Kapitel 19

Jesus e gi wan Samaria oema leri

TE JESUS nanga den disipel foe en e komoto na Judea foe go na Galilea, dan den e waka pasa na ini a distrikt Samaria. Foe di den weri foe a waka, meki den e teki bro te brekten na wan peti krosibei foe a foto Sikar. Hondrohondro jari na fesi, Jakob ben diki a peti disi, èn te now ete a de, ini a birti foe a disiten foto Nabloes.

Ala di Jesus e teki bro djaso, den disipel foe en e go na foto foe bai njanjan kon. Te wan Samaria oema e kon foe kisi watra, dan Jesus e aksi: „Gi mi pikinso foe dringi.”

A gwenti de, taki djoe nanga Samariasma no abi noti foe doe nanga makandra, foe di den e desko makandra srefisrefi. Dati meki na oema e aksi nanga froewondroe: „Fa joe, ala di joe na wan djoe, kan aksi mi foe gi joe dringi, ala di mi na wan Samaria oema?”

„Efoe joe ben sabi”, Jesus e piki, „soema na a sma di e taigi joe: ’Gi mi pikinso foe dringi’, dan joe ben sa aksi en, èn a ben sa gi joe libi watra.”

„Meneer,” a e piki, „joe no abi wan emre srefi foe kisi watra, èn a peti dipi. Foe dati ede, foe sortoe fonten joe e teki a libi watra disi? Joe no moro bigi leki wi fositen tata Jakob, a no so, di ben gi wi a peti èn di ensrefi makandra nanga den manpikin foe en nanga den meti foe en ben dringi foe a peti?”

„Ala sma di e dringi foe a watra disi, watra sa kiri en baka”, Jesus e piki. „A sma di e dringi foe a watra di mi sa gi en, watra no sa kiri en noiti moro, ma a watra di mi sa gi en sa tron na ini en wan fonten foe watra di o koekoe kon na tapoe foe gi en têgo libi.”

„Meneer, gi mi a watra disi, so taki watra no sa kiri mi èn mi no abi foe kon na a presi disi moro foe kisi watra”, na oema e piki.

Now Jesus e taigi en: „Go, kari joe masra kon èn kon na a presi disi.”

„Mi no abi wan masra”, a e piki.

Jesus e agri nanga en: „Joe ben taki leti: ’Wan masra mi no abi.’ Bika joe ben abi feifi masra, èn a man di joe abi now a no joe masra.”

„Meneer, mi e si taki joe na wan profeiti”, na oema e taki nanga froewondroe. Foe di na oema e sori taki a abi belangstelling gi jeje afersi, meki a e taki dati den Samariasma „ben anbegi Gado na tapoe a bergi disi [a bergi Gerisim di de krosibei]; ma oenoe [den djoe] e taki dati Jerusalem na a presi pe sma moesoe anbegi Gado.”

Tokoe a presi foe anbegi Gado a no a moro prenspari sani, Jesus e sori. „A joeroe e kon”, a e taki, „taki den troe anbegiman sa anbegi a Tata nanga jeje èn nanga waarheid, bika foe troe, a Tata e soekoe den sortoe sma disi foe anbegi en. Gado na wan Jeje, èn den sma di e anbegi en, moesoe anbegi en nanga jeje èn nanga waarheid.”

Disi e naki na ati foe na oema srefisrefi. „Mi sabi taki a Mesias e kon, di den e kari Krestes”, a e taki. „Te a wan dati kon, a sa meki wi ala sani bekènti na poebliki.”

„Dati na mi, di e taki nanga joe”, Jesus e froeklari. Prakseri foe disi! Na oema disi di e kon foe kisi watra na brekten joeroe, kande foe no toeka nanga oema foe a foto di e wisiwasi en foe a fasi fa a e libi, e feni boen na Jesus na wan toemoesi moi fasi. Jesus e froeteri en krin san a no froeteri no wan tra sma na poebliki. San na a bakapisi foe dati?

Foeroe Samariasma e sori bribi

Te den disipel e drai kon baka foe Sikar nanga njanjan, dan den e feni Jesus na Jakob-fonten pe den ben libi en, èn pe a e taki now nanga wan Samaria oema. Te den disipel doro, na oema e gowe. A e libi a watrakan foe en na baka èn e go na foto.

Foe di den sani di Jesus ben froeteri en, ben abi en belangstelling srefisrefi, meki a e froeteri den sma na a foto: „Kon nanga mi, èn loekoe wan sma di ben froeteri mi ala sani di mi ben doe.” Èn foe meki den sma angri foe sabi moro, meki a e aksi: „A sma disi ben sa kan de a Krestes?” Na aksi no e misi en marki — den sma e go loekoe densrefi.

Disiten, den disipel e gi Jesus tranga foe njan a njanjan di den ben tjari kon foe foto. Ma a e piki: „Mi abi njanjan foe njan di oenoe no sabi.”

„No wan sma tjari wan sani gi en foe njan, a no so?”, den disipel e aksi makandra. Jesus e tjari kon na krin: „Mi njanjan de, foe mi doe a wani foe en di ben seni mi kon èn foe klari en wroko. Oenoe no e taki dati fo moen de ete bifo a kotiwroko o bigin?” Ma Jesus, di e sori go na a kotiwroko na jejefasi, e taki: „Opo oen ai èn loekoe den gron, taki den weti foe sma go koti den. Now kaba a sma di e koti a njanjan e kisi pai èn e tjari froktoe kon na makandra gi a têgo libi, so taki a sma di e sai èn a sma di e koti a njanjan, kan abi prisiri makandra.”

Kande Jesus kan si a toemoesi bigi krakti kaba foe a miti di a ben miti nanga a Samaria oema — taki foeroe sma e poti bribi na ini en foe a kotoigi ede di na oema ben gi. Na oema e gi kotoigi na den fotosma èn a e taki: „A ben froeteri mi ala sani di mi ben doe.” Foe dati ede, te den sma foe Sikar e kon na Jesus na a peti, den e aksi en foe tan èn foe froeteri den moro sani. Jesus e teki a kari èn a e tan toe dei.

Foeroe moro Samariasma di e arki Jesus, e poti bribi na ini en. Ne den e taigi na oema: „Wi no e bribi moro soso san joe ben froeteri; bika wisrefi jere èn wi sabi taki a man disi na troetroe a froeloesoeman foe grontapoe.” Foe troe a Samaria oema e gi wi wan boen eksempre fa wi kan gi kotoigi foe Krestes, foe di wi e meki den arkiman angri foe sabi moro, so taki den sa go ondrosoekoe a tori moro fara!

Prakseri taki a de fo moen bifo a kotiwroko o bigin — a de krin taki den sa koti gerst, èn disi e feni presi na Palestina na ini lente. So boen, a de now kande november noso december. Disi wani taki, dati baka a Paska foe 30 G.T., Jesus nanga den disipel foe en, ben gi leri na sma èn dopoe sma na Judea so wan aiti moen langa. Den e go now na Galilea, a presi pe den e tan. San e wakti den drape? Johanes 4:3-43.

▪ Foe san ede a Samaria oema e froewondroe taki Jesus ben taki nanga en?

▪ San Jesus e leri en foe a libi watra èn foe a presi pe sma moesoe anbegi Gado?

▪ Fa Jesus e tjari kon na krin gi na oema soema na en, èn foe san ede a tjari kon na krin disi de so wan froewondroe sani?

▪ Fa a Samaria oema e kotoigi èn nanga sortoe bakapisi?

▪ Fa a njanjan foe Jesus abi foe doe nanga a kotiwroko?

▪ Fa wi kan kon sabi o langa Jesus en diniwroko na Judea ben de, baka a Paska foe 30 G.T.?