A gowe libi na oso foe Ja-irus, èn e go baka na Nasaret
Kapitel 48
A gowe libi na oso foe Ja-irus, èn e go baka na Nasaret
A DEI disi Jesus ben abi foeroe foe doe — nanga boto a ben kon foe a Dekapolis, a ben dresi wan oema di ben lasi broedoe, èn a ben gi na oemapikin foe Ja-irus wan opobaka. Ma a dei no kaba ete. Soleki fa a sori, dan te Jesus e gowe libi na oso foe Ja-irus, toe breni sma e waka na en baka èn den e bari: „Sari foe wi, Manpikin foe David.”
Foe di den man disi e kari Jesus „Manpikin foe David”, den e sori taki den e bribi taki Jesus na a erfgenaam foe a kownoestoeroe foe David èn taki a de a pramisi Mesias. Ma Jesus e doe neleki a no e jere a babari foe den foe kan kisi jepi, kande foe tesi den o fara den ben o horidoro. Ma den man no e lasi-ati. Den e waka na Jesus baka te na a presi pe a e tan, èn te a e go na ini na oso, den e waka na en baka go na inisei.
Drape Jesus e aksi: „Oenoe abi bribi taki mi kan doe disi?”
„Ija, Masra”, den e piki nanga foeroe froetrow.
Foe dati ede Jesus e fasi na ai foe den, èn a e taki: „Meki a pasa nanga oenoe soleki fa oenoe e bribi.” Wantronso den kan si! Dan Jesus e froemane den nanga tranga: „Sorgoe taki no wan sma kon sabi disi.” Ma den breiti sote, taki den no e gi jesi na a komando foe Jesus èn na ini a heri kontren den e taki foe en.
A momenti di den man disi e gowe, sma e tjari wan man kon na inisei di wan ogri jeje de na en tapoe. Na ogri jeje meki a man kon babaw, so taki a no man taki. Jesus e poeroe na ogri jeje na a man tapoe, èn wantewante a man e bigin taki. Den ipi sma e froewondroe foe den wondroe disi èn den e taki: „Noiti sma ben si so wan sani ete na Israèl.”
Fariseiman de drape toe. Den no man taki dati den wondroe no doe, ma foe di den no abi bribi foe na ogri fasi foe den ede, meki den e kon baka nanga kragi di abi foe doe nanga pe den krakti wroko foe Jesus komopo. Den e taki: „A e poeroe ogri jeje na sma tapoe nanga jepi foe a tiriman foe den ogri jeje.”
Sjatoe baka di den sani disi pasa, Jesus e drai go baka na en tanpe na Nasaret. A leisi disi den disipel foe en e go makandra nanga en. Wan sani foe wán jari bifo, a ben go na a snoga èn a ben gi leri drape. Ala di den sma biginbigin ben froewondroe foe den switi wortoe foe en, baka ten den ben mandi foe den leri foe en èn den ben proeberi foe kiri en. Foe di Jesus abi sari-ati now, meki a e proeberi baka foe jepi den sma di fosi ben de birtisma foe en.
Na ini tra presi den sma e hari go na Jesus na ipi-ipi, ma soleki fa a sori, dan den no e doe dati djaso. Foe dati ede Jesus e go na Sabadei na a snoga foe gi leri. A moro bigi pisi foe den sma di e arki en, e froewondroe. „Pe a man disi feni a koni disi èn den krakti wroko disi?”, den e aksi. „Disi a no a manpikin foe a temreman? En mama no nen Maria, èn den brada foe en, a no Jakobus nanga Josef nanga Simon nanga Judas? Èn a no ala den sisa foe en de na wi? Pe a man disi feni ala den sani disi dan?”
’Jesus na gewoon wan man foe a foto disi, neleki wi’, den e denki na densrefi. ’Wi ben si fa a ben gro kon bigi, èn wi sabi en famiri. Fa a kan de a Mesias?’ So boen, ala di ala den boeweisi de — a bigi koni foe en nanga den wondroe — tokoe den e weigri foe erken en. Srefi en eigi famiriman e naki foetoe na en, foe di den sabi en so boen, so taki Jesus e kon na a bosroiti taki: „Na ala pe den e gi wan profeiti grani, boiti na ini en eigi kontren èn na mindri den famiriman foe en èn na ini en eigi oso.”
Ija, Jesus e froewondroe foe a mankeri di den e mankeri bribi. Foe dati ede a no e doe no wán wondroe drape, boiti taki a e poti anoe na tapoe wan toe siki sma èn e dresi den. Mateus 9:27-34; 13:54-58; Markus 6:1-6; Jesaja 9:7.
▪ Sortoe bribi den breni man e sori taki den abi, di den e kari Jesus „a Manpikin foe David”?
▪ Sortoe froeklari den Fariseiman e gi ini a tori foe den wondroe di Jesus e doe?
▪ Foe san ede a de sari-ati foe a sei foe Jesus taki a e go baka na Nasaret foe jepi den sma drape?
▪ Fa den e teki Jesus na Nasaret, èn foe san ede?