Den e kiri wan sma na wan frijari-oso
Kapitel 51
Den e kiri wan sma na wan frijari-oso
BAKA DI Jesus gi den apostel foe en leri, a e seni den toe na toe go na ini a kontren. Kande den brada Petrus nanga Andreas e go makandra, neleki Jakobus nanga Johanes, Filipus nanga Bartolomeus, Tomas nanga Mateus, Jakobus nanga Tadeus, èn Simon nanga Judas Iskariòt. Ala presi pe den siksi paar evangelie-preikiman e kon, den e froeteri a boen njoensoe foe a Kownoekondre èn den e dresi sma na wan wondroe fasi.
Disiten, Johanes a Dopoeman de na ini doengroe-oso ete. A drape pikinmoro toe jari kaba. Kande joe e memre ete taki Johanes ben froeklari na poebliki taki a no ben de wan boen sani di Herodes Antipas ben doe, foe teki Herodias, a wefi foe en brada Filipus, leki en eigi wefi. Foe di Herodes Antipas ben taki dati a ben waka baka a Wet foe Moses, meki nanga reti Johanes ben tjari a libi disi di den ben libi nanga makandra, kon na doro leki soetadoe. Dati meki Herodes ben meki den trowe Johanes na ini doengroe-oso, kande foe di Herodias ben soetoe faja gi disi.
Herodes Antipas e froestan taki Johanes na wan regtfardiki man èn a e arki Johanes srefi nanga prisiri. Foe dati ede, a no sabi kwetikweti san foe doe nanga en. Herodias, na a tra sei, no wani si Johanes na ai èn a e tan soekoe wan fasi foe meki den kiri en. Te foe kaba, na okasi di a ben wakti, e kon.
Sjatoe bifo a Paska foe 32 G.T., Herodes e orga wan bigi fesa gi en frijaridei. Ala den hei lantiman foe Herodes nanga den legre ofsiri de na a fesa, èn den prenspari borgoe foe Galilea de drape toe. Te a neti doro moi fara kaba, dan den e seni Salome, a jongoe oemapikin foe Herodias di a ben kisi nanga en fosi masra Filipus, go na inisei foe dansi gi den fisitiman. Den mansma di de drape, e prisiri srefisrefi foe a fasi fa Salome e dansi.
Herodes e prisiri srefisrefi nanga Salome. „Aksi ala san joe wani, èn mi sa gi joe dati”, a e froeklari. A e sweri srefi: „Ala san joe e aksi, mi sa gi joe dati, awansi a de afoe foe mi kownoekondre.”
Bifo Salome e piki en, a e go na dorosei foe aksi en mama rai. „San mi moesoe aksi?”, a e aksi.
Te foe kaba, now na okasi de! „Na ede foe Johanes a Dopoeman”, Herodias e piki sondro foe draidrai.
Esi-esi Salome e go baka na Herodes èn e aksi: „Mi wani, taki nownowde joe e gi mi na ede foe Johanes a Dopoeman na tapoe wan plata preti.”
Herodes e sari srefisrefi. Ma foe di den fisitiman foe en jere a sweri foe en, meki a no e prefoeroe foe weigri, awansi dati wani taki, dati den sa kiri wan sma di no doe noti. Wantewante den e seni wan sma go na a doengroe-oso foe go doe a takroe sani dati foe kiri Johanes. Sjatoe baka disi a e drai kon baka nanga na ede foe Johanes na tapoe wan plata preti èn a e gi en na Salome. En, foe en sei, e gi en na en mama. Te den disipel foe Johanes e jere san pasa, den e kon teki en skin èn beri en, èn dan den e tjari a boskopoe go gi Jesus.
Baka ten, te Herodes e jere taki Jesus e dresi sma èn e trowe ogri jeje go na doro, a e skreki, bika a frede taki Jesus troetroe na Johanes di opo baka na dede. Foe sensi a ten dati a wani troetroe foe miti Jesus, no foe jere fa a e preiki, ma foe kon sabi seiker efoe a frede foe en abi wan boen gron efoe no. Mateus 10:1-5; 11:1; 14:1-12; Markus 6:14-29; Lukas 9:7-9.
▪ Foe san ede Johanes de na ini doengroe-oso, èn foe san ede Herodes no wani kiri en?
▪ Fa a doe kon, taki Herodias man meki den kiri Johanes te foe kaba?
▪ Foe san ede Herodes wani miti Jesus, baka di Johanes dede?