Kapitel 24

Foe san ede Jesus ben kon na grontapoe

JESUS nanga den fo disipel foe en abi foeroe foe doe, a dei di den de na Kaperna-um. Te na den neti-joeroe ete, den sma foe Kaperna-um e tjari ala den siki sma foe den kon na en foe a dresi den. A no ben abi ten foe go na wan presi foe de en wawan.

Now a de froekoefroekoe mamanten foe a tra dei. Jesus e opo te a doengroe ete, èn a e go na dorosei, ala di a de en wawan. A e go na wan tiri presi pe a kan taki en wawan nanga en Tata ini begi. Ma Jesus no e tan langa en wawan drape, bika te Petrus nanga den trawan si taki a no de, dan den e go soekoe en.

Te den feni Jesus, Petrus e taki: „Ala sma e soekoe joe.” Den sma foe Kaperna-um wani, taki Jesus moesoe tan na den. Troetroe den e warderi san a doe gi den! Ma a de so, taki Jesus ben kon na grontapoe na a fosi presi foe doe den sortoe wondroe dati foe dresi sma? San ensrefi e taki foe a tori disi?

Soleki fa wán bijbel tori e froeteri, dan Jesus e piki den disipel foe en: „Meki wi go na wan tra presi, na den dorpoe di no de so fara foe dja, so taki mi kan preiki drape toe, bika foe a sani disi ede, mi kon dja.” Ala di den sma e gi Jesus tranga foe tan, tokoe a e froeteri den: „Mi moesoe meki a boen njoensoe foe Gado kownoekondre bekènti na tra foto toe, bika foe a sani disi ede mi ben seni kon.”

Ija, Jesus ben kon na grontapoe moro foeroe foe preiki a Kownoekondre foe Gado, di sa regtfardiki a nen foe en Tata èn di sa poeroe ala libisma siki na pasi foe têgo. Ma foe boeweisi taki na Gado ben seni en kon, meki Jesus e dresi sma na wan wondroe fasi. Na a srefi fasi, hondrohondro jari na fesi disi, Moses ben doe wondroe foe sori taki a ben de a foetoeboi foe Gado.

Now, te Jesus e gowe libi Kaperna-um foe go preiki na ini tra foto, den fo disipel foe en e go nanga en. Den fo disi na Petrus nanga en brada Andreas, Johanes nanga en brada Jakobus. Joe kan memre ete taki soso a wiki na fesi, den ben kisi kari foe de den fosi kompe wrokoman foe Jesus, di e waka makandra nanga en.

Jesus en preikiwaka na Galilea, ala di den fo disipel foe en de nanga en, e waka boen srefisrefi! Ija, a njoensoe foe a wroko foe en e panja go srefi te na heri Siria. Bigi ipi sma foe Galilea, Judea, nanga abrasei foe Jordan liba, e waka baka na Jesus nanga den disipel foe en. Markus 1:35-39; Lukas 4:42, 43; Mateus 4:23-25; Exodus 4:1-9, 30, 31.

▪ San e pasa a mamanten baka di Jesus ben abi wan dei pe a ben abi foeroe foe doe na Kaperna-um?

▪ Foe san ede Jesus ben seni kon na grontapoe, èn foe san ede a ben doe den wondroe foe en?

▪ Soema e go makandra nanga Jesus na en preikiwaka na Galilea, èn san den sma e doe tapoe a wroko foe Jesus?