a fasi disi Jesus e poti krakti na tapoe taki a de wan serjoesoe frantiwortoe foe tron wan disipel foe en. A no de wan sani di wan sma kan bigin nanga dati sondro foe go denki boen fosi foe disi.

Foe de wan disipel foe Jesus, wani taki problema nanga froefolgoe, soleki fa a e sori moro fara: „Efoe wan sma no e tjari en pina-postoe, èn no e waka na mi baka, dan a no kan de mi disipel.” So boen, wan troe disipel, moesoe de klariklari foe ondrofeni a srefi sjen di Jesus ben ondrofeni, san kan wani taki toe, efoe dati de fanowdoe, dati den feanti foe Gado e kiri en, soleki fa disi sa pasa heri esi nanga Jesus.

So boen, den ipi sma di e waka na en baka, moesoe go ondrosoekoe finifini san a wani taki foe de wan disipel foe Krestes. Nanga jepi foe wan agersitori, Jesus e poti krakti na tapoe a tori disi. „Foe eksempre, soema foe oenoe”, na so a e taki, „di wani bow wan toren, no e go sidon fosi foe teri den kostoe, foe si efoe a abi nofo foe kaba a wroko? Noso a ben kan pasa, taki a e poti a fondamenti foe en, ma no man foe kaba a wroko èn ala sma di e tanapoe e loekoe, sa bigin foe spotoe en kande èn taki: ’A sma disi ben bigin bow, ma a no ben man kaba a wroko.’”

So boen, nanga na agersitori disi Jesus e sori den ipi sma di e waka na en baka, taki bifo den e tron wan disipel foe en, den moesoe abi a tranga overtoigi taki den kan doe ala sani di abi foe doe nanga a tori disi, neleki te wan sma di wani bow wan toren, sa go loekoe fosi efoe a abi a moni foe kaba a wroko. Baka disi Jesus e taki ete wan agersitori, èn a e taki:

„Noso sortoe kownoe di e hari go feti nanga wan tra kownoe, no e go sidon fosi foe go ondrosoekoe, efoe nanga wan legre foe tin doesoen man, a man kakafoetoe gi a sma di e hari kon feti nanga en nanga twenti doesoen man? Foe taki en leti, efoe a no man foe doe disi, dan ala di a trawan de fara na pasi ete, a e seni wan groepoe sma go di e teki presi gi en èn e begi foe vrede.”

Dan Jesus e poti krakti na tapoe, san a abi na prakseri nanga den agersitori foe en. A e taki: „Foe dati ede, joe kan de seiker taki no wan sma foe oenoe kan de wan disipel foe mi, efoe a no taki adjosi na ala den goedoe foe en.” Dati na san den ipi sma di e waka na en baka, moesoe wani foe doe, èn dati de so toe gi ibri tra sma di e leri foe Krestes. Den moesoe de klariklari foe òfer ala sani di den abi — ala den goedoe foe den, makandra nanga a libi srefi — efoe den wani foe de den disipel foe en. Joe wani foe doe disi?

„Foe troe a de so, taki sowtoe na wan boen sani”, Jesus e taki moro fara. Na ini en Bergitaki a ben taki dati den disipel foe en na „a sowtoe foe grontapoe”, san wani taki dati den abi wan krakti na tapoe sma so taki den no e go pori, neleki fa troetroe sowtoe e sorgoe taki sani no e pori. „Ma efoe a sowtoe srefi lasi en krakti, dan nanga san a sa kisi en tesi? A no warti moro gi a gron èn a no boen leki mèst toe”, Jesus e bosroiti. „Sma e trowe en go na dorosei. A sma di abi jesi foe jere, meki a jere.”

So boen, Jesus e sori taki srefi den sma di de disipel foe en wan pisi ten kaba, no moesoe meki a fasti bosroiti foe den foe go doro, kon swaki. Efoe disi e pasa, dan den no boen moro foe gebroiki èn den e tron wan sani di a grontapoe disi sa spotoe nanga en. Den no boen gi Gado èn, te joe loekoe en boen, den de srefi wan sjen gi Gado. Foe dati ede, neleki doti sowtoe di lasi en krakti, den sa trowe den go na dorosei, ija, den sa kisi pori. Lukas 14:25-35; Genesis 29:30-33; Mateus 5:13.

▪ San a wani taki dati wi ’no wani si’ wi famiriman èn wisrefi ’na ai’?

▪ Sortoe toe agersitori Jesus e gi, èn san den wani taki?

▪ San Jesus abi na prakseri nanga a lasti sani di a e taki foe sowtoe?