Kapitel 104

Den ben jere Gado sten wan di foe dri leisi

ALA DI Jesus de na ini a tempel, a e broko en ede nanga a dede di a sa dede heri esi. A e broko en ede moro foeroe nanga a bakapisi di a dede foe en sa abi na tapoe a boen nen foe en Tata, èn foe dati ede a e begi: „Tata, gi joe nen glori.”

Ne wan krakti sten e kon foe hemel, di e meki bekènti: „Mi ben gi en glori èn mi sa gi en glori baka.”

Na ipi sma di e tanapoe drape, e froewondroe srefisrefi. „Wan engel taki nanga en”, sonwan e bigin taki. Trawan e taki dati na dondroe ben bari. Ma troetroe, na Jehovah Gado ben taki! Ma disi a no a fosi leisi di Gado sten ben de foe jere na ini a tori foe Jesus.

Dri nanga afoe jari na fesi, di Jesus ben teki dopoe, dan Johanes a Dopoeman ben jere fa Gado ben taki foe Jesus: „Disi na mi Manpikin, a lobiwan, di mi feni boen.” Dan, wan pisi ten baka a Paskafesa di ben waka na fesi a wan disi, di Jesus ben kisi wan transfiguratie na fesi foe Jakobus, Johanes nanga Petrus, den ben jere di Gado ben froeklari: „Disi na mi Manpikin, a lobiwan, di mi feni boen; arki en.” Èn now, foe a di foe dri leisi, na tapoe 10 Nisan, fo dei bifo a dede foe Jesus, sma e jere Gado sten baka. Ma a leisi disi Jehovah e taki na so wan fasi, taki boen foeroe sma kan jere en!

Jesus e tjari kon na krin: „A sten disi no piki foe mi ede, ma foe oenoe ede.” Disi e boeweisi, taki Jesus na troetroe Gado Manpikin, a pramisi Mesias. „Now den e kroetoe a grontapoe disi,” na so Jesus e go moro fara, „now den sa trowe a tiriman foe a grontapoe disi go na doro.” Te joe loekoe en boen, dan Jesus getrow waka nanga libi, e sori sondro misi taki Satan Didibri, a tiriman foe grontapoe, e froedini en foe den „trowe [en] go na doro”, noso kiri en.

Te Jesus e sori na tapoe den bakapisi foe en dede di e kon krosibei, dan a e taki: „Èn tokoe ete, te den opo mi foe grontapoe go na loktoe, dan mi sa hari ala sortoe sma kon na mi.” Na no wan enkri fasi a dede foe en de wan lasi, bika nanga jepi foe disi, a sa hari trawan kon na en, so taki den kan njan boen foe têgo libi.

Ma na ipi sma no e agri nanga disi. Den e taki: „Wi ben jere foe a Wet taki a Krestes e tan foe têgo; èn fa joe kan taki dan, dati den moesoe opo a Manpikin foe libisma go na loktoe? Soema na a Manpikin foe libisma disi?”

Ala di den e si ala den boeweisi, so srefi taki den ben jere Gado eigi sten, tokoe moro foeroe sma no e bribi taki Jesus na troetroe a Manpikin foe libisma, a pramisi Mesias. Ma neleki fa Jesus ben doe siksi moen na fesi kaba na a Wiwirikampoe-fesa, na so a e taki agen foe ensrefi leki „a leti”, èn a e gi den arkiman foe en a deki-ati: „Sori bribi na ini a leti, so langa oenoe abi a leti, so taki oenoe e tron manpikin foe leti.” Baka di Jesus taki den sani disi, a e gowe èn e go kibri, bika a de krin taki sma e soekoe foe kiri en.

Taki den djoe no e poti bribi na ini Jesus, na wan kontroe foe den wortoe foe Jesaja di e taki dati den ’ai foe den sma kon breni èn na ati foe den kon tranga, so taki den no e drai densrefi foe den kon betre’. Na ini wan fisjoen Jesaja ben si a hemel tanpresi foe Jehovah, nanga Jesus na ini en glori di a ben abi bifo a ben tron wan libisma, na sei foe Jehovah. Ma tokoe, leki wan kontroe foe san Jesaja ben skrifi, den djoe e weigri na wan tranga-edefasi foe erken a boeweisi, taki a Sma disi na a pramisi Froeloesoeman foe den.

Na a tra sei, srefi foeroe foe den tiriman (soleki fa a sori dan de de memre foe a djoe heikroetoe, a Sanhedrin), troetroe e poti bribi na ini Jesus. Nikodeimus nanga Josef foe Arimatea, na toe foe den tiriman disi. Ma te nanga now, den tiriman no e meki a bribi foe den bekènti, foe di den frede taki den sa lasi a posisi foe den na ini a snoga. Den sma disi e lasi foeroe troetroe!

Jesus e taki moro fara: „A sma di e poti bribi na ini mi, no e poti bribi na ini mi wawan, ma na ini en toe di ben seni mi kon; èn a sma di si mi, si en toe di ben seni mi kon. . . . Ma efoe wan sma jere mi wortoe èn no e doe den, mi no e kroetoe en; bika mi no kon foe kroetoe grontapoe, ma foe froeloesoe grontapoe. . . . A wortoe di mi taki, na dati sa kroetoe en na a lasti dei.”

A lobi foe Jehovah gi a grontapoe foe libisma, ben meki en seni Jesus kon, so taki den wan di e poti bribi na ini en, ben sa kan kisi froeloesoe. Efoe sma sa kisi froeloesoe efoe no, sa anga foe na aksi efoe den e gi jesi na den sani di Gado taigi Jesus foe en taki. A kroetoe sa de „na a lasti dei”, na ini Krestes Doesoen Jari Tiri.

Jesus e tapoe nanga den wortoe: „San mi taki no kon foe misrefi, ma a Tata srefi di ben seni mi kon, gi mi wan komando foe san mi moesoe froeteri èn san mi moesoe taki. Mi sabi toe, taki a komando foe en wani taki têgo libi. Foe dati ede, den sani di mi e taki, mi e taki soleki fa a Tata froeteri mi.” Johanes 12:28-50; 19:38, 39; Mateus 3:17; 17:5; Jesaja 6:1, 8-10.

▪ Na sortoe dri okasi, Gado sten ben de foe jere na ini a tori foe Jesus?

▪ Fa a profeiti Jesaja ben si a glori foe Jesus?

▪ Soema na den tiriman di e poti bribi na ini Jesus, ma foe san ede den no e taki na poebliki dati den e bribi na ini en?

▪ San na „a lasti dei”, èn tapoe a gron foe san den sa kroetoe sma na a ten dati?