A go na Judea foe doe wan wroko ini a tori foe sari-atifasi
Kapitel 89
A go na Judea foe doe wan wroko ini a tori foe sari-atifasi
WAN TOE wiki na fesi, na a ten foe na Inwijdingfesa na Jerusalem, den djoe ben proeberi foe kiri Jesus. Foe dati ede a ben teki waka go na a noordsei, èn a de krin taki a ben go na wan kontren di no ben de fara foe a Se foe Galilea.
No so langa pasa kaba, a ben go na a zuidsei baka foe go na Jerusalem, ala di a ben e preiki na pasi na ini den dorpoe foe Perea, wan distrikt na a owstoesei foe Jordan liba. Baka di a ben froeteri na agersitori foe a goedoeman nanga Lasarus, a e go doro foe leri den disipel foe en den sani di a ben leri den kaba, di a ben de na Galilea.
Foe eksempre, a e taki dati a ben sa de moro boen gi wan sma „efoe den ben sa anga wan miriston na en neki èn den ben trowe a sma go na ini se”, leki foe a meki wán foe den „pikinwan” foe Gado naki foetoe. A e poti krakti na tapoe toe, taki a de fanowdoe foe gi sma pardon, foe di a e tjari kon na krin: „Srefi efoe [wan brada] e sondoe na joe seibitron wan dei èn a e kon baka na joe seibitron, e taki: ’Mi abi berow’, dan joe moesoe gi en pardon.”
Te den disipel e aksi: „Gi wi moro bribi”, Jesus e piki: „Efoe oenoe ben abi bribi di bigi leki wan mosterd siri, dan oenoe ben sa taigi a moerbei-bon taki: ’Roetoe joesrefi poeroe èn go prani joesrefi na ini se!’, èn a ben sa gi jesi na joe.” So boen, srefi nanga wan pikin bribi wan sma kan doe bigi sani.
Dan Jesus e froeteri foe wan troetroe situwâsi di e agersi a joisti fasi foe wan foetoeboi foe na almakti Gado. „Soema foe oenoe, di abi wan srafoe di e ploegoe noso di e loekoe den meti,” Jesus e taki, „sa taigi en te a kon foe a gron kon na oso: ’Kon dja wantewante, didon na tafra’ ? Na presi foe dati, a no sa taigi en: ’Sreka wan sani gi mi neti njanjan, èn weri wan fesikoki èn dini mi, te leki mi kaba njan èn dringi, èn baka dati joe kan go njan èn dringi’ ? A no sa taki a srafoe tangi, foe di a ben doe den sani di a ben kisi foe doe, a no so? Na so toe, te oenoe doe ala sani di oenoe ben kisi foe doe, dan oenoe moesoe taki: ’Wi na soso-srafoe. Wi doe san wi ben moesoe doe.’” So boen, den foetoeboi foe Gado noiti no moesoe abi a firi taki den e doe Gado wan boen te den e dini en. Na presi foe dati, den moesoe hori alaten na prakseri a grani di den abi foe anbegi en leki froetrow memre foe en osofamiri.
Soleki fa a sori, dan a de sjatoe baka di Jesus taki na agersitori disi, dati wan boskopoeman e doro. Maria nanga Marta, den sisa foe Lasarus, di e libi na Betania na Judea, ben seni en kon. „Masra, loekoe! a sma di joe abi firi foe lobi gi en, siki”, a boskopoeman e froeteri.
Jesus e piki: „A siki disi no abi dede leki marki, ma a de foe gi Gado glori, so taki a Manpikin foe Gado kan kisi glori nanga dati.” Baka di a tan toe dei pe a de, Jesus e taigi den disipel foe en: „Meki wi go baka na Judea.” Ma den e memre en: „Rabi, a no ben de so langa ete taki den sma foe Judea ben soekoe foe ston joe, èn now joe e go drape baka?”
„Wan dei no abi twarfoe joeroe?”, Jesus e aksi. „Efoe wan sma e waka na deiten, a no e stotoe en foetoe na no wan sani, bika a e si a leti foe a grontapoe disi. Ma efoe wan sma e waka na neti, a e stotoe en foetoe na wan sani, bika a leti no de na en ini.”
San Jesus wani taki kande, na taki den ’joeroe foe a dei’, noso a ten di Gado gi Jesus foe doe en diniwroko na grontapoe, no kaba ete èn te na a ten dati, no wan sma no kan doe en wan ogri. A moesoe gebroiki a sjatoe ten di a abi ete foe „a dei”, dorodoro foe di baka dati a „neti” sa kon te den feanti foe en sa kiri en.
Jesus e taki moro fara: „Lasarus, wi mati, go rostoe, ma mi e go drape foe wiki en na a sribi.”
Soleki fa a sori, dan den disipel foe en e prakseri taki Lasarus go sribi, èn taki disi e sori taki a sa kon betre, èn foe dati ede den e piki: „Masra, efoe a go rostoe, dan a sa kon boen baka.”
Dan Jesus e taigi den krin: „Lasarus dede, èn foe oenoe ede mi e prisiri taki mi no ben de drape, so taki oenoe kan bribi. Ma meki wi go na en.”
Tomas e froestan taki sma ben sa kan kiri Jesus na Judea, ma foe di a wani foe horibaka gi Jesus, meki a e gi den kompe disipel foe en a deki-ati: „Meki wi go toe, so taki wi kan dede nanga en.” So boen, ala di a libi foe den disipel kan kon ini kefar, tokoe den e go nanga Jesus na Judea, foe doe a wroko disi na ini a tori foe sari-atifasi. Lukas 13:22; 17:1-10; Johanes 10:22, 31, 40-42; 11:1-16.
▪ Pe Jesus ben preiki no so langa pasa?
▪ Sortoe leri Jesus e taki ete wan tron, èn foe sortoe troetroe situwâsi a e froeteri foe agersi sortoe sani?
▪ Sortoe njoensoe Jesus e kisi, èn san Jesus wani taki nanga a „dei” èn nanga a „neti”?
▪ San Tomas wani taki te a e taki: ’Meki wi go, so taki wi kan dede nanga en’?