Kapitel 22

Fo disipel e kisi wan kari

BAKA DI den ben proeberi foe kiri Jesus na Nasaret, a presi pe a e libi, a e froisi go na a foto Kaperna-um krosibei foe a Se foe Galilea. Nanga disi, ete wan tra profeititori foe Jesaja e kon troe. Dati na a profeititori di ben taki na fesi dati sma foe Galilea di e libi krosibei foe a se, ben sa si wan bigi leti.

Djaso, te Jesus e doe en Kownoekondre preikiwroko di e skèin a leti kon, a e feni fo foe en disipel. Den disi ben waka kaba nanga en, ma den ben go doe a fisiwroko foe den baka, di den ben drai kon baka nanga Jesus foe Judea. Soleki fa a sori, dan Jesus e soekoe den now, foe di a ten doro taki a moesoe abi fasti jepiman di de alaten nanga en, èn di a kan leri foe go doro nanga a diniwroko te a no sa de moro.

So boen, te Jesus e waka pasa a sjorosei èn a e si Simon Petrus nanga den kompe foe en e wasi den srepi foe den, dan a e go na den. A e kren go na ini a boto foe Petrus èn e aksi en foe wai a boto pikinso go na mindri. Te den doro moi fara kaba, dan Jesus e sidon na ini a boto èn a e bigin gi leri na den ipi sma di e tanapoe na sjorosei.

Baka dati, Jesus e taigi Petrus: „Wai a boto go na dipi, èn oen saka den srepi foe oenoe foe kisi fisi.”

„Leriman,” Petrus e piki, „heri neti wi ben wroko tranga èn wi no ben kisi noti, ma mi sa saka den srepi foe di joe aksi so.”

Te den saka den srepi, dan den e kisi someni fisi taki den srepi e soekoe foe priti. Esi-esi den man e wai anoe kari den patna foe den, di de na ini wan boto no fara foe den, foe kon jepi den. A no e teki langa fosi den toe boto foeroe nanga someni fisi, taki den e soekoe foe soengoe. Te Petrus e si disi, dan a e fadon na en kindi na fesi foe Jesus èn a e taki: „Masra, komoto na mi fesi, bika mi na wan sondoe man.”

„No frede moro”, Jesus e piki. „Foe bigin nanga now joe sa kisi libisma libilibi.”

Jesus e gi Andreas, a brada foe Petrus, wan kari toe. „Kon waka na mi baka”, a e gi den tranga, „èn mi sa meki oenoe kon tron fisiman foe libisma.” Jakobus nanga Johanes, den manpikin foe Sebedeus, di de patna foe Petrus nanga Andreas na ini a fisiwroko, e kisi a srefi kari, èn den toe e teki a kari sondro foe draidrai. So boen, den fo man disi e libi a fisiwroko foe den èn den e tron den fosi fo fasti bakaman foe Jesus, di de alaten nanga en. Lukas 5:1-11; Mateus 4:13-22; Markus 1:16-20; Jesaja 9:1, 2.

▪ Foe san ede Jesus e kari den disipel foe en foe waka na en baka, èn soema na den wan disi?

▪ Sortoe wondroe e frede Petrus?

▪ Sortoe fisiwroko Jesus e kari den disipel foe en foe kon doe?