Kapitel 80

Den skapoekoi nanga a skapoeman

JESUS kon na Jerusalem gi na Inwijdingfesa, noso Tjanoekafesa, wan fesa pe den e memre taki den ben gi a tempel abra na Jehovah foe a di foe toe leisi. Antiochus IV Epiphanes ben teki Jerusalem abra na ini 168 b.G.T., so wan toe hondro jari bifo, èn a ben meki a tempel nanga a tempel-altari lasi en santafasi. Ma dri jari na baka, den Israèlsma ben teki Jerusalem abra baka èn den ben gi a tempel abra baka na Jehovah. Baka dati, wan fesa ben hori ala jari pe den ben memre a gi di den ben gi a tempel abra baka na Jehovah.

Den e hori na Inwijdingfesa disi na tapoe 25 Kislev, a djoe moen di e kroederi nanga a lasti pisi foe november èn nanga a fosi pisi foe december foe wi disiten kalender. So boen, soso pikinso moro leki 100 dei de ete, fosi den sa hori a toemoesi prenspari Paskafesa foe 33 G.T. Foe di a de a kowroe pisi ten foe a jari, meki na apostel Johanes e taki foe „winter”.

Now Jesus e gebroiki wan agersitori pe a e taki foe dri skapoekoi èn foe a prati di a abi leki a Toemoesi Boen Skapoeman. A fosi skapoekoi di a e taki foe en, e prenki a seti foe a Wetfroebontoe foe Moses. A Wet ben dini leki wan skotoe di ben e poti den djoe aparti foe den pori wroko foe den sma di no ben de na ini a spesroetoe froebontoe disi nanga Gado. Jesus e tjari kon na krin: „Foe troe, foe troe, mi e taigi oenoe: A sma di no e pasa a doro foe go na ini a skapoekoi, ma di e kren kon na inisei na wan tra presi, a sma dati na wan foefoeroeman èn wan rofer. Ma a sma di e pasa a doro foe go na inisei, en na a skapoeman foe den skapoe.”

Tra sma ben kon èn ben taki dati den na a Mesias, noso Krestes, ma den no ben de a troe skapoeman di Jesus e taki moro fara foe en: „A doro-waktiman e opo doro gi a sma disi, èn den skapoe e arki en sten, èn a e kari en eigi skapoe na den nen èn a e tjari den go na dorosei. . . . Den no sa waka na baka wan freimdesma kwetikweti, ma den sa lon gowe foe en, foe di den no sabi a sten foe freimdesma.”

A „doro-waktiman” foe a fosi skapoekoi ben de Johanes a Dopoeman. Leki a doro-waktiman, Johanes ’ben opo doro’ gi Jesus, foe di a ben meki den agersi skapoe disi kon sabi Jesus leki a sma di ben sa tjari den go na dorosei foe njan grasi. Den skapoe disi, di Jesus e kari na den nen èn e tjari go na dorosei, e kisi pasi foe go na ini wan tra skapoekoi te foe kaba, soleki fa a e tjari kon na krin: „Foe troe, foe troe, mi e taigi oenoe: Mi na a doro foe den skapoe”, dati wani taki, a doro foe wan njoen skapoekoi. Te Jesus e meki a njoen froebontoe nanga den disipel foe en èn e kanti santa jeje foe hemel kon na den tapoe na a Pinksterfesa di e kon baka dati, dan den sa kisi pasi foe go na ini a njoen skapoekoi disi.

Jesus e go moro fara foe tjari kon na krin sortoe prati a abi, èn a e taki: „Mi na a doro; a sma di pasa mi go na inisei, sa kisi froeloesoe, èn a sa go na inisei èn go na doro èn a sa feni grasi. . . . Mi kon, so taki den ben sa abi libi èn ben sa abi dati pasa marki. . . . Mi na a toemoesi boen skapoeman, èn mi sabi mi skapoe èn mi skapoe sabi mi, neleki fa a Tata sabi mi èn mi sabi a Tata; èn mi e gi mi sili abra gi a boen foe den skapoe.”

A no ben de so langa ete, taki Jesus ben trowstoe den bakaman foe en nanga den wortoe: „No frede, pikin ipi, bika oen Tata feni en boen foe gi oenoe a kownoekondre.” A pikin ipi disi, di te foe kaba sa de wan groepoe foe 144.000 sma, e kon na ini a njoen noso di foe toe skapoekoi disi. Ma Jesus e taki moro fara: „Mi abi tra skapoe ete, di no de foe a koi disi; so srefi den dati mi moesoe tjari kon, èn den sa arki mi sten, èn den sa tron wán ipi, wán skapoeman.”

Foe di den „tra skapoe” „no [de] foe a koi disi”, dan den moesoe de foe wan tra koi, wan di foe dri koi. Den skapoe na ini den toe lasti koi disi, noso skapoepen, sa go na difrenti presi. A „pikin ipi” na ini a wan koi, sa tiri nanga Krestes na hemel, èn den „tra skapoe” na ini a tra koi, sa libi na ini a Paradijs na grontapoe. Tokoe, ala di den skapoe de ini toe koi, den no e djaroesoe èn den no abi a firi toe taki den poti den aparti, bika soleki fa Jesus e taki, den „e tron wán ipi” na ondro „wán skapoeman”.

A Toemoesi Boen Skapoeman, Jesus Krestes, de klariklari foe gi en libi gi den skapoe na ini ala toe skapoekoi nanga en friwani. „Foe mi srefi, mi e gi en abra”, a e taki. „Mi abi a makti foe gi en abra, èn mi abi a makti foe kisi en baka. A komando foe doe disi, mi ben kisi foe mi Tata.” Te Jesus e taki disi, dan wan prati e kon na mindri den djoe.

Foeroe sma na ini na ipi e taki: „A abi wan ogri jeje na en tapoe èn a law. Foe san ede oenoe e arki en?” Ma trawan e piki: „Disi a no wortoe foe wan sma di abi wan ogri jeje na en tapoe.” Kande den e sori go baka na tapoe san ben pasa wan toe moen bifo, di a ben dresi a man di ben gebore breni, èn den e taki moro fara: „Wan ogri jeje no man opo den ai foe breni sma, a no so?” Johanes 10:1-22; 9:1-7; Lukas 12:32; Openbaring 14:1, 3; 21:​3, 4; Psalm 37:29.

▪ San na a Inwijdingfesa, èn o ten den e hori en?

▪ San na a fosi skapoekoi, èn soema na a doro-waktiman foe a koi disi?

▪ Fa a doro-waktiman e opo a doro gi a Skapoeman, èn na sortoe sani den skapoe e kisi pasi foe go na ini baka dati?

▪ Soema de na ini den toe koi foe a Toemoesi Boen Skapoeman, èn omeni ipi den e tron?