Kapitel 127

Den beri en tapoe freida — wan leigi grebi tapoe sonde

A DE now latilati freida bakadina, èn Sabadei foe 15 Nisan sa bigin te sondongo. A dede skin foe Jesus e anga slak na a postoe, ma den toe rofer di e anga na ala toe sei foe en, e libi ete. Den sma e kari freida bakadina a Sreka foe sani, foe di na a ten disi sma e sreka njanjan èn e kaba ala tra wroko di de fanowdoe, èn di no kan wakti te baka Sabadei.

A Sabadei di sa bigin heri esi, no de soso wan gewoon Sabadei (a di foe seibi dei foe a wiki), ma a de wan dobroe noso wan „bigi” Sabadei toe. Den e kari en so, foe di 15 Nisan, a fosi dei foe a seibi-dei Fesa foe Brede sondro Sroedeki (di alaten de wan Sabadei, awansi sortoe dei foe a wiki a de), e fadon tapoe a srefi dei leki a gewoon Sabadei.

Soleki fa a Wet foe Gado e taki, dan dede skin no kan tan anga na wan postoe a heri neti. Foe dati ede den djoe e aksi Pilatus efoe den kan meki taki den wan di ben kisi a dedestrafoe, dede moro esi, nanga a broko di den e broko den foetoe foe den. Dati meki den sroedati e broko den foetoe foe den toe rofer. Ma foe di a sori taki Jesus dede kaba, meki den no e broko den foetoe foe en. Disi e meki a tekst kon troe: „No wan bonjo foe en den no sa masi.”

Ma foe poeroe ibri tweifri taki Jesus dede troetroe, meki wan foe den sroedati e soetoe wan lansri go na ini en sei. A lansri e boro a presi pe na ati de èn wantewante broedoe nanga watra e komoto kon na doro. Na apostel Johanes di e si disi, e skrifi taki disi e meki wan tra tekst kon troe: „Den sa loekoe go na a Sma di den ben boro.”

Josef foe a foto Arimatea, wan lespeki memre foe a Sanhedrin, de drape toe te den e kiri Jesus. A no ben agri nanga na onregtfardiki fasi fa a hei kroetoe ben handri nanga Jesus. Foe taki en leti, dan Josef na wan disipel foe Jesus, ala di a ben frede foe meki sma kon sabi disi. Ma now a abi deki-ati èn a e go na Pilatus foe aksi en a skin foe Jesus. Pilatus e seni kari a legre ofsiri di den ben poti na wroko, èn baka di na ofsiri taki dati Jesus dede troetroe, dan Pilatus e meki den gi Josef a dede skin.

Josef e teki a skin èn e domroe en na ini krin fini linnen, so taki den kan sreka en gi a beri. A e kisi jepi foe Nikodeimus, wan tra memre foe a Sanhedrin. Nikodeimus toe no froeteri na fesi foe sma, taki a e bribi na ini Jesus, foe di a ben frede foe lasi en posisi. Ma now a e tjari wan lolo kon, di abi so wan wan hondro Rome pontoe mirre nanga diri aloewei na ini. Den e domroe a skin foe Jesus na ini doekoe di abi den spesrei disi na ini, neleki fa den djoe abi a gwenti foe sreka wan dede skin gi a beri.

Baka dati den e poti a skin na ini a njoen memre-grebi foe Josef, di den koti na ini wan klipston na ini a djari di de krosibei. Te foe kaba, den e lolo wan bigi ston poti na fesi a grebi. Foe di den wani kaba nanga a beri bifo Sabadei bigin, meki den e sreka a skin esi-esi. Foe dati ede, Maria Magdalena nanga Maria, a mama foe Jakobus a Mendriwan, di ben jepi kande foe sreka a skin, e feti foe go na oso foe meki moro spesrei nanga switismeri oli. Baka Sabadei, den wani sreka a skin foe Jesus moro fara, so taki a skin kan tan boen foe wan moro langa pisi ten.

A tra dei foe en, dati na satra (Sabadei), den granpriester nanga den Fariseiman e go na Pilatus èn den e taki: „Masra, wi kon memre taki, di a bidrigiman dati ben de na libi ete, a ben taki: ’Baka dri dei mi sa kisi wan opobaka.’ Foe dati ede, gi a komando foe tapoe a grebi boen te na a di foe dri dei, so taki den disipel foe en no kan kon èn foefoeroe en, èn taigi a pipel: ’A ben opo baka na dede!’ èn a lasti lei disi sa ogri moro a fosiwan.”

„Oenoe e kisi wan waktiman”, Pilatus e piki. „Go tapoe a grebi boen, soleki fa oenoe denki.” Foe dati ede den e gowe èn den e tapoe a grebi boen, foe di den e marki a ston èn den e poti sroedati foe Rome leki waktiman.

Froekoefroekoe sonde mamanten, Maria Magdalena nanga Maria, a mama foe Jakobus, makandra nanga Salome, Johana, nanga tra oemasma, e tjari den spesrei go na a grebi foe sreka a skin foe Jesus. Te den de na pasi, dan den e taigi makandra: „Soema sa lolo a ston poeroe gi wi foe a doro foe a memre-grebi?” Ma te den e doro drape, dan den e si taki wan gronseki feni presi èn taki na engel foe Jehovah lolo a ston poeroe. Den waktiman gowe, èn a grebi leigi! Mateus 27:57–28:2; Markus 15:42–16:4; Lukas 23:50–24:3, 10; Johanes 19:14, 31–20:1; 12:42; Lefitikus 23:5-7; Deuteronomium 21:22, 23; Psalm 34:20; Sakaria 12:10.

▪ Foe san ede den e kari freida a Sreka foe Sani, èn san na wan „bigi” Sabadei?

▪ Sortoe tekst e kon troe na ini a tori foe a skin foe Jesus?

▪ San Josef nanga Nikodeimus abi foe doe nanga a beri foe Jesus, èn soema den de foe Jesus?

▪ San den priester e aksi Pilatus, èn san a e piki?

▪ San e pasa froekoefroekoe sonde mamanten?