Den disipel e haritaki nanga makandra leti bifo a dede foe Jesus
Kapitel 98
Den disipel e haritaki nanga makandra leti bifo a dede foe Jesus
JESUS nanga den disipel foe en no de fara foe Jordan liba pe den e koti abra komoto na a distrikt Perea foe go na Judea. Foeroe trawan e teki a waka disi nanga den foe go na a Paska foe 33 G.T. di den sa hori, baka wan sani foe ete wán wiki.
Jesus e waka na fesi foe den disipel, èn den e froewondroe foe a fasti bosroiti di a teki nanga deki-ati. Memre taki wan toe wiki na fesi di Lasarus dede èn Jesus ben de klariklari foe komoto na Perea foe go na Judea, taki Tomas ben gi den trawan deki-ati: „Meki wi go toe, so taki wi kan dede nanga en.” Memre toe taki baka di Jesus gi Lasarus wan opobaka, a Sanhedrin ben meki plan foe meki den kiri Jesus. A no wan froewondroe sani, taki den disipel e kon frede te den e kon now na Judea baka.
Foe sreka den gi san o pasa, meki Jesus e teki den twarfoe apostel go na wan sei èn e froeteri den: „Wi e hari go now na Jerusalem, èn den sa gi a Manpikin foe libisma abra na den granpriester nanga den leriman foe Wet, èn den sa gi en a dedestrafoe èn den sa gi en abra na sma foe den nâsi, èn den sa spotoe en èn spiti na en tapoe èn krawasi en èn kiri en, ma dri dei na baka a sa opo baka.”
Disi na a di foe dri tron na ini den lasti moen, taki Jesus froeteri den disipel foe en foe a dede nanga na opobaka foe en. Èn ala di den e arki en, tokoe den no e froestan san disi wani taki. Kande disi de so, foe di den e bribi taki a kownoekondre foe Israèl sa kon boen baka na grontapoe, èn den e froewakti foe njan boen foe a glori nanga grani di den sa kisi na ini wan kownoekondre na grontapoe makandra nanga Krestes.
Salome, a mama foe den apostel Jakobus nanga Johanes, de na mindri den sma toe di e teki waka go na Jerusalem foe hori a Paska. Jesus kari den man disi „Manpikin foe a dondroe” kaba, sondro degedege, foe di den ati e bron esi-esi. Wan heri pisi ten kaba den toe man disi abi na ambisi foe kisi wan prenspari presi na ini Krestes Kownoekondre, èn den froeteri a mama foe den foe a sani disi. Now a mama e go na Jesus gi den, a e boigi na Jesus fesi èn e aksi en wan boen.
„San joe wani?”, Jesus e aksi.
A e piki: „Taki dati den toe manpikin foe mi disi kan sidon na ini joe kownoekondre, a wan na joe reti-anoesei èn a trawan na joe kroektoe-anoesei.”
Foe di Jesus e froestan foe soema na aksi kon troetroe, meki a e taigi Jakobus nanga Johanes: „Oenoe no sabi san oenoe e aksi. Oenoe o man dringi a beker di mi sa go dringi djonsrode?”
„Wi kan doe dati”, den e piki. Ala di Jesus froeteri den didjonsro taki wan hebi froefolgoe e wakti en èn taki den sa kiri en te foe kaba, tokoe soleki fa a sori, den no e froestan taki disi na san Jesus wani taki nanga „a beker” di a sa go dringi djonsrode.
Tokoe Jesus e taigi den: „A beker foe mi oenoe sa dringi troetroe, ma a sidon na mi reti-anoesei èn na mi kroektoe-anoesei no de na mi foe gi, ma a de gi den di mi Tata ben sreka dati gi den.”
Te baka wan pisi ten den tin tra apostel jere san Jakobus nanga Johanes aksi, dan den ati e bron. Kande Jakobus nanga Johanes ben de den moro prenspari sma di ben teki fesi di den apostel ben haritaki nanga makandra foe soema na a moro bigiwan. San den e aksi now, e sori taki den no poti a rai di Jesus gi foe na afersi disi na ini den libi. Na wan sari, taki a winsi foe den foe abi wan prenspari posisi, tranga ete.
So boen, foe seti a lasti kesekese disi èn a bita-ati di kon foe dati, meki Jesus e kari den twarfoe apostel kon na wan. Na wan lobi-atifasi a e gi den rai, èn a e taki: „Oenoe sabi taki den tiriman foe den nâsi e basi den èn den bigiman abi makti na den tapoe. Ma so a no de nanga oenoe; ma soema na oen mindri wani kon bigi, moesoe de oen dinari, èn soema na oen mindri wani de a fosiwan, moesoe de oen srafoe.”
Jesus gi na eksempre di den moesoe waka na dati baka, soleki fa a e tjari kon na krin: „Neleki fa a Manpikin foe libisma no ben kon foe sma dini en, ma foe dini sma èn foe gi en sili leki wan loesoe paiman ini a presi foe foeroe sma.” Jesus no wawan dini gi a boen foe tra sma, ma a sa go srefi so fara, taki a sa dede gi a libisma famiri! Den disipel abi a srefi jejefasi dati fanowdoe leki di foe Krestes foe wani foe dini sma, na presi foe sma dini den èn foe wani de wan mendriwan na presi foe de wan sma di abi wan prenspari posisi. Mateus 20:17-28; Markus 3:17; 9:33-37; 10:32-45; Lukas 18:31-34; Johanes 11:16.
▪ Foe san ede den disipel e kon frede now?
▪ Fa Jesus e sreka den disipel foe en gi san o pasa?
▪ Sortoe sani den e aksi Jesus, èn sortoe krakti disi abi na tapoe den tra apostel?
▪ Fa Jesus e seti a problema di e kon na mindri den apostel foe en?