Kapitel 54

„A troe brede foe hemel”

A DEI di pasa ben de troetroe wan dei pe foeroe sani ben pasa. Jesus ben gi doesoendoesoen sma njanjan na wan wondroe fasi èn baka dati, a ben lowe gi den sma di ben proeberi foe meki en tron kownoe. A neti dati a ben waka na tapoe a Se foe Galilea, pe wan bigi winti ben wai na tapoe; a ben jepi Petrus, di ben bigin foe soengoe di a ben waka na tapoe a watra pe a bigi winti ben wai boen tranga na tapoe èn a ben bedari den skwala, so taki a boto nanga den disipel foe en na ini, no ben kan soengoe.

Now den sma di Jesus ben gi njanjan na wan wondroe fasi na a noord-owstoesei foe a Se foe Galilea, e feni en krosibei foe Kaperna-um èn den e aksi en: „O ten joe ben kon djaso?” Jesus e piri-ai gi den èn a e taigi den taki den kon soekoe en soso foe di den e froewakti foe kisi njanjan ete wan tron sondro foe pai. A e gi den tranga foe no wroko gi njanjan di e lasi gowe, ma gi njanjan di e tan foe gi têgo libi. Foe dati ede den sma e aksi: „San wi sa doe foe doe den wroko foe Gado?”

Jesus e kari soso wán wroko di warti moro ala sani. „Disi na a wroko foe Gado”, na so a e tjari kon na krin, „taki joe e sori bribi na ini en di A ben seni kon.”

Ma den sma no e sori bribi na ini Jesus, awansi ala wondroe di a doe. Joe no kan bribi, taki srefi baka di a doe ala den froewondroe sani, dati den e aksi: „San joe e doe dan leki wan marki, so taki wi kan si dati èn kan bribi joe? Sortoe wroko joe e doe? Den fositen tata foe wi ben njan a mana na ini a gran sabana, soleki fa a skrifi: ’A ben gi den brede foe hemel foe den njan.’”

Leki wan piki tapoe na aksi foe den foe gi den wan marki, Jesus e sori krin soema na a Fonten foe den sani di seti na wan wondroe fasi. A e taki: „A no Moses ben gi oenoe a brede foe hemel, ma mi Tata e gi oenoe a troe brede foe hemel. Bika a brede foe Gado na a sma di e saka kon foe hemel èn di e gi libi na grontapoe.”

„Masra,” den sma e taki, „gi wi a brede disi ala ten baka.”

„Mi na a brede foe libi”, Jesus e tjari kon na krin. „A sma di e kon na mi, angri no sa kiri en kwetikweti moro, èn a sma di e sori bribi na ini mi, noiti no sa dreiwatra kwetikweti moro. Ma mi taigi oenoe: Oenoe si mi srefi èn tokoe oenoe no e bribi. Ala san a Tata e gi mi, sa kon na mi, èn a sma di e kon na mi, mi no sa jagi en gowe kwetikweti; bika mi no ben saka kon foe hemel foe doe mi wani, ma a wani foe en di ben seni  mi kon. Disi na a wani foe en di ben seni mi kon, taki mi no moesoe meki noti lasi gowe foe ala san a gi mi, ma taki mi moesoe gi den wan opobaka na a lasti dei. Bika disi na a wani foe mi Tata, taki ibriwan sma di e si a Manpikin èn e sori bribi na ini en, moesoe abi têgo libi.”

Te den djoe e jere disi, den e bigin kroetoekroetoe na tapoe Jesus, foe di a ben taki: „Mi na a brede di ben saka kon foe hemel.” Den e si na ini en noti moro leki wan manpikin foe libisma papa nanga mama èn foe di den no e agri, den e taki a srefi sani di den sma na Nasaret ben taki: „Disi a no Jesus, a manpikin foe Josef, di en papa nanga mama wi sabi? Fa a kan taki now dan: ’Mi saka kon foe hemel’?”

„Tapoe foe kroetoe na mindri makandra”, Jesus e piki. „No wan sma kan kon na mi, boiti efoe a Tata, di ben seni mi kon, e hari en kon; èn mi sa gi en wan opobaka na a lasti dei. A skrifi na ini den Profeiti: ’Èn den alamala sa kisi leri foe Jehovah.’ Ibriwan sma di jere foe a Tata èn kisi leri foe en, e kon na mi. No taki wan sma si a Tata, boiti en di komoto na Gado; en si a Tata. Foe troe, mi e taigi oenoe: A sma di e bribi, abi têgo libi.”

Jesus e go doro èn e taki ete wan tron: „Mi na a brede foe libi. Den fositen tata foe oenoe ben njan a mana na ini a gran sabana èn tokoe den dede. Disi na a brede di e saka kon foe hemel, so taki ibriwan sma kan njan foe en èn no dede. Mi na a libilibi brede di ben saka kon foe hemel; efoe wan sma e njan foe a brede disi, a sa libi foe têgo.” Ija, te sma e sori bribi na ini Jesus, a sma di Gado ben seni kon, dan den kan abi têgo libi. No wan mana, noso no wan sortoe tra brede kan sorgoe gi dati!

Soleki fa a sori, dan a takimakandra di ben abi foe doe nanga a brede foe hemel, ben bigin sjatoe baka di den sma ben feni Jesus krosibei foe Kaperna-um. Ma a takimakandra e go doro èn baka ten a e doro wan heimarki te Jesus e gi leri na ini wan snoga na Kaperna-um. Johanes 6:25-51, 59; Psalm 78:24; Jesaja 54:13; Mateus 13:55-57.

▪ Sortoe sani ben pasa fosi Jesus ben hori a takimakandra di ben abi foe doe nanga a brede foe hemel?

▪ Foe san ede a no fiti foe aksi foe wan marki, te joe e loekoe san Jesus doe no so langa pasa ete?

▪ Foe san ede den djoe e kroetoekroetoe na tapoe Jesus te a taki dati a de a troe brede foe hemel?

▪ Pe a takimakandra di ben abi foe doe nanga a brede foe hemel, ben feni presi?