Den waka di den ben teki go na Jerusalem
Kapitel 10
Den waka di den ben teki go na Jerusalem
LENTE doro. Èn gi na osofamiri foe Josef, makandra nanga den mati nanga den famiri foe den, a ten doro foe teki waka go na Jerusalem foe hori a Paska, soleki fa den e doe ala jari na ini lente. Soleki fa a de ala leisi, dan den feni en wan span sani foe bigin nanga a waka di e teki so wan 100 kilometer. Jesus abi 12 jari now, èn nanga spesroetoe belangstelling a e wakti a ten di a fesa sa hori.
Gi Jesus nanga en famiri, a Paska a no wan afersi foe wán dei nomo. Den e tan toe gi a seibi-dei Fesa foe Brede sondro sroedeki, di e kon baka a Paska ten, èn di den e si leki wan pisi foe a fesa disi. A bakapisi de, taki a heri waka di e bigin na Nasaret pe den e libi, makandra nanga a tan di den e tan na Jerusalem, e teki so wan toe wiki. Ma a jari disi den e tan moro langa, foe di wan sani e pasa nanga Jesus.
A problema e kon na krin te den e libi Jerusalem foe go na oso baka. Josef nanga Maria denki taki Jesus de nanga a groepoe famiriman nanga mati di e teki waka makandra nanga den. Ma te den e tapoe a waka foe go sribi, Jesus no kon na den ete, èn den e go soekoe en na mindri den sma di e waka nanga den. Na no wan presi a de foe feni. Foe dati ede Josef nanga Maria e drai go baka te na Jerusalem foe go soekoe en.
Wan heri dei den e soekoe, ma foe soso. Na a di foe toe dei den no man feni en toe. Te foe kaba, na a di foe dri dei den e go na a tempel. Drape, na ini wan foe den konmakandra presi, den e si Jesus e sidon na mindri den djoe leriman, e arki den èn e poti aksi gi den.
„Mi pikin, foe san ede joe doe disi nanga wi?”, Maria e aksi. „Joe papa nanga mi ben broeja srefisrefi, e waka e soekoe joe alape.”
Jesus e froewondroe taki den no ben sabi pe a ben de foe feni. „Foe san ede oenoe ben moesoe go soekoe mi?”, a e aksi. „Oenoe no ben sabi taki mi moesoe de na ini na oso foe mi Tata?”
Jesus no kan froestan foe san ede en papa nanga mama no ben sa sabi disi. Baka dati, Jesus e go na oso baka nanga en papa nanga mama èn a e tan saka ensrefi na den ondro. A e tan kisi moro koni èn en skin e gro kon bigi, èn Gado so boen leki libisma lobi en. Ija, foe en pikin-nengre ten kaba, Jesus e gi wan toemoesi boen eksempre, no wawan foe di a e feti na baka jeje afersi, ma foe di a e sori lespeki gi en papa nanga mama toe. Lukas 2:40-52; 22:7.
▪ Sortoe waka Jesus e teki doronomo nanga en famiri na ini lente, èn o langa a waka disi e teki?
▪ San e pasa na a waka di den e teki, te Jesus abi twarfoe jari?
▪ Sortoe eksempre Jesus e gi den jongoe sma na ini a ten disi?