Kapitel 78

De klariklari!

BAKA DI Jesus warskow den ipi sma gi gridifasi, èn sori den disipel foe en foe a kefar foe poti toemoesi foeroe prakseri na tapoe materia sani, a e gi a deki-ati: „No frede, pikin ipi, bika oen Tata feni en boen foe gi oenoe a kownoekondre.” Na a fasi disi a e tjari kon na krin, taki soso wan pikin groepoe (baka ten sma ben kon sabi den leki 144.000) sa de na ini a Kownoekondre na hemel. A moro bigi pisi foe den sma di e kisi têgo libi, sa de borgoe foe a Kownoekondre na grontapoe.

Disi na troetroe wan heri moi presenti, „a kownoekondre”! Jesus e froeteri fa den disipel moesoe handri na wan joisti fasi na tapoe a presenti disi di den kisi, foe di a e gi den tranga: „Seri ala san joe abi èn gi presenti foe sari-atifasi.” Ija, den moesoe gebroiki den goedoe foe den foe doe boen na jejefasi gi tra sma, èn na so fasi bow „na hemel wan goedoe di no e kaba”.

Baka dati Jesus e froemane den disipel foe en foe de klariklari te a drai kon baka. A e taki: „Tai oen mindribere èn meki den lampoe foe oenoe tan bron, èn de leki sma di e wakti na tapoe a meester foe den te a e drai kon baka foe a trow-oso, so taki te a doro èn e naki na tapoe a doro, den kan opo a doro wantewante gi en. Kolokoe foe den srafoe di a meester e feni den na ai te a doro! Foe troe, mi e taigi oenoe: A sa tai en mindribere èn meki den didon na tafra èn a sa waka pasa den èn dini den.”

Taki den foetoeboi de klariklari te a meester foe den e drai kon baka, e kon na krin ini na agersitori disi, foe di den e opo a langa krosi foe den èn e soetoe dati go na ondro a leriboeba foe den, èn den e tan doe a wroko foe den te na neti-joeroe na a leti foe den lampoe di foeroe boen nanga oli. Jesus e tjari kon na krin: ’Te a meester e doro na ini a di foe toe waki [foe wan sani foe neigi joeroe na neti te mindrineti], noso srefi na ini a di foe dri waki [foe mindrineti te wan sani foe dri joeroe mamanten], èn a e feni den, ala di den de klariklari, kolokoe foe den!’

A meester e pai den foetoeboi foe en na wan toemoesi aparti fasi. A e meki den didon na tafra èn a e bigin dini den. A no e handri nanga den leki srafoe, ma leki loyaal mati. Disi na troetroe wan moi pai di den kisi, foe di den ben tan wroko a heri neti gi a meester foe den, ala di den ben e wakti te a ben sa drai kon baka! Jesus e tapoe nanga den wortoe: „Oenoe toe, de klariklari, bika a Manpikin foe libisma e kon na wan joeroe di kande joe no e denki taki a sa kon.”

Now Petrus e aksi: „Masra, joe e taigi na agersitori disi na wi noso so srefi na ala sma toe?”

Na presi foe Jesus piki langalanga na tapoe na aksi, a e gi ete wan agersitori. „Soema na troetroe a getrow . . . basja di e hori ai na tapoe sani,” a e aksi, „di en meester sa poti en loekoe en skin foe foetoeboi, foe tan gi den a njanjan di den moesoe kisi, na a reti ten? Kolokoe foe a srafoe dati, te en meester e doro èn e si taki a e doe dati! Mi e taigi oenoe foe troe: A sa poti en loekoe ala en goedoe.”

A no de foe taki, dati a „meester” na Jesus Krestes. A „basja di e hori ai na tapoe sani” e prenki a „pikin ipi” foe disipel di de leki wán groepoe, èn a „skin foe foetoeboi” abi foe doe nanga a srefi groepoe disi foe 144.000 sma di e kisi a hemel Kownoekondre, ma den wortoe disi e poti krakti na tapoe a wroko di den abi leki ibriwan memre aparti. Den „goedoe” di a getrow basja di e hori ai na tapoe sani, moesoe loekoe, na den kownoekondre afersi foe a meester na grontapoe, pe joe abi na ini toe den borgoe foe a Kownoekondre na grontapoe.

Jesus e go moro fara nanga na agersitori, èn a e sori na tapoe taki a kan, dati a no ala memre foe a basja-groepoe dati di e hori ai na tapoe sani, noso srafoe-groepoe sa de loyaal. A e tjari kon na krin: „Efoe a srafoe dati, oiti ben sa taki na ini en ati: ’A meester foe mi no o kon ete’, èn a ben sa bigin naki den foetoeboi nanga den oema-foetoeboi, èn njan èn dringi èn kon droengoe, dan a meester foe a srafoe dati sa kon na wan dei di a no e froewakti en . . . , èn a sa gi en a moro hebi strafoe.”

Jesus e taki dati a kon di a kon, tjari wan faja ten kon gi den djoe, foe di sonwan e teki a leri foe en èn trawan e weigri foe teki a leri. Moro leki dri jari pasa kaba, a ben teki dopoe na ini watra, ma now en dopoe na ini dede e kon krosibei moro nanga moro, èn soleki fa a e taki: „A e banawtoe mi te leki a doro en kaba!”

Baka di Jesus taigi den disipel foe en den wortoe disi, a e taki baka nanga den ipi sma. A e sari foe di den e weigri na wan tranga-ede fasi foe teki a krin boeweisi foe soema na en èn san dati wani taki. „Te oenoe e si wan wolkoe e opo kon na a westsei kontren,” na so a e taki „dan wantewante oenoe e taki: ’Wan bigi winti e kon’, èn so a e pasa toe. Èn te oenoe e si taki wan winti e wai foe zuidsei, dan oenoe e taki: ’Wan waran winti sa kon’, èn a e pasa. Oen hoigriman, oenoe sabi fa foe ondrosoekoe a fasi fa grontapoe nanga a loktoe tan na dorosei, ma fa a doe kon, taki oenoe no sabi fa foe ondrosoekoe a spesroetoe ten disi?” Lukas 12:32-59.

▪ Omeni sma a „pikin ipi” e teri, èn san den e kisi?

▪ Fa Jesus e poti krakti na tapoe taki den foetoeboi foe en moesoe de klariklari?

▪ Soema na ini na agersitori foe Jesus, na a „meester”, a „dinari di e hori ai na tapoe sani”, a „skin foe foetoeboi”, nanga den „goedoe”?