Kapitel 90

A howpoe na ini wan opobaka

TE FOE KABA Jesus e doro dorosei foe a dorpoe Betania, di de so wan dri kilometer foe Jerusalem. Soso wan toe dei pasa, sensi a dede nanga a beri foe Lasarus. Maria nanga Marta, den sisa foe en, e sari te now ete, èn foeroe sma kon na a oso foe den foe trowstoe den.

Ala di den e sari, wan sma e taigi Marta taki Jesus de na pasi. Foe dati ede a e libi na oso èn e lon go miti en, kande sondro foe taigi en sisa. Te Marta e kon na Jesus, a e taki ete wan tron san en nanga en sisa ben moesoe foe taki foeroe tron kaba na ini den fo dei di pasa: „Efoe joe ben de djaso, dan mi brada no ben o dede.”

Ma Marta e sori taki a e howpoe dati Jesus kande ben sa kan doe wan sani ete gi en brada, ala di a no e taki disi langalanga. „Mi sabi taki ala san joe e aksi Gado, Gado sa gi joe dati”, a e taki.

„Joe brada sa opo baka”, Jesus e pramisi.

Marta e froestan nanga dati taki Jesus e taki foe wan opobaka na grontapoe na ini a ten di e kon, wan sani di Abraham nanga tra foetoeboi foe Gado ben froewakti toe. Foe dati ede a e piki: „Mi sabi taki a sa opo baka na a opobaka na a lasti dei.”

Ma Jesus e gi a howpoe taki a sa gi froelekti wantewante, foe di a e piki: „Mi na a opobaka nanga a libi.” A e memre Marta taki Gado gi en a makti tapoe dede, te a e taki: „A sma di e sori bribi na ini mi, sa kon na libi, awinsi a dede; èn ibri sma di e libi èn e sori bribi na ini mi, kwetikweti no sa dede noiti.”

Jesus no e proeberi foe meki Marta froestan taki getrow sma di e libi na a momenti dati, noiti no sa dede. Nôno, ma san a wani tjari kon na krin, na taki te wan sma e sori bribi na ini en, dan dati kan abi têgo libi leki bakapisi. A moro bigi pisi foe den sma sa njanboen foe a têgo libi disi, foe di den sa kisi wan opobaka na a lasti dei. Ma trawan di de getrow, sa pasa a kaba foe a seti foe sani disi na grontapoe, libilibi, èn gi den, den wortoe foe Jesus sa de troetroe so. Kwetikweti den no sa dede noiti! Baka den toemoesi aparti wortoe disi, Jesus e aksi Marta: „Joe e bribi disi?”

„Ija, Masra”, a e piki. „Mi bribi taki joe na a Krestes, a Manpikin foe Gado, a Sma di kon na grontapoe.”

Dan Marta e lon go teki en sisa, èn te den de den wawan a e froeteri en: „A Leriman dja èn a e kari joe.” Wantewante Maria e libi na oso. Te trawan e si taki a e gowe, dan den e waka na en baka, foe di den e prakseri taki a e go na a memre-grebi.

Te Maria e kon na Jesus, a e fadon na Jesus foetoe, ala di a e krei. „Masra, efoe joe ben de djaso, dan mi brada no ben o dede”, a e taki. Jesus e sari troetroe te a e si taki Maria nanga den ipi sma di kon na en baka, e krei. „Pe oenoe poti en?”, a e aksi.

„Masra, kon èn loekoe”, den e piki.

Jesus ai e lon watra toe, san e meki den djoe e taki: „Loekoe, a ben abi firi foe lobi gi en troetroe!”

Son sma e memre taki, wan toe moen na fesi na a ten foe a Wiwirikampoe-fesa, Jesus ben dresi wan jongoeman di ben gebore breni, èn den e aksi: „A man disi, di ben opo den ai foe a breniman, no ben kan sorgoe taki a sma disi no dede?” Johanes 5:21; 6:40; 9:1-7; 11:17-37.

▪ O ten Jesus e doro krosibei foe Betania te foe kaba, èn sortoe situwâsi a e kon miti drape?

▪ Sortoe reide Marta abi foe bribi na ini wan opobaka?

▪ Sortoe krakti a dede foe Lasarus abi na Jesus tapoe?