Abi sari-ati gi wan gwasiman
Kapitel 25
Abi sari-ati gi wan gwasiman
TE JESUS nanga den fo disipel foe en e go na den foto foe Galilea, dan na ini a heri kontren, njoensoe e panja foe den wondroe sani di a e doe. Den njoensoe foe den sani di a doe, e doro wan foto pe wan man e libi di abi gwasi. Datra Lukas e skrifi taki a man „ben abi gwasi na en heri skin”. Te a takroe siki disi go boen fara kaba, dan difrenti pisi foe a skin e pori gowe safrisafri. So boen, a gwasiman disi de na ini wan toemoesi sari situwâsi.
Te Jesus doro a foto, dan a gwasiman e waka go na en. Soleki fa a Wet foe Gado e taki, dan wan gwasiman de froeplekti foe bari a warskow: „Mi no krin, mi no krin!”, foe tapoe trawan foe kon toemoesi krosibei foe en, so taki den no kisi a siki. Now a gwasiman e fadon tapoe en fesi èn a e begi Jesus: „Masra, efoe joe wani nomo, joe kan meki mi kon krin.”
Ai, a man abi troetroe bribi ini Jesus! Ma sma ben moesoe sari a man troetroe, te den ben e si fa a siki! San Jesus sa doe? San joe ben sa doe? Sari-ati e meki Jesus langa en anoe foe fasi a man, ala di a e taki: „Mi wani dati. Kon krin.” Wantewante a gwasi e gowe libi a man.
Joe ben sa wani abi so wan sma leki kownoe, di abi someni sari-ati? A fasi fa Jesus e handri nanga a gwasiman disi, e gi wi a froetrow taki na ini a ten foe En Kownoekondre tiri, a bijbel profeititori sa kon troe: „A sa sari den sma di abi sakafasi èn den pôtiwan, èn a sa kibri den sili foe den pôtiwan.” Ija, na a ten dati Jesus sa doe san a angri troetroe foe doe, foe jepi ala sma di e kisi kwinsi.
Srefi bifo Jesus dresi a gwasiman, a diniwroko foe en e meki bigi sekiseki kon na den sma. Leki wan kontroe foe a profeititori foe Jesaja, Jesus e komanderi a man di kon betre: „Sorgoe taki joe no froeteri no wan sma disi.” Dan a e komanderi en: „Go, meki a priester si joe, èn foe di joe kon krin, tjari leki ofrandi den sani di Moses ben taki, leki wan kotoigi gi den.”
Ma a man firi so kolokoe, taki a no kan hori a wondroe gi ensrefi. A e gowe èn e bigin panja a njoensoe na ala sei, èn a gersi leki a e wiki someni belangstelling na den sma, taki den wani sabi moro. Dati meki Jesus no kan go na ini wan foto na poebliki moro. Foe dati ede, Jesus e tan na tiri presi pe no wan sma e libi, èn foe ala sei sma e kon foe arki en èn foe a dresi den siki foe den. Lukas 5:12-16; Markus 1:40-45; Mateus 8:2-4; Lefitikus 13:45; 14:10-13; Psalm 72:13; Jesaja 42:1, 2.
▪ Sortoe krakti, gwasi kan abi na tapoe wan sma èn sortoe warskow wan gwasiman ben de froeplekti foe gi?
▪ San wan gwasiman e begi Jesus, èn san wi kan leri foe a fasi fa Jesus piki?
▪ Fa a man di kon betre no e doe san Jesus taigi en, èn san na den bakapisi?