Den lasti leisi di a e sori ensrefi, èn a Pinksterfesa foe 33 G.T.
Kapitel 131
Den lasti leisi di a e sori ensrefi, èn a Pinksterfesa foe 33 G.T.
NA WAN seiker momenti Jesus e seti sani gi ala den erfoe apostel foe en foe den miti en na wan bergi na Galilea. Soleki fa a sori, dan den e froeteri tra disipel foe a konmakandra, èn ala nanga ala moro leki 500 sma e kon makandra. Fa a konmakandra disi e sori foe de wan prisiri wan, te Jesus e sori ensrefi na den sma èn e bigin gi den leri!
Wan foe den sani di Jesus e tjari kon na krin gi a bigi ipi sma, na taki Gado gi en ala makti na hemel èn na grontapoe. „Go foe dati ede”, a e gi den deki-ati, „èn meki disipel foe sma foe ala nâsi èn dopoe den na ini a nen foe a Tata èn foe a Manpikin èn foe a santa jeje, èn leri den foe doe ala den sani di mi komanderi oenoe.”
Prakseri foe disi pikinso! Mansma, oemasma nanga pikin-nengre, den alamala kisi a srefi komando disi foe teki prati na a wroko foe meki disipel. Gensman sa proeberi foe tapoe a preiki di den o preiki èn a gi di den o gi sma leri, ma Jesus e trowstoe den nanga den wortoe: „Loekoe! Mi de nanga oenoe ala den dei te na a kaba foe a seti foe sani.” Nanga jepi foe a santa jeje, Jesus e tan nanga den bakaman foe en foe jepi den foe doe a diniwroko foe den.
Ala nanga ala, na ini wan pisi ten foe 40 dei baka na opobaka foe en, Jesus e sori ensrefi libilibi na den disipel foe en. Na ini a ten disi pe a e sori ensrefi, a e leri den foe a Kownoekondre foe Gado, èn a e poti krakti na tapoe san na den frantiwortoe di den abi leki disipel foe en. Na wán okasi a e sori ensrefi na en afoe-brada Jakobus srefi èn a e overtoigi a man disi, di fosi no ben bribi, taki En na troetroe a Krestes.
Ala di den apostel de ete na Galilea, dan soleki fa a sori, Jesus e taigi den foe drai go baka na Jerusalem. Te a e kon makandra nanga den drape, dan a e taigi den: „No komoto na Jerusalem, ma tan wakti a sani di a Tata pramisi, a sani di oenoe ben jere foe mi, bika a troe, taki Johanes ben dopoe sma nanga watra, ma baka wan toe dei oenoe sa kisi dopoe ini santa jeje.”
Baka ten Jesus e kon makandra baka nanga den apostel foe en, èn a e tjari den go dorosei foe a foto te na ini a birti foe Betania, di de na a sei foe na Olijfbergi di de na a owstoesei. A de wan froewondroe sani taki, awansi ala sani di a taigi den, taki a no de langa moro fosi a sa go na hemel, tokoe ete den e bribi taki a Kownoekondre foe en sa seti na grontapoe. Foe dati ede den e aksi en: „Masra, na ini a ten disi joe e opo a kownoekondre gi Israèl baka?”
Na presi foe proeberi baka foe sori den taki den no abi a joisti prakseri, Jesus e piki den nomo: „A no de gi oenoe foe kisi sabi foe den ten noso pisi ten di a Tata poti na ondro en eigi makti.” Ala di a e poti krakti ete wan leisi na tapoe a wroko di den moesoe doe, a e taki: „Oenoe sa kisi krakti te a santa jeje kon na oenoe tapoe, èn oenoe sa de kotoigi foe mi na Jerusalem èn na heri Judea èn na Samaria èn te na den moro farawe presi foe grontapoe.”
Jesus e bigin opo go na hemel, ala di den e tanapoe e loekoe ete, èn baka dati wan wolkoe e tapoe en, so taki den no man si en. Baka di a poeroe en libisma skin, a e opo go na hemel leki wan jeje sma. Te den erfoe disipel e tan loekoe go na loktoe, toe man ini weti krosi e sori densrefi na den. Den engel disi di materialiseer densrefi, e aksi: „Man foe Galilea, foe san ede oenoe e tanapoe e loekoe go na loktoe? A Jesus disi, di den ben teki foe oenoe go na loktoe, sa kon foe dati ede na a srefi fasi leki fa oenoe si en e go na loktoe.”
A fasi fa Jesus gowe libi grontapoe didjonsro, ben de sondro wan lo poebliki pranpran èn sondro opo-opo, èn soso den getrow bakaman foe en ben tanapoe e loekoe. Na so a sa drai kon baka na a srefi fasi — sondro poebliki pranpran èn sondro opo-opo, ala di soso den getrow bakaman foe en sa si taki a drai kon baka èn taki a denoja foe en ini Kownoekondre makti bigin.
Now den apostel e saka kon foe na Olijfbergi, e abra a Lagipresi foe Kidron èn e go baka na ini Jerusalem. Den e tan drape, foe di den e gi jesi na a gebod foe Jesus. Tin dei na baka, na a djoe Pinksterfesa foe 33 G.T., ala di so wan 120 disipel kon makandra na ini wan kamra na wan tapoe sodro na Jerusalem, wan babari neleki wan tranga winti di e wai, e foeroe a heri oso wantronso. Sma e bigin si tongo leki di foe faja, èn na tapoe ibriwan sma di de drape, wan tongo foe faja de foe si, èn ala den disipel e bigin taki na ini difrenti tongo. Disi na a kanti di santa jeje kanti kon soleki fa Jesus ben pramisi! Mateus 28:16-20; Lukas 24:49-52; 1 Korentesma 15:5-7; Tori foe den Apostel 1:3-15; 2:1-4.
▪ Na soema Jesus e gi leri na wan bergi na Galilea bifo a e gowe, èn san na den leri disi?
▪ Fa Jesus e trowstoe den disipel foe en, èn na sortoe fasi a sa tan nanga den?
▪ O langa baka na opobaka foe Jesus, a e sori ensrefi na den disipel foe en, èn san a e leri den?
▪ Na sortoe sma di kande no ben de wan disipel bifo a dede foe Jesus, Jesus e sori ensrefi?
▪ Sortoe lasti toe konmakandra Jesus abi nanga den apostel foe en, èn san e pasa na den okasi disi?
▪ Fa Jesus sa drai kon baka na a srefi fasi leki fa a gowe?
▪ San e pasa na a Pinksterfesa foe 33 G.T.?