Kapitel 29

Doe boen wroko na Sabadei

A DE a lente foe 31 G.T. Wan toe moen pasa kaba sensi Jesus ben taki nanga na oema na a peti na Samaria, ala di Jesus ben de na pasi foe Judea go na Galilea.

Baka di Jesus gi boen foeroe leri na sma na ini heri Galilea, a e teki waka now foe go na Judea baka, pe a e preiki na ini den snoga. Te joe teki a diniwroko foe en na Judea a leisi disi, gersi a wan na Galilea, dan bijbel no e froeteri foeroe foe den sani di Jesus doe di a ben de na Judea èn foe den moen di a ben tan djaso, baka a Paska di pasa. Soleki fa a sori, dan den sma na Judea no ben teki a diniwroko foe en so boen, leki fa den sma na Galilea ben doe dati.

Heri esi Jesus de na pasi foe go na Jerusalem, a mama-foto foe Judea, foe de na a Paska foe 31 G.T. Djaso, krosibei foe a Skapoeportoe foe a foto, a pisi watra de di nen Bètsata, pe foeroe siki sma, breniwan nanga malengriwan e kon. Den e bribi taki sma kan kon betre te den e saka go na ini a watra te a e bigin seki.

Na Sabadei, èn Jesus e si wan man na a pisi watra, di siki 38 jari kaba. Foe di Jesus sabi taki a man siki so langa kaba, meki a e aksi: „Joe wani kon gosontoe?”

A e piki Jesus: „Masra, mi no abi no wan sma foe tjari mi go na ini a watra te a e seki; ma te mi e go, tra sma e go fosi mi na ini.”

Jesus e taigi en: „Opo tanapoe, teki joe bedi èn waka.” Ne a man e kon gosontoe wantewante, a e teki en bedi, èn e bigin waka!

Ma te den djoe e si a man, den e taki: „Na Sabadei, èn soleki fa a Wet taki, dan joe no mag foe tjari a bedi.”

A man e piki den: „A sma srefi di ben meki mi kon betre, na en ben taigi mi: ’Teki joe bedi èn waka.’”

„Soema na a sma di ben taigi joe: ’Teki joe bedi èn waka’?”, den e aksi. Jesus ben waka gowe, bika someni sma ben de drape èn a sma di ben kon gosontoe no ben sabi fa Jesus nen. Ma baka ten, Jesus nanga a man e miti na ini a tempel èn a man e kon sabi soema ben meki en kon betre.

So boen, a man di ben kon betre e go soekoe den djoe foe froeteri den taki na Jesus ben meki en kon gosontoe. Te den djoe e jere disi, dan den e go na Jesus. Foe san ede? Foe kon sabi fa a doe kon, taki a man doe den wondroe sani disi? Nôno. Ma na foe feni fowtoe na en, foe di a e doe den boen sani disi na Sabadei. Èn den e bigin froefolgoe en srefi! Lukas 4:44; Johanes 5:1-16.

▪ O langa a de kaba sensi Jesus ben de na Judea a lasti leisi?

▪ Foe san ede a pisi watra di nen Bètsata, pôpi so?

▪ Sortoe wondroe Jesus e doe na a pisi watra, èn san den djoe e doe na tapoe dati?