Kapitel 81

Den e doe moro moeiti foe kiri Jesus

FOE DI a de winter, meki Jesus e waka na a presi di abi wan daki èn di sma sabi leki a paleisi gadri foe Salomo. Disi de na a seibere foe a tempel. Djaso djoe e tanapoe lontoe en èn den e bigin taki: „O langa joe sa meki wi sili tan na ini span froewakti? Efoe joe na a Krestes, taigi wi krin dan.”

„Mi ben taigi oenoe kaba,” Jesus e piki, „èn ete oenoe no e bribi.” Jesus no ben taigi den langalanga taki a ben de a Krestes, soleki fa a ben taigi disi na a Samaria-oema na a peti. Tokoe, te joe loekoe en boen, a ben tjari kon na krin soema na en di a ben froeklari taki a ben de foe den kondre na tapoesei èn a ben de kaba bifo Abraham ben kon de.

Ma Jesus wani, taki den sma srefi moesoe kon na a bosroiti taki en na a Krestes, te den e teki den wroko foe en gersi san bijbel ben taki na fesi foe den sani di a Krestes ben o doe. Foe dati ede meki na fesi kaba, a ben komanderi den disipel foe en foe no taigi no wan sma taki en na a Krestes. Èn na foe dati ede a e taigi den djoe disi now, di e soekoe trobi: „Den wroko di mi e doe na ini a nen foe mi Tata, den dati e gi kotoigi foe mi. Ma oenoe no e bribi.”

Foe san ede den no e bribi? Foe di den no abi nofo boeweisi taki Jesus na a Krestes? Nôno, ma foe a sani disi ede di Jesus e taigi den: „Oenoe a no mi skapoe. Mi skapoe e arki mi sten, èn mi sabi den, èn den e waka na mi baka. Èn mi e gi den têgo libi, èn noiti den sa kisi pori kwetikweti, èn no wan sma sa hari den poeroe na mi anoe. San mi Tata gi mi, bigi moro leki ala tra sani, èn no wan sma kan hari den poeroe na a anoe foe a Tata.”

Dan Jesus e froeteri foe a krosibei matifasi di a abi nanga en Tata. A e tjari kon na krin: „Mi nanga a Tata na wán.” Foe di Jesus de na grontapoe èn en Tata de na hemel, meki a de krin taki, a no e taki dati en nanga en Tata troetroe, noso na skinfasi, na wán. Jesus wani taki moro foeroe, dati den abi den srefi marki na prakseri, noso taki den de na ini wánfasi nanga makandra.

Foe di den djoe ati e bron nanga den sani di Jesus e taki, meki den e teki ston foe kiri en, neleki fa den ben doe disi kaba na a ten foe a Wiwirikampoe-fesa. Sondro foe frede, Jesus e loekoe den sma di wani kiri en, èn a e taki: „Mi ben sori oenoe foeroe boen wroko foe a Tata. Foe sortoe wan foe den wroko oenoe e ston mi?”

„Wi no e ston joe foe wan boen wroko ede,” den e piki, „ma foe di joe e afrontoe Gado, ija, foe di joe, ala di joe na wan libisma, e meki joesrefi tron wan gado.” Foe di Jesus noiti no ben taki dati en na wan gado, dan foe san ede den djoe e taki disi?

A de krin, taki disi de foe di Jesus e taki dati a abi krakti di, soleki fa den e prakseri, soso Gado kan abi. Foe eksempre, didjonsro a ben taki foe den „skapoe”: „Mi e gi den têgo libi”, wan sani di no wan enkri libisma no kan doe. Ma den djoe no e hori na prakseri, taki Jesus e erken taki a kisi a makti foe en Tata.

Dati Jesus e taki dati a de moro mendri leki Gado, a e sori now, foe di a e aksi: „A no skrifi na ini a Wet foe oenoe [na ini Psalm 82:⁠6]: ’Mi ben taki: „Oenoe na gado”’? Efoe a ben kari den sma ’gado’, di a wortoe foe Gado ben taki nanga den, . . . dan oenoe e taigi mi, di a Tata ben santa èn ben seni kon na grontapoe: ’Joe e afrontoe Gado’, bika mi ben taki: Mi na Gado Manpikin?”

Foe di den Boekoe foe bijbel e kari srefi onregtfardiki libisma kroetoeman „gado”, dan sortoe fowtoe den djoe disi kan feni na Jesus, foe di a e taki: „Mi na Gado Manpikin”? Jesus e taki moro fara: „Efoe mi no e doe den wroko foe mi Tata, no bribi mi. Ma efoe mi e doe den, ala di oenoe no e bribi mi, dan bribi den wroko, so taki oenoe kan kon sabi èn kan tan sabi taki a Tata de ini wánfasi nanga mi èn mi de ini wánfasi nanga a Tata.”

Te Jesus e taki disi, dan den djoe e proeberi foe graboe en. Ma a e lon gowe, neleki fa a ben doe disi kaba na a Wiwirikampoe-fesa. A e gowe libi Jerusalem èn e teki waka go na abrasei foe Jordan liba, na a presi pe Johanes pikinmoro fo jari bifo ben bigin foe dopoe sma. Soleki fa a sori, dan a presi disi no de so fara foe a zuidsei sjoro foe a Se foe Galilea, di de so wan toe dei foe Jerusalem, te den ben sa teki waka go drape.

Foeroe sma e kon na Jesus na a presi disi èn den e bigin taki: „A troe, taki Johanes no ben doe no wan enkri marki, ma ala sani di Johanes ben taki foe a man disi, ben de troe.” Èn na so, foeroe sma djaso e poti bribi na ini Jesus. Johanes 10:22-42; 4:26; 8:23, 58; Mateus 16:20.

▪ Fa Jesus wani, taki sma moesoe kon sabi en leki a Krestes?

▪ Fa Jesus nanga en Tata na wán?

▪ Foe san ede kande, den djoe e taki dati Jesus e meki ensrefi tron wan gado?

▪ Fa a e kon na krin na ini den wortoe di Jesus e teki taki foe den Psalm, dati a no e taki dati a de a srefi leki Gado?