Kapitel 77

A tori di ben abi foe doe nanga wan famiri goedoe

A DE krin taki den sma sabi taki Jesus ben e njan na ini na oso foe wan Fariseiman. Foe dati ede den e kon makandra na doesoendoesoen èn den e wakti te leki Jesus e kon na doro. Tra fasi leki den Fariseiman di e gens Jesus èn di e proeberi foe kisi en taki a taki wan fowtoe sani, den sma e arki en nanga prisiri èn nanga warderi.

Ala di Jesus e drai loekoe den disipel foe en fosi, a e taki: „Kibri oensrefi gi a sroedeki foe den Fariseiman, san na hoigrifasi.” Soleki fa a ben kon na krin di den ben njan, dan a heri relisi sistema foe den Fariseiman lai nanga hoigrifasi. Ma ala di na ogridoe foe den Fariseiman kibri gi ai kande, foe di wan fromsoefasi e tapoe dati, tokoe a sa tjari kon na krin te foe kaba sortoe sma na den troetroe. „No wan sani no de di kibri so boen gi ai”, Jesus e taki, „di no sa tjari kon na krin, èn di kibri di no sa kon de bekènti.”

Jesus e taki ete wan tron foe a deki-ati di a ben gi na den twarfoe disipel, di a ben seni den go na wan preikiwaka na Galilea. A e taki: „No frede den sma di e kiri a skin èn baka dati no kan doe noti moro.” Foe di Gado no e frigiti no wan enkri pikin fowroe srefi, meki Jesus e gi den bakaman foe en a djaranti taki Gado no sa frigiti den. A e taki: „Te den e tjari oenoe go na fesi foe poebliki konmakandra nanga lantiman nanga tiriman, . . . dan a santa jeje sa leri oenoe sortoe sani oenoe moesoe taki.”

Wan man na ini na ipi e opo en sten taki. „Leriman,” na so a e begi en, „taigi mi brada taki a moesoe prati a famiri goedoe nanga mi.” A Wet foe Moses e taki dati a fosi gebore manpikin abi a reti foe kisi toe pisi foe a famiri goedoe, èn foe dati ede no wan reide no moesoe de foe meki wan kesekese kon. Ma soleki fa a sori, dan a man wani kisi moro foe a famiri goedoe leki san a wet e taki.

Nanga leti Jesus e weigri foe go boemoei nanga a tori. „ Joe man, soema poti mi leki kroetoeman noso wan sma di e prati sani na mindri oenoe?”, a e aksi. Dan a e gi na ipi sma a prenspari froemane disi: „Loekoe boen èn kibri oensrefi gi ibri sortoe gridifasi, bika awinsi wan sma abi goedoe pasa marki, a no e kisi en libi foe den sani di a abi.” Ija, awinsi omeni sani wan sma kan tjari kon na makandra toe, wan dei a sa dede èn libi ala sani na baka. Foe poti krakti na tapoe a tori disi èn foe sori dati a de wan don sani foe no bow wan boen nen na Gado, meki Jesus e gebroiki wan agersitori. A e tjari kon na krin:

„A gron foe wan seiker goedoeman ben gi foeroe njanjan. Foe dati ede a ben bigin denki na ensrefi: ’San mi sa doe, now di mi no abi no wan pe foe tjari a njanjan di mi koti kon makandra na wan presi?’ A ben taki so boen: ’Mi sa doe disi: Mi sa broko den maksin foe mi trowe èn bow moro bigi wan, èn drape mi sa poti ala mi karoe nanga ala mi boen sani na ini; èn mi sa taigi mi sili: „Sili, joe abi foeroe boen sani gi foeroe jari ete; no broko joe ede nanga noti, njan, dringi èn meki prisiri.”’ Ma Gado ben taigi en: ’Joe onreidelek sma, a neti disi ete den e aksi joe sili foe joe. Dan soema sa kisi den sani di joe ben tjari kon na makandra?’”

Jesus e tapoe nanga den wortoe: „Na so a e go nanga a sma di e tjari goedoe kon na makandra gi ensrefi, ma di no goedoe ini a tori foe Gado.” Ala di den disipel kande no fadon ini a trapoe foe de so don foe tjari foeroe goedoe kon na makandra, tokoe den aladei broko-ede foe a libi ben kan tjari den makriki go na wan seipasi. Dan den no ben sa dini Jehovah moro nanga den heri sili. Foe dati ede Jesus e gebroiki na okasi disi foe taki ete wan tron foe a moi rai di a ben gi na ini a Bergitaki, so wan wán nanga afoe jari bifo. A e drai loekoe den disipel foe en, èn a e taki:

„Foe dati ede mi e taigi oenoe: No broko oen ede moro nanga oen sili ini a tori foe san oenoe sa njan noso nanga oen skin ini a tori foe san oenoe sa weri. . . . Loekoe den blaka fowroe finifini, taki den no e sai èn den no e koti njanjan èn den no abi maksin noso kamra foe poti njanjan, èn tokoe Gado e gi den njanjan. . . . Loekoe finifini fa den lelie e gro; den no e wroko tranga èn den no e meki krosi; ma mi e taigi oenoe: Srefi Salomo na ini ala en glori no ben weri so moi leki wán foe den disi. . . .

Foe dati ede, kaba soekoe san oenoe sa njan èn san oenoe sa dringi, èn no broko oen ede moro nanga san sa kon; bika ala den sani disi na sani di den nâsi foe grontapoe e feti fajafaja na dati baka, ma oen Tata sabi taki oenoe abi den sani disi fanowdoe. Foe dati ede, tan soekoe en kownoekondre alaten èn den sani disi oenoe sa kisi na tapoe.”

Spesroetoe na ini ten di moeilek na ekonomia sei, a boen foe hori den wortoe foe Jesus boen na prakseri. A sma di e broko en ede toemoesi nanga den materia sani di a abi fanowdoe èn di bigin e doe en safrisafri ini a tori foe sani na jejefasi, e sori troetroe taki a no e poti bribi na ini a man di Gado man foe sorgoe gi den sani di den foetoeboi foe En abi fanowdoe. Lukas 12:1-31; Deuteronomium 21:17.

▪ Foe san ede a man e poti aksi kande di abi foe doe nanga wan famiri goedoe, èn sortoe froemane Jesus e gi?

▪ Sortoe agersitori Jesus e gebroiki, èn sortoe sani a e tjari kon na krin?

▪ Sortoe rai Jesus e gi ete wan tron, èn foe san ede a rai dati fiti?