Kapitel 112

A lasti Paska foe Jesus de krosibei

TE TOEDEWROKO 11 Nisan e doro en kaba, dan Jesus e tapoe foe gi leri na den apostel na tapoe na Olijfbergi. A dei disi ben de troetroe wan druk dei di e weri skin! Now, kande te den e drai go baka na Betania foe tan a neti drape, a e froeteri den apostel foe en: „Oenoe sabi taki baka toe dei a paska o hori, èn den sa gi a Manpikin foe libisma abra foe den anga en na wan postoe.”

Soleki fa a sori, dan a tra dei, dridewroko 12 Nisan, Jesus e tan nanga den apostel foe en na wan tiri presi. A dei na fesi, a ben piri-ai gi den relisi fesiman na poebliki, èn a sabi taki den e soekoe foe kiri en. Foe dati ede, na dridewroko a no e sori ensrefi foe ala sma si en, foe di a no wani, taki wan sani kon na mindri a hori di a wani hori a Paska nanga den apostel foe en a neti di e kon.

Ma now den granpriester nanga den owroeman foe a pipel kon makandra na ini a fesisei-djari foe a heipriester Kajafas. Foe di a e hati den taki Jesus teki den skin a dei na fesi a wan disi, meki den e seti sani foe graboe en na wan trikifasi èn foe meki den kiri en. Tokoe den e tan taki: „No na a fesa, so taki no wan djoegoedjoegoe no e kon na mindri a pipel.” Den frede a pipel, foe di a pipel lobi Jesus.

Ala di den relisi fesiman e meki ogri-ati plan foe kiri Jesus, wan sma e kon na den. Den e froewondroe taki na wan foe Jesus en eigi apostel, Judas Iskariòt, a sma di Satan ben poti a takroe prakseri na ini en ati foe tori a Masra foe en! Den breiti kefalek, te Judas e aksi: „San oenoe sa gi mi efoe mi tori en gi oenoe?” Den e agri èn den e prisiri foe pai en 30 solfroe moni, a moni di e pai foe wan srafoe soleki fa a skrifi na ini a Wetfroebontoe foe Moses. Sensi a ten dati, Judas e soekoe wan boen okasi foe tori Jesus na den, sondro taki wan ipi sma de na ini en birti.

Dridewroko 13 Nisan e bigin te sondongo. Freida Jesus ben kon foe Jerikow, so boen, disi na a di foe siksi èn lasti neti di a e tan na Betania. A dei di e kon, fodewroko, den moesoe sreka den lasti sani gi a Paska, di e bigin te sondongo. Dati na a ten foe srakti a pikin skapoe foe a Paska foe losi en heriheri. Pe den sa hori a fesa, èn soema sa sreka den sani gi a fesa?

Jesus no froeteri den sortoe tori disi finifini, kande foe tapoe pasi gi Judas foe go taigi den granpriester den sani disi, so taki den kan kisi Jesus te a e hori a Paska. Ma now, kande froekoefroekoe fodewroko bakadina, Jesus e seni Petrus nanga Johanes komoto na Betania, èn a e taigi den: „Go sreka a paska gi wi, so taki wi kan njan en.”

„Pe joe wani foe wi sreka en?”, den e aksi.

„Te oenoe e go na ini a foto,” Jesus e tjari kon na krin, „dan wan man di e tjari wan watrakan nanga watra, sa kon miti oenoe. Waka na en baka go na ini na oso, pe a e go na ini. Èn oenoe moesoe taigi na eiginari foe na oso: ’A Leriman e taigi joe: „Pe a kamra foe den fisitiman de, pe mi nanga mi disipel kan njan a paska na ini?”’ Èn a man dati sa sori oenoe wan bigi kamra na tapoe sodro di abi ala sani na ini. Sreka en drape.”

A no abi misi, taki na eiginari foe na oso na wan disipel foe Jesus di kande e froewakti taki Jesus sa aksi en foe kan gebroiki en oso gi a spesroetoe okasi disi. Awansi fa a no fa, te Petrus nanga Johanes doro na Jerusalem, dan den e feni ala sani neleki fa Jesus ben taki na fesi. So boen, den toe disi e sorgoe taki a pikin skapoe sreka èn taki ala den tra sani seti foe sorgoe gi den sani di den tinadri sma, Jesus nanga den twarfoe apostel foe en di o teki prati na a Paska, abi fanowdoe. Mateus 26:1-5, 14-19; Markus 14:1, 2, 10-16; Lukas 22:1-13; Exodus 21:32.

▪ San Jesus e doe dridewroko, soleki fa a sori, èn foe san ede?

▪ Sortoe konmakandra e hori na ini na oso foe a heipriester, èn nanga sortoe sani na prakseri Judas e go na den relisi fesiman?

▪ Soema Jesus e seni go na Jerusalem fodewroko, èn nanga sortoe sani na prakseri?

▪ San den wan disi di ben seni go, e feni, san e sori agen taki Jesus abi makti foe doe wondroe?