Kapitel 35

A moro barinen taki di oiti ben hori

A SITUWÂSI na wan di warti foe sma memre dati alaten, moro leki iniwan tra situwâsi di de na ini a bijbel historia: Jesus di e sidon na tapoe wan plata sei foe wan bergi, e hori en barinen Bergitaki. A presi no fara foe a Se foe Galilea, kande krosibei foe Kaperna-um. Didjonsro Jesus froekisi twarfoe foe den disipel foe en foe tron apostel, baka di a begi heri neti. Baka dati, nanga den alamala makandra, a e saka kon na a plata presi disi na tapoe a bergi.

Joe ben sa denki taki Jesus ben sa weri srefisrefi now èn taki a ben sa wani sribi pikinso. Ma bigi ipi sma kon, sonwan foe den te foe Judea nanga Jerusalem, di de 100 te 110 kilometer foe drape. Trawan kon te foe a sesjoro foe Tirus nanga Sidon, di de na noordsei. Den kon foe arki Jesus èn foe a dresi den foe den siki foe den. Joe abi sma srefi di ogri jeje, den ogri engel foe Satan, e trobi den.

Te Jesus e saka kon, dan siki sma e kon krosibei foe en foe fasi en, èn a e dresi den alamala. Baka dati, Jesus e kren go kande na wan moro hei presi na tapoe a bergi. Drape a e go sidon èn a e bigin gi leri na den ipi sma di panja tapoe a plata presi na en fesi. Èn prakseri foe disi! Now no wan sma de srefi foe ala den sma di de drape, di e pina foe wan serjoesoe siki!

Den sma angri srefisrefi foe arki a leriman di man doe den wondroe disi di e meki sma e froewondroe. Ma Jesus e hori a taki foe en, moro foeroe gi a boen foe den disipel foe en, di kande e sidon moro krosibei foe en. Ma Mateus nanga Lukas skrifi a taki disi, so taki wi kan njan boen foe en toe.

A tori di Mateus skrifi foe a taki, langa so wan fo tron moro di foe Lukas. Boiti dati, soleki fa Lukas e taki foe a tori, dan wan toe pisi di Mateus ben skrifi, Jesus ben taki na wan tra okasi na ini en diniwroko, soleki fa wi kan si te wi e teki Mateus 6:9-13 gersi Lukas 11:1-4, èn Mateus 6:25-34 nanga Lukas 12:22-31. Tokoe disi no moesoe froewondroe wi. A de krin, taki Jesus ben leri den srefi sani moro leki wán leisi, èn Lukas ben wani foe skrifi sonwan foe den leri disi na ini wan tra situwâsi.

San e meki a taki foe Jesus warti someni, no de a dipi wawan foe san a taki disi wani taki na jejefasi, ma na a makriki fasi nanga a krin fasi toe fa Jesus e pristeri den waarheid disi. A e meki gebroiki foe ondrofenitori di den sma sabi èn a e gebroiki sani di den sma de bekènti nanga den. Na a fasi disi, Jesus e meki taki ala sma di e proeberi foe libi wan moro boen libi di de akroederi a wani foe Gado, kan froestan den prakseri foe en makriki.

Soema de troetroe kolokoe?

Ala sma wani foe de kolokoe. Foe di Jesus e froestan disi, meki a e bigin en Bergitaki nanga a froeteri di a e froeteri soema de troetroe kolokoe. Soleki fa wi kan froestan, dan a tori disi e hari a prakseri foe a bigi poebliki foe en wantewante. Èn tokoe den fosi wortoe foe en, moesoe gersi gi foeroe sma leki wortoe di de kontrari makandra.

San Jesus e taki, de gi den disipel foe en, èn a e bigin taki: „Kolokoe foe oen pôtiwan, bika a kownoekondre foe Gado na foe oenoe. Kolokoe foe oenwan di de nanga angri now, bika oen bere sa kon foeroe. Kolokoe foe oenwan di e krei now, bika oenoe sa lafoe. Kolokoe foe oenwan, te sma no wani si oenoe na ai . . . Prisiri na a dei dati èn djompo, bika, loekoe! a pai di oenoe sa kisi, bigi na hemel.”

Na so Lukas skrifi a bigin foe a taki foe Jesus. Ma soleki fa a tori foe Mateus taki, dan Jesus e taki toe, dati den safri-ati sma, den sari-ati sma, den sma di abi wan soifri ati, nanga den sma di lobi vrede, na den sma di de kolokoe. Den sma disi de kolokoe, na so Jesus e froeteri, foe di den sa kisi grontapoe, foe di Gado sa sori den sari-ati, foe di den sa si Gado, èn foe di sma sa kari den, den manpikin foe Gado.

Ma te Jesus e taki dati wan sma de kolokoe, dan disi no wani taki dati a sma breiti doronomo, leki te wan sma abi prisiri. Troetroe kolokoe e go moro dipi, foe di a abi foe doe nanga te wan sma de tevrede. A de wan firi foe satisfaksi, wan firi taki den froewakti foe a libi kon troe.

So boen, den wan di de troetroe kolokoe, na so Jesus e sori, na den sma di sabi a nowtoe foe den na jejefasi, di e sari foe a sondoe situwâsi di den de na ini, èn di e leri sabi Gado èn e go dini en. Dan, srefi te sma no wani si den na ai noso e froefolgoe den, foe di den e doe a wani foe Gado, tokoe den de kolokoe foe di den sabi taki den e plisi Gado èn taki a sa pai den nanga têgo libi.

Ma foeroe foe den arkiman foe Jesus, e bribi neleki son sma na ini a ten disi, taki wan sma de kolokoe, te a abi en boen èn te a kan njan boen foe prisiri sani. Ma Jesus sabi taki disi no de so. Now a e taki foe sani di de kontrari makandra èn disi moesoe froewondroe foeroe foe den arkiman foe en:

„Heloe foe oenoe, oen goedoeman, bika oenoe abi oen trowstoe dorodoro kaba. Heloe foe oenoe di bere foeroe now, bika oenoe sa de nanga angri. Heloe foe oenoe di e lafoe now, bika oenoe sa sari èn krei. Heloe foe oenoe, te ala sma e taki boen foe oenoe, bika na den sortoe sani disi den fositen tata foe den ben doe nanga den falsi profeiti.”

San Jesus wani taki? Foe san ede a e tjari heloe kon te wan sma abi goedoe, te wan sma e breiti foe feti baka prisiri, èn te wan sma lobi en te sma e prèise en? Disi de so bika, te wan sma abi den sani disi èn e boboi den, dan presi no de ini en libi foe dini Gado, a wan-enkri sani di e gi troetroe kolokoe. Ma Jesus no ben wani taki toe, dati a e meki wan sma kolokoe te a pôti, te a de nanga angri-bere, èn te a e sari. Ma nofo tron den sortoe sma disi, di no abi en so boen, kande e doe wan sani tapoe den leri foe Jesus, èn na so fasi den blesi nanga troetroe kolokoe.

Te Jesus e taki moro fara nanga den disipel foe en, dan a e taki: „Oenoe na a sowtoe foe grontapoe.” Nanga disi, a no wani taki dati den na troetroe sowtoe. Sowtoe de moro foeroe foe sorgoe taki wan sani no e pori. Wan bigi ipi sowtoe ben de krosibei foe na altari foe a tempel foe Jehovah, èn den priester di ben dini drape ben gebroiki en foe sowtoe den ofrandi.

Den disipel foe Jesus na „a sowtoe foe grontapoe”, foe di den abi wan krakti na sma tapoe di e sorgoe taki den no e pori. Ija, a boskopoe di den e meki bekènti, sa meki taki ala sma di e doe wan sani na tapoe, sa tan na libi! Na ini a libi foe den sortoe sma dati, a sa tjari den eigifasi kon leki a hori di wan sma e horidoro, loyaal fasi nanga getrow fasi, èn a e kibri den foe no pori na jejefasi èn na moreel sei.

„Oenoe na a leti foe grontapoe”, Jesus e taigi den disipel foe en. Den no e poti wan lampoe na ondro wan baskita, ma na tapoe wan kandratiki, èn foe dati ede Jesus e taki: „Meki oen leti skèin gi den sma na a srefi fasi.” Den disipel foe Jesus e doe disi foe di den e gi kotoigi na poebliki, èn foe di den de leki heri boen eksempre di e tjari densrefi akroederi bijbel gronprakseri.

Wan hei markitiki gi den bakaman foe en

Den relisi fesiman e si Jesus leki wan sma di no e hori ensrefi na a Wet foe Gado èn no so langa pasa den meki plan srefi foe kiri en. So boen, te Jesus e go doro nanga en Bergitaki, a e tjari kon na krin: „No denki taki mi ben kon foe pori a Wet noso den Profeiti. Mi no ben kon foe pori den, ma foe meki den kon troe.”

Jesus abi bigi lespeki gi a Wet foe Gado èn a e gi tra sma deki-ati foe abi a lespeki dati toe. A e taki srefi: „A sma, foe dati ede, di e pasa wán foe den moro pikin komando disi èn e leri sma na a fasi dati, den sa kari en a ’moro mendriwan’ ini a tori foe a kownoekondre foe hemel”, nanga san Jesus wani taki, dati so wan sma no e kon na ini a Kownoekondre srefisrefi.

Na presi foe Jesus de sondro lespeki gi den Wet foe Gado, a e kroetoe srefi den fasi fa wan sma e tjari ensrefi san e meki taki a sma dati e pasa a Wet. Baka di Jesus taki dati a Wet e taki: „Joe no moesoe kiri”, a e taki moro fara: „Ma mi e taigi oenoe taki ibriwan sma di en ati e tan bron nanga en brada, sa moesoe gi frantiwortoe na fesi kroetoebangi.”

A de troetroe wan serjoesoe sani te wan sma en ati e tan bron nanga wan kompe, èn a kan abi leki bakapisi srefi taki a e kiri a sma. Dati meki Jesus e gi wan eksempre foe sori o fara wan sma sa moesoe go foe doe moeiti foe soekoe vrede. A e leri: „Foe dati ede, te joe e tjari joe [ofrandi] presenti go na a altari èn drape joe e memre taki joe brada abi wan sani teige joe, libi joe presenti drape na fesi na altari èn gowe; soekoe vrede fosi nanga joe brada, èn baka dati, te joe drai kon baka, òfer joe presenti.”

Now Jesus e poti prakseri na tapoe a di foe seibiwan foe den Tin Komando èn a e taki: „Oenoe ben jere taki den ben taki: ’Joe no moesoe doe soetadoe.’” Ma Jesus e kroetoe srefi te wan sma e kweki firi safrisafri foe go doe soetadoe. „Mi e taigi oenoe taki ibriwan sma di e tan loekoe wan oema foe kan abi sekslostoe gi en, na ini en ati a doe soetadoe kaba nanga en.”

Djaso Jesus no e taki nomo foe wan prakseri di wan sma e kisi wan sjatoe momenti foe doe hoeroedoe, ma a e taki foe ’a tan di wan sma e tan loekoe’. Efoe wan sma e tan loekoe na a fasi disi, dan disi e wiki sekslostoe kon di, efoe wan okasi e gi pasi foe dati, kan go so fara taki a sma e doe soetadoe. Fa wan sma kan sorgoe taki disi no e pasa? Foe sori o fara wan sma moesoe go kande, foe sorgoe taki disi no e pasa nanga en, Jesus e taki: „Efoe now joe leti-ai e meki joe naki foetoe, hari en poeroe èn trowe en gowe foe joe. . . . So srefi, efoe joe leti-anoe e meki joe naki foetoe, koti en poeroe èn trowe en gowe foe joe.”

Nofo tron sma de klariklari foe lasi wan troetroe pisi foe den skin di siki, so taki den kan tan na libi. Ma soleki fa Jesus e taki, dan a de srefi moro prenspari foe ’trowe’ ibriwan sani ’gowe’, srefi te a de wan sani di warti leki wan ai noso wan anoe, foe no prakseri èn no doe sani di no de akroederi boen gwenti nanga wet. Noso, na so Jesus e tjari kon na krin, den sa trowe den sortoe sma disi go na ini Gehèna (wan doti-ipi krosibei foe Jerusalem di ben bron alaten), san e agersi têgo pori.

Jesus e taki toe fa wi moesoe handri nanga sma di e hati den firi foe wi noso di e meki wi mandi. „No kakafoetoe gi a sma di ogri”, a e gi leki rai. „Ma efoe wan sma e klapoe joe na joe reti seifesi, dan drai a tra sei gi en toe.” Jesus no wani taki, dati wan sma no moesoe feti gi ensrefi noso gi en osofamiri, te trawan e kon feti nanga den. Wan sma no e klapoe wan trawan nomo foe hati en skin, ma moro foeroe foe afrontoe en. So boen, san Jesus e taki na, te wan sma e soekoe foe bigin wan feti noso foe meki trobi, efoe a e klapoe en troetroe nanga anoe noso foe di a afrontoe a sma nanga wortoe, dan a no ben sa de wan boen sani foe pai ogri nanga ogri.

Baka di Jesus poti prakseri na tapoe a wet foe Gado taki wan sma moesoe lobi a sma na en sei, a e taki: „Ma mi e taigi oenoe: Tan lobi oen feanti èn tan begi gi den sma di e froefolgoe oenoe.” A e gi wan krakti reide foe doe disi, foe di a e taki moro fara: „[So taki] oenoe kan sori taki oenoe na manpikin foe oen Tata di de na hemel, bika a e meki en son opo gi den ogri sma èn gi den boen sma.”

Jesus e tapoe a pisi disi foe a taki foe en, nanga a froemane: „Foe dati ede oenoe moesoe de volmaakti, soleki fa oen hemel Tata de volmaakti.” Jesus no wani taki, dati libisma kan de volmaakti dorodoro. Na presi foe dati, te den e waka baka na eksempre foe Gado, dan den kan meki a lobi foe den kon moro bigi, so taki den kan lobi den feanti foe den toe. Ini a srefi tori disi Lukas e skrifi den wortoe foe Jesus na a fasi disi: „Tan sori sari-ati, soleki fa oen Tata e sori sari-ati.”

Begi, èn froetrow ini Gado

Te Jesus e go moro fara nanga a taki foe en, dan a e kroetoe a hoigri fasi foe sma di e waka na ala sei foe sori trawan taki den abi, san den e kari, wan santa fasi. „Te joe e go foe gi presenti”, a e taki, „no bari en gi ala sma, soleki fa den hoigriman e doe.”

„So srefi”, Jesus e go moro fara, „te oenoe e begi, oenoe no moesoe de leki den hoigriman; bika den lobi foe tanapoe e begi na ini den snoga èn na tapoe den oekoe foe den bradi pasi, so taki sma kan si den.” A e leri den na presi foe dati: „Te joe e begi, go na ini joe inisei kamra, èn baka te joe sroto joe doro, begi na joe Tata di de pe wi no kan si en.” Jesus srefi ben begi na poebliki, so boen, a no e kroetoe dati. San a e kroetoe, na begi di sma e begi foe meki arkiman loekoe na den nanga froewondroe èn te den e soekoe foe sma prèise den nanga switi wortoe.

Moro fara Jesus e gi leki rai: „Te oenoe e begi, no taki densrefi sani ibri tron baka, soleki fa den sma foe den nâsi e doe.” Jesus no wani taki, dati a no boen foe taki sani ibri tron baka. Wán leisi, Jesus srefi ben gebroiki „a srefi wortoe” ibri tron baka di a ben begi. Ma san en no feni boen na te wan sma „ibri tron baka” e taki den wortoe di a sma leri na ede, soleki fa den sma e doe di e meki klara keti waka pasa den finga foe den, te den e taki den begi foe den ibri tron baka.

Foe jepi den arkiman foe en foe begi, meki Jesus e gi wan modelbegi di abi seibi fajafaja begi na ini. Den fosi dri begi e erken nanga reti a soevereiniteit foe Gado nanga den sani di a abi na prakseri. Den na begi di e aksi taki Gado nen moesoe kon santa, taki en Kownoekondre moesoe kon èn taki en wani moesoe doe. Den tra fo begi na persoonlijk aksi, dati wani taki, foe feni aladei njanjan, foe kisi pardon foe sondoe, foe no kisi tesi pasa san wan sma man froedrage, èn foe kisi froeloesoe foe na ogriwan.

Jesus e go doro foe taki foe a trapoe di wan sma kan kon na ini, te a sma dati e poti toemoesi foeroe krakti na tapoe materia goedoe. A e gi deki-ati: „No tjari goedoe foe grontapoe moro kon makandra gi oensrefi, pe motoe nanga froestoe e pori den, èn pe foefoeroeman e broko oso èn foefoeroe den.” Den sortoe goedoe disi no wawan na sani di kan lasi gowe, ma den no e meki wan sma kisi wan boen nen na Gado foe a wroko di a sma dati doe gi En.

Dati meki Jesus e taki: „Na presi foe dati, tjari goedoe na hemel kon makandra gi oensrefi.” Joe kan doe disi foe di joe e poti a diniwroko foe Gado na a fosi presi ini joe libi. No wan sma kan foefoeroe a boen nen di wi kisi na Gado foe a wroko di wi doe gi en noso a bigi pai di wi e kisi foe dati. Dan Jesus e taki moro fara: „Pe joe goedoe de, na drape joe ati sa de toe.”

Jesus e taki moro fara foe a trapoe di wan sma kan kon na ini, foe di a sma lobi goedoe, èn a e gi na agersitori disi: „A lampoe foe a skin na a ai. Foe dati ede, efoe joe ai soifri, dan joe heri skin sa de wan leti; ma efoe joe ai takroe, dan joe heri skin sa doengroe.” Wan ai di e wroko boen, de gi a skin leki wan lampoe di leti na ini wan doengroe presi. Ma foe kan si boen, na ai moesoe de soifri, dati wani taki, a moesoe loekoe go na wán sani nomo. Wan ai di no man si sani soifri, e meki wan sma doe wan lo fowtoe sani, e poti materia afersi fosi a diniwroko foe Gado, èn a bakapisi de, taki a „heri skin” e kon doengroe.

Jesus e tjari na afersi disi go na wan heimarki nanga a krakti agersitori: „No wan sma kan dini toe masra leki srafoe, bika efoe a no sa wani si a wan na ai, dan a sa lobi a trawan, noso efoe a sa tai hori a wan, dan a sa tegoe foe a trawan. Oenoe no kan dini Gado nanga Goedoe na a srefi ten leki srafoe.”

Baka di Jesus gi a rai disi, a e gi den arkiman foe en a djaranti taki, efoe den e poti a diniwroko foe Gado na a fosi presi, dan den no abi foe broko den ede nanga den materia sani di den abi fanowdoe. „Loekoe den fowroe foe hemel boen,” a e taki, „bika den no e sai noso e koti kibri noso e tjari sani kon makandra na ini maksin; tokoe oen hemel Tata e gi den njanjan.” Dan a e aksi: „Oenoe no warti moro leki den disi?”

Baka dati, Jesus e sori go na tapoe den leili foe a sabana èn e taki, dati „srefi Salomo na ini ala en glori no ben weri so moi leki wán foe den disi. Efoe now”, na so a e go moro fara, „Gado e meki den bromki foe sabana weri so moi, . . . a no sa meki oenoe weri moro moi dan, oen sma, di abi so pikinso bribi?” Dati meki Jesus e tapoe nanga den wortoe: „No broko oen ede noiti èn no taki: ’San wi sa njan?’ noso: ’San wi sa dringi?’ noso: ’San wi sa weri?’ . . . Bika oen hemel Tata sabi taki oenoe abi ala den sani disi fanowdoe. Foe dati ede, tan soekoe fosi a kownoekondre nanga en regtfardiki fasi, èn ala den tra sani disi oenoe sa kisi na tapoe.”

A pasi foe kisi libi

Foe waka a pasi foe kisi libi, wani taki foe tan waka akroederi den leri foe Jesus. Ma disi a no wan makriki sani foe doe. Den Fariseiman, foe eksempre, meki en wan gwenti foe kroetoe tra sma na wan ogri-ati fasi, èn kande foeroe sma e waka baka na eksempre foe den. Foe dati ede, te Jesus e go doro nanga en Bergitaki, a e gi den a froemane disi: „Tapoe foe kroetoe tra sma, so taki den no sa kroetoe oenoe; bika nanga a kroetoe di oenoe e kroetoe sma, nanga dati den sa kroetoe oenoe.”

A de wan ogri sani foe waka baka na eksempre foe den Fariseiman di e kroetoe sma pasa marki foe feni fowtoe na den nomonomo. Soleki fa a tori foe Lukas e taki, dan Jesus e gi wan eksempre foe sori tapoe a kefar foe disi, te a e taki: „Wan breni man no kan tjari wan tra breni man, a no so? Den ala toe sa fadon go na ini wan olo, a no so?”

A de wan serjoesoe fowtoe, te wan sma e kroetoe trawan toemoesi foe kan feni fowtoe na den nomonomo, noso te a e meki den fowtoe foe sma sori moro bigi leki san den de, noso te a e kroetoekroetoe den foe pikinpikin sani ede. Dati meki Jesus e aksi: „Fa joe kan taigi joe brada: ’Meki mi poeroe a pikin drei grasi na ini joe ai’, te, loekoe! wan barki de na ini joe eigi ai? Hoigriman! Poeroe fosi a barki foe joe eigi ai, èn dan joe sa si krin fa joe kan poeroe a pikin drei grasi na ini na ai foe joe brada.”

Disi no wani taki dati den disipel foe Jesus no moesoe gebroiki a koni foe si sani krin, te den e kisi foe doe nanga tra sma, bika a e taki: „No gi wan santa sani na den dagoe, èn no trowe den peri foe oenoe gi den agoe.” Den waarheid foe a Wortoe foe Gado na santa sani. Den de leki agersi peri. Ma efoe son sma, di de leki dagoe noso agoe, no e warderi den diri waarheid disi, dan den disipel foe Jesus moesoe libi den sma dati èn soekoe sma di de klariklari foe arki a waarheid èn foe teki en.

Na a bigin foe en Bergitaki Jesus taki foe a begi kaba, ma now a e poti krakti na tapoe a fanowdoe di a de fanowdoe foe tan horidoro. „Tan aksi”, a e gi deki-ati, „èn oenoe sa kisi.” Foe sori fa Gado de klariklari foe gi piki na tapoe begi, Jesus e aksi: „Soema foe oenoe, di, te a manpikin foe en e aksi en foe brede, sa gi en wan ston? . . . Dati meki, efoe oenoe, ala di oenoe ogri, sabi fa foe gi boen presenti na oen pikin, dan omeni moro oen Tata, di de na hemel, sa gi boen sani na den sma di e aksi en foe dati?”

Dan Jesus e froeteri foe wan markitiki di abi foe doe nanga fa sma moesoe tjari densrefi. A markitiki disi kisi barinen èn sma gwenti foe kari en a Gowtoe Lin. A e taki: „Ala sani, foe dati ede, di oenoe wani foe sma doe gi oenoe, oenoe moesoe doe gi den toe.” Foe libi akroederi a lin disi, wani taki wan positief fasi foe doe boen gi tra sma, èn foe handri nanga den na a fasi fa joe wani taki den moesoe handri nanga joe.

Taki a no de makriki foe waka a pasi foe kisi libi, e kon na krin ini den leri di Jesus e gi: „Pasa go na ini a smara doro; bika bradi èn bigi a pasi de di e tjari sma go na pori, èn foeroe sma de di e pasa go na ini; ma smara a doro de èn smara a pasi de di e tjari sma go na libi, èn pikinso sma de di e feni en.”

A kefar bigi, taki sma kan kori wi, èn foe dati ede Jesus e warskow: „Loekoe boen nanga den falsi profeiti, di e kon na oenoe na ini skapoeboeba, ma na inisei den de krasi tigri.” Neleki fa wan sma kan kon sabi boen nanga takroe bon na den froktoe foe den, Jesus e taki, na so wan sma kan kon sabi falsi profeiti na a fasi fa den e tjari densrefi èn na den leri foe den.

Moro fara Jesus e tjari kon na krin, taki a no soso san wan sma e taki e meki a tron En disipel, ma san a e doe. Son sma e taki dati Jesus na a Masra foe den, ma efoe den no e doe a wani foe en Tata, dan a e taki: „Mi sa taigi den na poebliki, taki: Mi no ben sabi oenoe noiti! Oen komoto na mi fesi, oen wrokoman foe kroektoedoe.”

Te foe kaba, Jesus e tapoe a taki foe en nanga den wortoe disi di warti foe sma memre den alaten. A e taki: „Ibriwan sma di e jere den wortoe disi foe mi èn e doe den, den sa teki en gersi wan koni man, di ben bow en oso na tapoe a klipston. Èn alen ben fadon kon, den froedoe ben kon, den winti ben wai èn ben naki na oso dati, ma a no ben fadon, bika a ben bow na tapoe a klipston.”

Na a tra sei, Jesus e froeklari: „Ibriwan sma di e jere den wortoe disi foe mi èn no e doe den, den sa teki en gersi wan don man, di ben bow en oso na tapoe santi. Èn alen ben fadon kon, den froedoe ben kon, den winti ben wai èn ben naki na oso dati èn a ben fadon, èn a fadon foe en ben bigi.”

Te Jesus kaba nanga a taki foe en, na ipi sma e froewondroe foe a fasi fa a e gi leri, bika a e gi den leri leki wan sma di abi makti èn no leki den relisi fesiman foe den. Lukas 6:12-23; Mateus 5:1-12; Lukas 6:24-26; Mateus 5:13-48; 6:1-34; 26:36-45; 7:1-29; Lukas 6:27-49.

▪ Pe Jesus de, te a e hori en taki di warti foe sma memre dati alaten, soema drape, èn san pasa leti bifo a e hori a taki foe en?

▪ Foe san ede a no de wan froewondroe sani taki Lukas e skrifi son wan foe den leri foe a taki na ini wan tra situwâsi?

▪ San e meki a taki foe Jesus warti someni?

▪ Soema de troetroe kolokoe, èn foe san ede?

▪ Soema e kisi heloe, èn foe san ede?

▪ Fa den disipel foe Jesus na „a sowtoe foe grontapoe” nanga „a leti foe grontapoe”?

▪ Fa Jesus e sori taki a abi bigi lespeki gi a Wet foe Gado?

▪ Sortoe leri Jesus e gi foe poeroe a roetoe foe den sani di e meki sma e kiri trawan èn e meki den doe soetadoe?

▪ San Jesus wani taki, te a e taki foe a drai di wan sma moesoe drai en tra seifesi gi wan trawan?

▪ Fa wi kan de volmaakti, soleki fa Gado de volmaakti?

▪ Sortoe leri Jesus e gi ini a tori foe begi?

▪ Foe san ede goedoe foe hemel moro boen, èn fa wi kan kisi den?

▪ Sortoe agersitori e gi foe jepi wan sma tan farawe foe a lobi foe goedoe?

▪ Foe san ede Jesus e taki dati wi no abi foe broko wi ede nanga sani?

▪ San Jesus e taki foe a kroetoe di sma e kroetoe trawan, ma fa a e sori, taki den disipel foe en moesoe gebroiki a koni foe si sani krin te den e kisi foe doe nanga tra sma?

▪ San Jesus e taki moro fara ini a tori foe begi, èn sortoe lin a e gi ini a tori foe a fasi fa sma moesoe tjari densrefi?

▪ Fa Jesus e sori taki a pasi foe kisi libi no ben sa de makriki èn taki a kefar de taki sma kan kori wi?

▪ Fa Jesus e tapoe a taki foe en èn sortoe krakti a taki disi abi na tapoe sma?