Kapitel 99

Jesus e gi leri na Jerikow

HERI ESI Jesus nanga den ipi sma di e teki waka makandra nanga en e doro Jerikow, wan foto di e teki wan sani foe wan dei, te joe ben sa teki waka komoto na Jerusalem foe kon drape. Soleki fa a sori, dan Jerikow na wan dobroe foto. A wan na a owroe djoe foto èn a moro njoenwan na wan foto foe den Romesma, di de so wan wán nanga afoe kilometer foe na owroe djoe foto. Te den ipi sma e waka komoto na a owroe foto èn e doro krosibei foe a njoenwan, dan toe breni begiman e jere a djoegoedjoegoe. Wán foe den nen Bartimeus.

Te Bartimeus jere taki na Jesus e waka pasa, dan en nanga en kompe e bigin bari taki: „Masra, sari foe wi, Manpikin foe David!” Te na ipi sma e bari den foe tapoe den mofo, dan den begiman e bari moro tranga srefi: „Masra, sari foe wi, Manpikin foe David!”

Jesus e tan tanapoe, te a e jere a babari. A e aksi den sma di de nanga en foe tjari den sma kon na en di e bari so tranga. Den sma disi e go na den breni begiman èn e taigi wán foe den: „Abi deki-ati, opo tanapoe, a e kari joe.” Nanga bigi prisiri a breniman e trowe en tapoesei krosi, e djompo opo, èn e go na Jesus.

„San joe wani mi doe gi joe?”, Jesus e aksi.

„Masra, meki wi ai kon opo”, den toe breniman e begi.

Nanga sari na ati, Jesus e fasi den ai foe den. Soleki fa a tori foe Markus e taki, dan Jesus e taigi wán foe den: „Go, joe bribi meki joe kon betre.” Wantewante den breni begiman kan si, èn a no abi misi taki den toe man disi e bigin gi Gado glori. Te ala sma si san pasa, dan so srefi den e prèise Gado. Sondro draidrai, Bartimeus nanga en kompe e bigin waka na Jesus baka.

Te Jesus e pasa na ini Jerikow, dan wan boen bigi ipi sma e kon makandra. Ala sma wani si a sma di meki den breniman kon betre. Foe ala sei den sma e poesoe densrefi kon na Jesus tapoe, so taki sonwan no man si wan pisi foe en srefi. Sakeus, na edeman foe den belastingman na ini Jerikow èn lontoe a foto dati, na wán foe den toe. A sjatoe toemoesi foe si san e pasa.

Foe dati ede Sakeus e lon go na fesi èn e kren go na ini wan moerbei figabon sei a pasi di Jesus e teki. Foe a boen presi disi a kan si ala sani boen. Te den ipi sma e kon krosibei, dan Jesus e loekoe go na ini a bon èn a e taki: „Sakeus, saka kon na gron esi-esi, bika tide mi moesoe tan na joe oso.” Sakeus di breiti, e saka go na gron èn e lon go na oso foe sreka ala sani gi a prenspari fisitiman foe en.

Ma te den sma e si san e pasa, dan den alamala e bigin kroetoekroetoe. Den no e feni en wan joisti sani taki Jesus na a fisitiman foe so wan man. Dati wani taki, leki belastingman, Sakeus kon goedoe, foe di na wan bidrigi fasi a ben poeroe moni na sma skin.

Foeroe sma e waka na Jesus baka, èn te Jesus e go na ini na oso foe Sakeus, dan den e kragi: „A ben tan na a oso foe wan man di de wan sondari.” Ma Jesus e si taki Sakeus na wan sma di kan abi berow. Èn a froewakti foe Jesus e kon troe, bika Sakeus e opo tanapoe èn a e froeklari: „Loekoe, Masra, afoe foe den goedoe foe mi, mi e gi na den pôtisma, èn san mi ben poeroe na sma skin nanga falsi kragi, mi e gi den fo tron baka.”

Sakeus e sori taki a abi opregti berow, foe di a e gi afoe foe den goedoe foe en na den pôtisma èn a tra afoe a e gebroiki foe pai den sma baka di a ben bidrigi. Soleki fa a sori, dan nanga jepi foe en belastingboekoe a kan si omeni a moesoe gi den sma disi. Foe dati ede a e pramisi serjoesoe foe gi fo tron foe dati baka, akroederi a wet foe Gado pe tanapoe: ’Efoe wan man foefoeroe wan skapoe, dan a moesoe gi fo meti na ini a presi foe a skapoe.’

Jesus prisiri nanga a fasi fa Sakeus e pramisi foe prati den goedoe foe en, bika A e taki: „Tide na oso disi kisi froeloesoe, bika so srefi en na wan manpikin foe Abraham. Bika a Manpikin foe libisma ben kon foe soekoe èn foe froeloesoe san ben lasi.”

A no ben de so langa di Jesus ben agersi a situwâsi foe ’den wan di lasi’, nanga a tori di a ben froeteri foe a manpikin di ben lasi. Now wi abi wan troetroe eksempre foe wan sma di ben lasi èn di den ben feni baka. Ala di den relisi fesiman nanga den sma di e waka na den baka, e kroetoekroetoe èn e kragi foe a prakseri di Jesus e poti na tapoe sma leki Sakeus, tokoe Jesus e tan soekoe den lasi manpikin disi foe Abraham èn e meki den kon boen baka. Mateus 20:29-34; Markus 10:46-52; Lukas 18:35–19:10; Exodus 22:1.

▪ Pe Jesus e miti den breni begiman, soleki fa a sori, èn san a e doe gi den?

▪ Soema na Sakeus, èn foe san ede a e kren go na ini wan bon?

▪ Fa Sakeus e sori taki a abi berow?

▪ Sortoe sani wi kan leri foe a fasi fa Jesus e handri nanga Sakeus?