Den jongoe jari foe Jesus na oso
Kapitel 9
Den jongoe jari foe Jesus na oso
NASARET, pe Jesus e gro kon bigi, na wan pikin foto di no de prenspari. A foto de na ini a pikin bergikondre foe wan kontren di nen Galilea, no so fara foe a moi lagipresi foe Jisre-èl.
Te Josef nanga Maria e kon dja foe Egipti nanga Jesus, di kande abi toe jari, dan a sori leki en de a wan-enkri pikin foe Maria. Ma dati no e tan so. Baka wan pisi ten den e kisi Jakobus, Josef, Simon nanga Judas, èn Maria nanga Josef e kisi oemapikin toe. Te foe kaba, Jesus abi so wan siksi brada nanga sisa di jongoe moro en.
Jesus abi tra famiri toe. Wi sabi kaba foe Johanes, a neef foe en di owroe moro en. A e libi boen fara na Judea. Ma moro krosibei na Galilea, Salome e libi di, soleki fa a sori, de wan sisa foe Maria. Salome trow nanga Sebedeus. So boen, den toe manpikin foe den, Jakobus nanga Johanes, moesoe de neef foe Jesus. Wi no sabi efoe Jesus, di a ben gro kon bigi, ben waka foeroe nanga den boi disi, ma baka ten den e tron krosibei kompe.
Josef moesoe wroko boen tranga foe sorgoe en osofamiri di e kon moro bigi. A de wan temreman. Josef e kweki Jesus leki en eigi manpikin, èn dati meki sma e kari Jesus „a manpikin foe a temreman”. Josef e leri Jesus a temrewroko toe èn Jesus e leri a wroko boen. Dati meki baka ten den sma e taki foe Jesus: „Disi na a temreman.”
Na ini a libi foe na osofamiri foe Josef, na anbegi foe Jehovah Gado e teki a moro prenspari presi. Akroederi a Wet foe Gado, Josef nanga Maria e gi den pikin foe den leri na jejefasi ’te den e sidon na ini den oso, te den de na pasi e go, te den e didon èn te den e opo’. Wan snoga de na Nasaret, èn wi kan de seiker taki doronomo Josef e teki en osofamiri go drape toe foe anbegi Gado. Ma a no abi misi taki, a moro bigi prisiri foe den na te den e go na Jehovah en tempel di de na Jerusalem. Mateus 13:55, 56; 27:56; Markus 15:40; 6:3; Deuteronomium 6:6-9.
▪ Omeni jongoe brada nanga sisa Jesus ben abi awansi fa a no fa, èn fa wan toe foe den nen?
▪ Soema na dri neef foe Jesus, di sma sabi boen?
▪ Sortoe grontapoe wroko Jesus e leri te foe kaba, èn foe san ede?
▪ Sortoe prenspari leri Josef e gi en osofamiri?