Kapitel 103

Agen a e go na a tempel

DJONSRODE Jesus nanga den disipel foe en tan a di foe dri neti na Betania, sensi den ben kon foe Jerikow. Now froekoefroekoe moende mamanten 10 Nisan, den de kaba na pasi e go na Jerusalem. Angri e kiri Jesus. Foe dati ede, te a e si wan figabon di abi wiwiri, a e go na a bon foe si efoe a abi wan toe figa.

A de wan aparti sani gi a pisi ten disi foe a jari, taki a bon abi wiwiri, bika leki fa a gwenti de, dan figa no e lepi te leki juni fosi, èn now a de na a kaba foe maart nomo. Ma a de krin, taki Jesus e denki taki, foe di wiwiri de froekoe kaba na a bon, meki kande a sa abi figa toe. Ma a froewakti foe en no e kon troe. Den wiwiri meki a bon e kori sma. Ne Jesus e floekoe a bon nanga den wortoe: „Noiti moro wan sma sa njan foe a froktoe foe joe.” A tra mamanten den e kon sabi san na a bakapisi foe a floekoe di Jesus e floekoe a figabon èn san disi wani taki.

Jesus nanga den disipel foe en e go moro fara, èn a no teki langa, fosi den doro Jerusalem. A e go na a tempel, di a ben ondrosoekoe a bakadina foe a dei na fesi. Ma tide a e opo doe wan sani, neleki fa a ben doe dri jari na fesi kaba, di a ben kon na a Paskafesa foe 30 G.T. Jesus e trowe den sma go na doro di e seri èn e bai sani na ini a tempel èn a e drai den tafra tapoe foe den sma di e broko moni èn den bangi foe den sma di e seri doifi. A no e gi sma pasi srefi foe den tjari wan wrokosani pasa na ini a tempel.

A e kroetoe den sma di e broko moni èn di e seri meti na ini a tempel, èn a e taki: „Boekoe no taki: ’Mi oso den sa kari wan oso foe begi gi ala nâsi’? Ma oenoe meki a tron wan foefoeroeman-olo.” Den na foefoeroeman, foe di den e aksi toemoesi foeroe moni foe den sma di no kan doe tra fasi leki foe bai den meti foe den di den abi fanowdoe foe tjari ofrandi. Foe dati ede Jesus e si den bisnis wroko disi leki wan fasi foe bidrigi noso foe foefoeroe sma.

Te den granpriester, den leriman foe Wet, nanga den prenspariwan foe a pipel, jere san Jesus doe, dan agen den e soekoe wan fasi foe meki den kiri en. Nanga disi den e sori taki den no man kenki. Ma tokoe den no sabi fa den moesoe poeroe Jesus na pasi, foe di ala den sma e tan krosibei foe en foe jere en.

Boiti den troetroe djoe, joe abi den heiden di e kon toe na a Paskafesa. Den na proselietsma, san wani taki dati den teki a djoe relisi. Wan toe Grikisma, di kande na proselietsma, e go now na Filipus èn den e aksi en efoe den kan si Jesus. Filipus e go na Andreas, kande foe aksi en efoe a ben sa fiti efoe den sma disi miti Jesus. Soleki fa a sori, dan Jesus de na ini a tempel ete, pe den Grikisma kan si en.

Jesus sabi taki a abi soso wan toe dei ete foe libi, èn foe dati ede a e tjari a situwâsi foe en kon na fesi na wan moi fasi nanga wan eksempre: „A joeroe doro gi a Manpikin foe libisma foe kisi glori. Foe troe, foe troe, mi e taigi oenoe: Efoe wan ai foe wan tarwe no fadon na ini gron èn dede, a e tan soso wán ai; ma efoe a dede, dan a e meki foeroe froktoe.”

Wan ai foe wan tarwe no abi foeroe waarde. Ma fa a de, efoe den e poti en go na ini gron èn a „dede”, foe di wan kaba e kon na a de di a ben de wan siri? Dan a wan ai dati e sproiti èn e gro baka wan pisi ten èn e tron wan tiki di e meki foeroe, foeroe ai foe wan tarwe. Na so toe, Jesus de soso wán volmaakti man. Ma efoe a dede ala di a e tan getrow na Gado, dan a e tron a wrokosani foe gi têgo libi na getrow sma di abi a srefi jejefasi foe òfer densrefi neleki en. So boen, Jesus e taki: „A sma di lobi en sili srefisrefi, e pori en, ma a sma di no wani si en sili na ai na ini a grontapoe disi, sa kibri en gi a têgo libi.”

A de krin, taki Jesus no e denki ensrefi wawan, bika a e tjari kon na krin moro fara: „Efoe wan sma wani dini mi, dan a moesoe waka na mi baka, èn pe mi de, na drape a dinari foe mi sa de toe. Efoe wan sma ben sa wani dini mi, dan a Tata sa gi en grani.” Disi na troetroe wan heri moi pai foe a waka di wan sma e waka na Jesus baka èn foe a dini di a e dini en! Na a pai di wan sma e kisi, taki a Tata e gi en a grani foe de makandra nanga Krestes na ini a Kownoekondre.

Jesus e denki a hebi pina nanga a takroe dede di e wakti en, èn a e taki moro fara: „Now mi sili e broeja, èn san mi sa taki? Tata, froeloesoe mi foe a joeroe disi.” Efoe a ben kan tan farawe nomo foe san e wakti en! Ma nôno, soleki fa a e taki: „Na foe disi ede meki mi kon na a joeroe disi.” Jesus e agri nanga ala sani di Gado seti, èn so srefi nanga en eigi ofrandi dede toe. Mateus 21:12, 13, 18, 19; Markus 11:12-18; Lukas 19:45-48; Johanes 12:20-27.

▪ Foe san ede Jesus e froewakti foe feni figa, ala di a no de a ten gi den froktoe?

▪ Foe san ede Jesus e kari den sma di e seri sani na ini a tempel, „foefoeroeman”?

▪ Fa Jesus de leki wan ai foe wan tarwe di e dede?

▪ Fa Jesus e denki foe a pina nanga dede di e wakti en?