Kapitel 33

A profeititori foe Jesaja e kon troe

BAKA DI Jesus kon sabi taki den Fariseiman nanga den partèiman foe Herodes e meki plan foe kiri en, en nanga den disipel foe en e go na a Se foe Galilea. Djaso bigi ipi sma foe heri Palestina, èn srefi foe presi dorosei foe Palestina, e kon na en na ipi-ipi. A e dresi foeroe sma, èn disi abi leki bakapisi taki ala sma di abi wan hebi siki, e poesoe densrefi go na fesi foe kan fasi en.

Foe di den ipi bigi so, meki Jesus e taigi den disipel foe en foe abi wan boto na den di a kan gebroiki alaten. Foe di a e poeroe gowe pikinso foe sjoro, meki a kan tapoe na ipi foe no poesoe kon na en tapoe. A kan gi den leri ala di a de na ini a boto noso a kan waka go na wan tra kontren sei a sjoro foe jepi sma drape.

A disipel Mateus e taki, dati nanga den sani di Jesus e doe, e kon troe „san a profeiti Jesaja ben taki”. Dan Mateus e teki a profeititori skrifi di Jesus e meki kon troe:

„Loekoe! Mi foetoeboi di mi ben froekisi, mi lobiwan, di mi sili ben feni boen! Mi sa poti mi jeje na en tapoe, èn a sa tjari kon na krin gi den nâsi san na retidoe. A no sa meki trobi, èn a no sa bari tranga toe, èn no wan sma sa jere en sten toe na tapoe den bradi pasi. Wan ken di broko a no sa masi èn wan kokolampoe di a faja foe en e soekoe foe dede a no sa kiri, te leki a seni retidoe kon nanga boen bakapisi. Foe troe, na tapoe en nen den nâsi sa howpoe.”

A no de foe taki, dati Jesus na a lobi foetoeboi di Gado feni boen. Èn Jesus e tjari kon na krin san na a troetroe retidoe, di no de krin foe si foe den gwenti foe a falsi relisi ede. Foe di den Fariseiman na wan onregtfardiki fasi, no e hori densrefi na a wet foe Gado, meki den no sa kon jepi wan sikiman srefi na Sabadei! Foe di Jesus e tjari kon na krin san na a retidoe foe Gado, dan a e froeloesoe sma foe a hebi foe onregtfardiki gwenti, èn foe a sani disi ede den relisi fesiman e proeberi foe kiri en.

San a wani taki dati ’a no sa meki trobi, èn a no sa opo en sten toe foe sma jere en na tapoe den bradi pasi’? We, te Jesus e dresi sma, dan ’a e taigi den nanga tranga foe no taki foe en na poebliki’. A no wani, taki sma moesoe bariwroko foe en na strati, noso taki nanga bigi prisiri sma moesoe panja tori foe en di den drai poti tra fasi.

So srefi, Jesus e tjari en boskopoe, di e gi trowstoe, go na sma di na wan agersi fasi de leki wan broko ken, di broko na toe èn di sma waka na en tapoe. Den de leki wan kokolampoe di a faja foe en e soekoe foe dede èn pe pikinmoro libi no de na ini den moro. Jesus no e masi a broko ken noso e kiri a smoko kokolampoe di e soekoe foe dede. Ma na wan safoe fasi èn nanga lobi a e opo den safri-ati sma na wan koni fasi. Ija, Jesus na a sma di den nâsi kan howpoe na tapoe! Mateus 12:15-21; Markus 3:7-12; Jesaja 42:1-4.

▪ Fa Jesus e sori krin san na retidoe, sondro foe a meki trobi noso foe opo en sten na tapoe den bradi pasi?

▪ Soema de leki wan broko ken èn wan kokolampoe, èn fa Jesus e handri nanga den?