Kapitel 88

A goedoeman nanga Lasarus

JESUS ben taki nanga den disipel foe en foe a joisti fasi fa materia goedoe moesoe gebroiki, èn a e tjari kon na krin taki wi no kan de srafoe foe a goedoe disi èn na a srefi ten de srafoe foe Gado. Den Fariseiman e jere disi toe, èn foe di den lobi moni, meki den e bigin spotoe Jesus. Foe dati ede a e taigi den: „Na oenoe na den sma di e froeklari na fesi foe sma taki oenoe de regtfardiki, ma Gado sabi oen ati; bika san de hei na sma, na wan tegoe sani na ini Gado ai.”

A ten doro taki sani o de tra fasi gi den sma di abi grontapoe goedoe, politiek makti, èn di abi makti èn krakti na sma tapoe na relisi sei. Den sa lagi den. Ma den sma di sabi san den abi fanowdoe na jejefasi, den sa hei den. Jesus e poti a prakseri na tapoe a kenki disi te a e taigi den Fariseiman moro fara:

„A Wet nanga den Profeiti ben de te nanga Johanes [a Dopoeman]. Sensi a ten dati den e meki a kownoekondre foe Gado bekènti leki boen njoensoe, èn ala sortoe sma e doe moeiti foe go na en. Foe troe, a moro makriki gi hemel nanga grontapoe foe pasa gowe, leki gi wán pikin pisi foe wan letter foe a Wet tan sondro foe a kon troe.”

Den leriman foe Wet nanga den Fariseiman e djaf taki den, soleki fa den e taki, e hori densrefi getrow na a Wet foe Moses. Memre, taki di Jesus ben meki wan man na Jerusalem ben kon si baka na wan wondroe fasi, den ben djaf: „Wi na disipel foe Moses. Wi sabi dati Gado taki nanga Moses.” Ma now a reide kon troe foe san ede a Wet foe Moses ben gi. A Wet ben gi foe tjari den sma di abi sakafasi, go na Jesus Krestes, a Kownoe di Gado ben poti. So boen, sensi a bigin foe Johanes en diniwroko, ala sortoe sma, spesroetoe den sma di abi sakafasi èn den pôtiwan, e doe foeroe moeiti foe tron borgoe foe Gado Kownoekondre.

Foe di a Wet foe Moses e kon troe now, meki a froeplekti di wan sma abi foe hori ensrefi na en, moesoe poeroe na pasi. A Wet e gi sma pasi foe broko wan trow foe difrenti reide ede, ma Jesus e taki now: „Ibriwan sma di e broko a trow nanga en wefi èn e trow nanga wan trawan, e doe soetadoe, èn a sma di e trow wan oema di broko a trow nanga en masra, e doe soetadoe.” Den wortoe disi troetroe moesoe tergi den Fariseiman, spesroetoe foe di den e gi pasi foe broko wan trow foe foeroe reide ede!

Te Jesus e go doro foe taki foe den Fariseiman, dan a e froeteri wan agersitori di e taki foe toe man di a posisi noso a situwâsi foe den e kenki srefisrefi te foe kaba. Joe kan si soema den man e prenki èn san a wani taki dati a situwâsi foe den e kenki?

„Ma wan seiker man ben goedoe”, Jesus e tjari kon na krin, „èn a ben abi a gwenti foe weri purper krosi nanga linnen, èn dei foe dei a ben e libi wan bigi prisiri libi. Ma den ben abi a gwenti foe poti wan seiker begiman, di ben nen Lasarus, di en skin ben lai nanga soro, na a dromofo foe en, èn a ben angri foe foeroe en bere nanga san ben fadon foe a tafra foe a goedoeman. Ija, so srefi den dagoe ben kon foe leki den soro foe en.”

Dja Jesus e gebroiki a goedoeman foe prenki den djoe relisi fesiman, pe joe abi no wawan den Fariseiman nanga den leriman foe Wet na ini, ma so srefi den Sadoeseiman nanga den granpriester toe. Den djoe relisi fesiman disi goedoe ini a tori foe grani nanga boen okasi na jejefasi, èn den e tjari densrefi neleki a goedoeman. A kownoe purper krosi di den e weri, e prenki a boen posisi foe den, èn a weti linnen e prenki a si di den e si densrefi leki regtfardiki sma.

A goedoeman-groepoe disi di abi bigifasi, e si den gewoon sma di pôti, leki boen lagi sma èn den e kari den ‛am ha·’aʹrets, noso sma foe a gron. Foe dati ede a begiman Lasarus e prenki den sma disi, di den relisi fesiman no e gi a joisti njanjan nanga grani na jejefasi. Neleki fa Lasarus skin ben lai nanga soro, na so den e si a gewoon pipel leki lagi sma di siki na jejefasi èn di boen foe de nanga dagoe wawan. Ma tokoe den sma di de foe a Lasarus-groepoe, angri èn e dreiwatra foe njanjan na jejefasi èn foe dati ede den de na a dromofo foe kan kisi ibri pisi njanjan na jejefasi di e fadon foe a tafra foe a goedoeman.

Jesus e froeteri now fa a situwâsi foe a goedoeman nanga Lasarus e kenki. Sortoe kenki na disi, èn san den e prenki?

A goedoeman nanga Lasarus e kenki

A goedoeman e prenki den relisi fesiman di e kisi grani nanga okasi na jejefasi, èn Lasarus e prenki a gewoon pipel di angri foe kisi njanjan na jejefasi. Jesus e go doro nanga a tori foe en, èn a e froeteri foe wan bigi kenki di e kon na ini a situwâsi foe den man.

„Baka wan pisi ten now”, na so Jesus e taki, „a begiman dede èn den engel ben tjari en go na a borsoe posisi foe Abraham. A goedoeman dede toe èn den ben beri en. Èn na ini Hades a ben opo en ai, ala di a ben de nanga skin-ati, èn a ben si Abraham farawe èn Lasarus na a borsoe posisi foe en.”

Foe di a goedoeman nanga Lasarus a no troetroe sma, ma den e agersi groepoe foe sma, meki sma kan froestan taki a dede foe den na wan agersi sani toe. San a dede foe den e agersi noso e prenki?

Didjonsro Jesus kaba poti a prakseri na tapoe a kenki di situwâsi ben o kenki, foe di a ben taki dati ’a Wet nanga den Profeiti ben de te nanga Johanes a Dopoeman, ma taki sensi a ten dati den e meki a kownoekondre foe Gado bekènti’. Foe dati ede a goedoeman nanga Lasarus dede ini a tori foe a situwâsi di den ben de na ini fosi èn disi e pasa foe a preiki foe Johanes nanga Jesus Krestes ede.

Den memre foe a Lasarus-groepoe di abi sakafasi èn di abi berow, dede na ini a tori foe a situwâsi di den ben de na ini fosi, di den no ben abi notinoti na jejefasi, èn den e kon na ini wan posisi taki Gado feni den boen. Ala di fosi den ben loekoe go na den relisi fesiman foe kisi a pikinso njanjan di ben fadon foe a tafra na jejefasi, now den waarheid foe bijbel di den e kisi foe Jesus, e sorgoe krinkrin gi den sani di den abi fanowdoe. Na so fasi den e tjari den go na a borsoe posisi, noso a boen-ati posisi, foe a Moro Bigi Abraham, Jehovah Gado.

Na a tra sei, den sma foe a goedoeman-groepoe, no abi a boen-ati foe Gado, foe di den weigri na wan tranga-edefasi foe teki a Kownoekondre boskopoe di Jesus ben leri. Den dede foe dati ede ini a tori foe a posisi foe boen-ati di gersi nomo taki den ben abi dati fosi. Den e taki srefi foe den, dati den e kisi skin-ati na wan agersi fasi. Arki now na san a goedoeman e taki:

„Tata Abraham, abi sari-ati gi mi èn seni Lasarus kon foe dopoe na ede foe en finga na ini watra foe kowroe mi tongo, bika mi e kisi hebi skin-ati ini a tranga faja disi.” Den faja kroetoe boskopoe foe Gado, di den disipel foe Jesus ben meki bekènti, na dati ben e gi den memre foe a goedoeman-groepoe skin-ati. Den wani, taki den disipel no moesoe meki den boskopoe disi bekènti nanga someni faja, èn na a fasi disi e froelekti den pikinso foe a skin-ati di den e kisi.

„Ma Abraham ben taki: ’Mi pikin, prakseri taki joe ben kisi ala den boen sani di joe ben de na libi, ma na a srefi fasi Lasarus ben kisi den takroe sani. Ma now a e kisi trowstoe dja, ma joe e kisi hebi skin-ati. Èn boiti ala den sani disi, wan bigi olo de na mindri wi nanga oenoe, so taki den sma di wani abra foe dja go na oenoe, no man èn sma foe drape no man koti abra toe kon na wi.’”

A de troetroe wan reti sani di fiti taki so wan bigi kenki e feni presi na a Lasarus-groepoe nanga a goedoeman-groepoe! A situwâsi foe den e kenki wan toe moen na baka, na a Pinksterfesa foe 33 G.T., te a njoen froebontoe e kon ini a presi foe na owroe Wetfroebontoe. Sondro tweifri a e kon na krin now, taki den disipel, èn no den Fariseiman nanga tra relisi fesiman, abi a boen-ati foe Gado. A „bigi olo” di e prati na agersi goedoe-man foe den disipel foe Jesus, e prenki foe dati ede Gado en regtfardiki kroetoe di no kan kenki.

Baka dati a goedoeman e aksi „tata Abraham”: „Seni [Lasarus] go na a oso foe mi papa, bika mi abi feifi brada.” So boen, a goedoeman e erken taki a abi wan moro krosibei matifasi nanga wan tra papa, di, foe taki en leti, na Satan Didibri. A goedoeman e aksi efoe Lasarus wani swaki den kroetoe boskopoe foe Gado, so taki den „feifi brada” foe en, den relisi patna foe en, no sa kon na ini „a presi disi pe den e gi sma skin-ati”.

„Ma Abraham ben taki: ’Den abi Moses nanga den Profeiti; meki den arki den.’” Ija, efoe den „feifi brada” no ben wani kisi skin-ati, dan ala san den abi foe doe, na foe poti prakseri na tapoe den sani di Moses nanga den Profeiti skrifi, di e meki sma kon sabi Jesus leki a Mesias èn e tron wan disipel foe en baka dati. Ma a goedoeman no e agri nanga dati èn a e taki: „Nôno, tata Abraham, ma efoe wan foe den dedewan e go na den, dan den sa abi berow.”

Ma a e kisi foe jere: „Efoe den no e arki Moses nanga den Profeiti, dan den no sa kisi na overtoigi toe efoe wan sma e opo baka na dede.” Gado no sa gi spesroetoe marki noso doe wondroe foe overtoigi sma. Den moesoe leisi den Boekoe foe bijbel èn doe san skrifi na ini, efoe den wani kisi en boen-ati. Lukas 16:14-31; Johanes 9:28, 29; Mateus 19:3-9; Galasiasma 3:24; Kolosesma 2:14; Johanes 8:44.

▪ Foe san ede a dede foe a goedoeman èn foe Lasarus na wan agersi sani, èn san a dede foe den e prenki?

▪ Sortoe kenki e feni presi na a bigin foe Johanes en diniwroko, soleki fa Jesus e sori?

▪ San moesoe poeroe na pasi, baka a dede foe Jesus, èn fa disi sa abi krakti na tapoe na afersi foe broko wan trow?

▪ Soema ini na agersitori foe Jesus, a goedoeman nanga Lasarus e prenki?

▪ San na a skin-ati di a goedoeman e kisi, èn san a e aksi foe kisi froelekti?

▪ San a „bigi olo” e prenki?

▪ Soema na a troetroe papa foe a goedoeman, èn soema na den feifi brada foe en?