Kapitel 86

A tori foe wan manpikin di ben lasi

DIDJONSRO Jesus kaba froeteri den Fariseiman den agersitori foe a feni di sma feni wan skapoe baka di ben lasi, èn foe wan moni foe wan drakmo di ben lasi, èn now a e go doro nanga wan tra agersitori. A wan disi abi foe doe nanga wan lobi-ati papa èn a fasi fa a e handri nanga den toe manpikin foe en, di ala toe abi serjoesoe fowtoe.

Fosi, joe abi a moro jongoe manpikin, a moro prenspari sma na ini na agersitori. A e aksi a pisi foe en foe a famiri goedoe, di en papa e gi en wantewante. Dan a e gowe libi oso èn e bigin libi wan toemoesi takroe hoeroedoe libi. Ma arki te Jesus e froeteri a tori, èn loekoe efoe joe kan si soema den sma e prenki.

„Wan seiker sma”, na so Jesus e bigin, „ben abi toe manpikin. Èn a moro jongoewan foe den ben taigi en papa: ’Papa, gi mi a pisi foe a goedoe di mi moesoe kisi.’ Ne [a papa] ben prati den sani foe en di a abi fanowdoe foe tan na libi, gi den.” San a moro jongoe manpikin disi e doe nanga san a e kisi?

„Bakaten,” na so Jesus e tjari kon na krin, „no foeroe dei na baka, a moro jongoe manpikin ben tjari ala sani kon makandra èn ben teki waka go na wan farawe kondre, èn drape a ben froemorsoe a goedoe foe en, foe di a ben libi wan jajo libi.” Foe taki en leti, a e froemorsoe en moni, foe di a e libi nanga motjo. Dan moeilek ten e doro, soleki fa Jesus e froeteri moro fara:

„Di a ben froemorsoe ala sani, wan hebi angriten ben kon ini a heri kondre dati, èn a [manpikin] ben bigin pina. A ben go joeroe ensrefi na wan foe den borgoe foe a kondre dati srefi èn a sma dati ben seni en go na en gron foe go loekoe agoe. Èn nofo tron a ben angri foe njan den redi bonki di den agoe ben e njan, èn no wan sma ben gi en wan sani.”

A ben de troetroe wan lagi sani gi en taki a ben moesoe go loekoe agoe, foe di, soleki fa a Wet ben taki, den meti disi ben de meti di no krin! Ma san ben hati a manpikin moro ete, ben de na angribere foe en, di ben tjari en srefi go so fara, taki a ben wani a njanjan di ben gi na den agoe. Foe a bigi rampoe disi ede di ben kon na en tapoe, na so Jesus ben taki, meki „a ben kisi en srefi”.

Te Jesus e go doro nanga a tori foe en, a e tjari kon na krin: „A ben taki [na ensrefi]: ’Omeni wrokoman di mi papa joeroe, abi brede pasa marki, ala di mi e dede dja foe angri! Mi sa opo èn teki waka go na mi papa èn taigi en: „Papa, mi sondoe na hemel èn na joe. Mi no warti moro foe joe kari mi joe pikin. Meki mi leki wán foe joe wrokoman di joe joeroe.”’ Foe dati ede a ben opo èn ben go na en papa.”

Prakseri pikinso foe san e kon now: Efoe en papa ati ben kon bron srefisrefi nanga en èn a ben bari en di a ben gowe libi oso, dan kande a manpikin no ben sa sabi so boen san a ben moesoe doe. Dan kande a ben sa teki a bosroiti foe gowe baka èn proeberi foe feni wroko na wan tra presi ini a kondre foe en, so taki a no ben sa abi foe si en papa. Ma a sani dati no ben kon ini en prakseri. A ben wani de na oso!

A de krin, taki a papa na ini Jesus agersitori e prenki wi lobi-ati èn sari-ati hemel Tata, Jehovah Gado. Èn kande joe e froestan toe, taki a manpikin di ben lasi, e prenki den takroe barinen sondari. Den Fariseiman, di Jesus e taki nanga den, kroetoe Jesus kaba foe feni fowtoe na en, foe di a ben njan nanga den sma disi srefi. Ma soema a moro owroe manpikin e prenki?

Te den feni a manpikin di ben lasi

Fa den e teki a manpikin di ben lasi, na ini na agersitori foe Jesus, te a e drai go baka na a oso foe en papa? Arki te Jesus e froeteri a tori:

„Ala di a ben de farawe ete, en papa ben si en èn ben sari en èn lon go na en èn brasa en èn bosi en na wan safoefasi.” Disi na troetroe wan sari-ati papa di ben abi so wan waran ati, wan toemoesi moi prenki foe wi hemel Tata, Jehovah!

Kande a papa ben jere foe a jajo libi foe en manpikin. Tokoe a e bari en wan switikon na ini en oso sondro foe meki a froeteri finifini fosi san pasa. Jesus abi so wan switifasi toe, foe di en fosi e go na den sondari nanga den belastingman, di a manpikin di ben lasi na ini na agersitori e prenki.

A troe, taki a papa na ini na agersitori foe Jesus, di abi a koni foe si sani krin, sondro degedege e kon sabi pikinso foe a berow foe en manpikin, foe di a papa e si a sari fesi foe en te a e drai kon baka. Ma foe di a papa fosi ben waka go miti en na wan lobi-atifasi, meki a de moro makriki gi a manpikin foe taki foe den sondoe foe en, soleki fa Jesus e froeteri: „Ne a manpikin taigi en: ’Papa, mi sondoe na hemel èn na joe. Mi no warti moro foe joe kari mi joe manpikin. Meki mi tron wán foe joe wrokoman di joe joeroe.’”

Ma den wortoe disi no komoto boenboen ete na den mofoboeba foe a manpikin, èn en papa e bigin doe sani, foe di a e gi den srafoe foe en a komando: „Doe esi! Go teki wan langa krosi kon, a moro boenwan, èn weri en gi en, èn weri wan linga na en anoe èn sandaal na en foetoe. Èn tjari a fatoe jongoe kaw kon, srakti dati èn meki wi njan èn prisiri, bika a manpikin foe mi disi ben dede èn a kon na libi baka; a ben lasi èn mi ben feni en baka.” Dan den e bigin „foe meki prisiri”.

Ma now a papa en „moro owroe manpikin ben de na gron”. Loekoe efoe joe kan kon sabi soema a e prenki, te joe e arki a tra pisi foe a tori. Jesus e taki foe a moro owroe manpikin: „Di a ben drai kon baka èn ben doro krosibei foe na oso, dan a ben jere a babari foe pokoe èn foe sma di e dansi. Foe dati ede a ben kari wan foe den foetoeboi kon na en èn a ben aksi san disi ben wani taki. A ben taigi en: ’Joe brada kon, èn joe papa ben srakti a fatoe jongoe kaw, foe di a ben kisi en baka na ini boen gosontoe.’ Ma [a manpikin] en ati ben kon bron srefisrefi, èn a no ben wani go na inisei. Ne en papa ben kon na doro èn ben begi en nomonomo foe kon na inisei. A ben piki en papa: ’Loekoe, someni jari mi dini joe kaba leki srafoe èn noiti ete mi pasa joe gebod, èn tokoe noiti ete joe ben gi mi wan man-bokoboko, so taki mi ben kan meki prisiri nanga mi mati. Ma so esi di a manpikin foe joe disi ben doro, di, makandra nanga den hoeroe-oema, ben njan joe sani di joe abi fanowdoe foe tan na libi, dan joe ben srakti a fatoe jongoe kaw gi en.’”

Soema a kroetoe, neleki a moro owroe manpikin, te sma e sori sari-atifasi gi sondari èn te prakseri e poti na den tapoe? A no den leriman foe Wet nanga den Fariseiman? A kroetoe di den ben kroetoe Jesus foe feni fowtoe na en, bika a ben bari den sondari wan switikon, ben meki taki a ben gi na agersitori disi, èn dati meki a de krin, taki na den moesoe de den sma di a moro owroe manpikin e prenki.

Jesus e tapoe a tori foe en nanga den wortoe di a papa e gebroiki foe proeberi foe meki en moro owroe manpikin kisi wan tra prakseri: „Mi pikin, alaten joe ben de na mi, èn ala sani san na foe mi, na foe joe; ma wi ben moesoe meki prisiri èn breiti, bika a brada foe joe disi ben dede èn a ben kon na libi, èn a ben lasi èn mi ben feni en baka.”

So boen, Jesus e libi a tori so sondro foe sori san a moro owroe manpikin e doe te foe kaba. Ija, bakaten, baka a dede nanga na opobaka foe Jesus, „wan bigi ipi priester ben bigin gi jesi na a bribi”, kande makandra nanga wan toe foe a „moro owroe manpikin”-groepoe disi di Jesus ben taki nanga den dja.

Ma soema den toe manpikin e prenki na ini a ten disi? A moesoe de den sma di kon sabi nofo foe den prakseri foe Jehovah foe kan kon na ini wan boen matifasi nanga en. A moro owroe manpikin e prenki son memre foe a „pikin ipi”, noso „gemeente foe den fosi geborewan di den nen skrifi na hemel”. Den disi ben teki a srefi fasi leki di foe a moro owroe manpikin. Den no ben wani foe bari wan switikon gi wan groepoe na grontapoe, den „tra skapoe”, di, leki fa den ben prakseri, ben e kisi toemoesi foeroe belangstelling foe trawan.

A manpikin di ben lasi, na a tra sei, e prenki den sma foe Gado pipel di gowe libi na organisâsi foe Gado foe go tesi den prisiri foe grontapoe. Ma baka wan pisi ten den e drai kon baka, foe di den abi berow èn den e tron fajafaja foetoeboi foe Gado baka. Ija, a Tata abi troetroe foeroe lobi nanga sari-ati gi den sma, di e froestan taki den moesoe kisi pardon èn taki den moesoe drai kon baka na en! Lukas 15:11-32; Lefitikus 11:7, 8; Tori foe den Apostel 6:7; Lukas 12:32; Hebrewsma 12:23; Johanes 10:16.

▪ Soema Jesus e froeteri na agersitori disi, èn foe san ede?

▪ Soema na a moro prenspari sma na ini a tori, èn san e pasa nanga en?

▪ Soema na ini Jesus ten a papa nanga a moro jongoe manpikin e prenki?

▪ Fa Jesus e waka baka na eksempre foe a sari-ati papa ini na agersitori di A ben froeteri?

▪ Fa a moro owroe manpikin e si a tori taki den e bari en brada wan switikon, èn fa den Fariseiman e doe neleki a moro owroe manpikin?

▪ Na sortoe fasi na agersitori foe Jesus e fiti na ini a ten foe wi?