A pikin foe wan pramisi
Kapitel 6
A pikin foe wan pramisi
NA PRESI foe Josef nanga Maria go baka na Nasaret, den e tan na Betlehem. Èn te Jesus abi aiti dei, den e meki den besnij en, soleki fa a Wet e komanderi di Gado ben gi Moses. Soleki fa a sori, a de a gwenti toe taki wan njoen-gebore boi e kisi en nen na a di foe aiti dei. So boen, den e kari a pikin foe den Jesus, soleki fa na engel Gabrièl ben taigi den na fesi kaba.
Moro leki wan moen e pasa. Jesus abi now 40 dei. Pe en papa nanga mama e tjari en go now? Na a tempel na Jerusalem, di de soso wan toe kilometer foe pe den e tan. Leki fa a Wet e taki, di Gado ben gi Moses, dan 40 dei baka di wan mama kisi wan manpikin, a de froeplekti foe pristeri wan ofrandi na ini a tempel foe krin ensrefi.
Dati na san Maria e doe. Leki ofrandi a e tjari toe pikin fowroe. Disi e sori wi fa na ekonomia situwâsi foe Josef nanga Maria ben de. A Wet foe Moses e sori taki wan mama ben moesoe òfer wan jongoe manskapoe di abi moro waarde leki fowroe. Ma efoe a mama no ben man pai disi, dan toe stondoifi noso toe osodoifi ben sa nofo.
Na ini a tempel wan owroe man e teki Jesus na ini en anoe. A nen Simeon. Gado tjari kon na krin gi en taki a no sa dede bifo a si a Krestes, noso a Mesias di Jehovah ben pramisi. Te Simeon e kon na ini a tempel a dei disi, dan santa jeje e tjari en go na a pikin di Josef nanga Maria abi na den.
Ala di Simeon e hori Jesus na ini en anoe, a e gi Gado tangi èn a e taki: „Now, Soeverein Masra, joe e meki joe foetoeboi go ini vrede soleki fa joe ben meki bekènti; bika mi eigi ai si joe wrokosani foe tjari a froeloesoe kon di joe sreka na fesi foe den ai foe ala sma, wan leti di sa teki a doekoe poeroe foe den nâsi èn wan glori foe joe pipel Israèl.”
Josef nanga Maria e froewondroe te den e jere disi. Ne Simeon e blesi den èn a e taigi Maria taki en manpikin „poti foe a fadon èn na opobaka foe foeroe sma na Israèl” èn taki sari sa boro a sili foe Maria, leki wan srapoe feti-owroe.
Na oema-profeiti Ana, di abi 84 jari, de drape na a okasi disi. Foe taki en leti, noiti a e mankeri na ini a tempel. Na ini a srefi joeroe dati, a e kon krosibei èn a e bigin taki Gado tangi èn ala sma di wani arki, a e froeteri foe Jesus.
Josef nanga Maria e froewondroe troetroe foe den sani disi di e pasa na ini a tempel! A no de foe taki, dati ala den sani disi de wan boeweisi gi den taki a pikin na a Sma di Gado ben pramisi. Lukas 2:21-38; Lefitikus 12:1-8.
▪ Soleki fa a sori, dan o ten a ben de a gwenti foe gi wan njoen-gebore Israèl boi en nen?
▪ San wan mama foe Israèl ben de froeplekti foe doe te a manpikin foe en ben abi 40 dei, èn san a tori disi e sori wi foe na ekonomia situwâsi foe Maria?
▪ Soema na den sma di na a okasi disi, e erken a sma di Jesus de, èn fa den e sori disi?