Kapitel 16

Faja gi na anbegi foe Jehovah

DEN afoe-brada foe Jesus — den tra manpikin foe Maria — na Jakobus, Josef, Simon nanga Judas. Bifo den disi e bigin teki waka go nanga Jesus èn nanga den disipel foe en go na Kaperna-um, wan foto di de krosibei foe a Se foe Galilea, a kan de taki den e go fosi na den oso na Nasaret, so taki na osofamiri kan teki den sani di den sa abi fanowdoe.

Ma foe san ede Jesus e go na Kaperna-um na presi foe go doro nanga en diniwroko na Kana, na Nasaret noso na wan tra presi na ini den pikin bergi foe Galilea? Wán foe den sani na, foe di Kaperna-um de na wan moro betre presi èn a de krin taki a foto disi moro bigi. Na so a de toe, taki a moro bigi pisi foe den njoen disipel foe Jesus e libi na Kaperna-um noso krosibei foe a foto dati, so taki den no abi foe libi a tanpe foe den foe kisi leri foe en.

A ten di Jesus e tan na Kaperna-um, a e doe foeroe wondroe wroko, soleki fa ensrefi e kotoigi foe dati wan toe moen na baka. Ma a no e teki langa fosi Jesus nanga den kompe foe en de baka na pasi foe gowe. Na lente, èn den de na pasi foe go na Jerusalem so taki den kan de na a Paska foe 30 G.T. Te den de drape, dan den disipel foe Jesus e leri sabi en foe wan sei di kande den no ben si ete.

Soleki fa a wet foe Gado e taki, dan den Israèlsma moesoe tjari meti ofrandi. So boen, foe meki en moro makriki gi den, meki bisnisman na Jerusalem e seri meti noso fowroe, so taki den sma kan tjari ofrandi. Ma den e seri den sani foe den leti na ini a tempel, èn den e foefoeroe den sma, foe di den e aksi den toemoesi foeroe moni.

Foe di Jesus ati e bron srefisrefi, meki a e meki wan wipi foe titei èn a e jagi den seriman go na dorosei. A moni foe den sma di e broko moni, a e trowe na gron, èn a e drai den tafra tapoe. „Teki den sani disi komoto dja!”, a e bari gi den sma di e seri den doifi. „No meki na oso foe mi Tata moro langa wan oso foe seri sani!”

Te den disipel foe Jesus e si disi, dan den e memre a profeititori di ben taki foe a Manpikin foe Gado: „A faja gi joe oso sa njan mi krinkrin.” Ma den djoe e aksi: „Sortoe marki joe kan sori wi, foe di joe e doe den sani disi?” Jesus e piki: „Broko a tempel disi poeroe èn ini dri dei mi sa seti en baka.”

Den djoe e denki taki Jesus e taki foe a troetroe tempel, so boen den e aksi: „A tempel disi ben bow na ini fotenti na siksi jari, èn joe sa seti en baka ini dri dei?” Ma Jesus e taki foe a tempel foe en skin. Èn dri jari na baka, den disipel foe en e memre den wortoe disi foe en, te a kisi wan opobaka na dede. Johanes 2:12-22; Mateus 13:55; Lukas 4:23.

▪ Pe Jesus e teki waka go, baka a trow-oso na Kana?

▪ Foe san ede Jesus ati e bron, èn san a e doe?

▪ San den disipel foe Jesus e memre, te den e si den sani di a e doe?

▪ San Jesus e taki foe „a tempel disi”, èn san a wani taki nanga dati?