Jesus e go ete wan tron na Jerusalem
Kapitel 82
Jesus e go ete wan tron na Jerusalem
HERI ESI Jesus de na pasi baka èn e gi leri na sma, foto foe foto èn dorpoe foe dorpoe. Kande a de na ini a distrikt Perea, abrasei foe Jordan liba, te joe loekoe en foe a sei foe Judea. Ma a presi pe a moesoe go, na Jerusalem.
A djoe filosofia e taki, dati soso wan pikin groepoe sma sa kisi froeloesoe, èn kande na dati meki wan man e aksi en: „Masra, a de so, taki pikinso sma nomo sa kisi froeloesoe?” Nanga en piki Jesus e dwengi den sma foe go denki foe san de fanowdoe foe kisi froeloesoe: „Span joesrefi boen tranga [dati wani taki strei, noso feti] foe pasa a smara doro go na inisei.”
So wan boen tranga moeiti de fanowdoe srefisrefi, „bika foeroe sma”, na so Jesus e taki moro fara, „sa proeberi foe go na inisei, ma den no sa man foe go”. Foe san ede den no sa man? A e tjari kon na krin taki ’te na ososma opo kaba èn sroto a doro, èn sma e tanapoe na dorosei, e naki na tapoe a doro, èn e taki: „Meneer, opo a doro gi wi”, dan a sa taki: „Mi no sabi foe pe oenoe komoto. Oen komoto na mi fesi, ala oen wrokoman foe onregtfardikifasi!”’
Soleki fa a sori, dan den sma di den sroto na dorosei, e kon na wan ten di boen gi den wawan. Ma na a ten dati a doro foe feni okasi, sroto èn a tapoe boen. Efoe den ben wani kon na inisei, dan den ben moesoe kon moro froekoe, awansi a ten dati no ben de so wan boen ten gi den. Ija, wan sari bakapisi e wakti den sma di e draidrai foe meki na anbegi di den moesoe anbegi Jehovah, tron a moro prenspari prakseri na ini den libi!
Jesus ben seni kon foe dini den djoe, ma a moro bigi pisi foe den no meki gebroiki foe a toemoesi moi okasi di den abi, foe teki a seti di Gado poti foe kisi froeloesoe. Foe dati ede Jesus e taki dati den sa krei èn kawtifi, te den sa trowe den go na dorosei. Na a tra sei, den sma foe „den kontren na owstoesei èn na westsei, èn na noordsei èn na zuidsei,” ija, foe ala nâsi, „sa didon na tafra na ini a kownoekondre foe Gado”.
Jesus e taki moro fara: „Joe abi den lastiwan [den sma di no de djoe èn di trawan e wisiwasi, nanga djoe di trawan e hori na ondro nanga tranga] di sa de den fosiwan, èn joe abi den fosiwan [den djoe di ben feni boen na materia sei èn na relisi sei] di sa de den lastiwan.” Taki den de den lastiwan, wani taki dati den sortoe lesi sma disi di no de nanga tangi, kwetikweti no sa kon na ini Gado Kownoekondre.
Now Fariseiman e kon na Jesus èn den e taki: „Gowe foe dja, bika Herodes [Antipas] wani kiri joe.” Kande Herodes srefi ben panja a njoensoe disi foe meki Jesus lowe foe a kontren. Kande Herodes ben frede foe kisi foe doe nanga a dede foe ete wan profeiti foe Gado, neleki di den ben kiri Johanes a Dopoeman. Ma Jesus e taigi den Fariseiman: „Go taigi a kraboedagoe dati: ’Loekoe! Tide nanga tamara mi e trowe ogri jeje go na doro èn mi e dresi sma, èn a di foe dri dei mi sa kaba.’”
Te Jesus kaba wroko drape, dan a e teki waka baka foe go na Jerusalem, bika soleki fa a e tjari kon na krin, „a no fiti taki den e kiri wan profeiti na dorosei foe Jerusalem”. Foe san ede sma kan froewakti taki den ben sa kiri Jesus na Jerusalem? Foe di Jerusalem na a mama-foto, pe a Sanhedrin-heikroetoe de di e teri 71 memre èn pe sma e tjari den meti-ofrandi. Foe dati ede a no ben sa fiti foe kiri „a Pikin Skapoe foe Gado” na wan tra presi leki Jerusalem.
„Jerusalem, Jerusalem, di e kiri den profeiti èn di e ston den wan di ben seni kon na en,” Jesus e sari, „nofo tron mi ben wani tjari joe pikin kon makandra, soleki fa wan oema-fowroe e tjari den pikin foe en kon na ondro en frei, ma oenoe no ben wani dati! Loekoe! Den e libi joe oso leigi na baka.” Foe di a nâsi e weigri foe erken a Manpikin foe Gado, meki a moesoe dede!
Te Jesus de na pasi baka foe go na Jerusalem, dan a e kisi wan kari foe go na a oso foe wan tiriman foe den Fariseiman. Na wan Sabadei, èn den sma e hori en boen na ai, foe di wan man drape di abi a siki di den e kari waterzucht, wan siki pe kande en anoe nanga en foetoe e hori toemoesi foeroe watra. Jesus e taki nanga den Fariseiman èn nanga den man di sabi a Wet heri boen, di drape, èn a e aksi: „A wet e gi pasi foe dresi sma na sabadei efoe no?”
No wan sma e taki wan sani. Dan Jesus e dresi a man èn e seni en gowe. Dan a e aksi: „Soema foe oenoe, te en manpikin noso en kaw fadon go na ini wan peti, no sa hari en poeroe wantewante na sabadei?” Agen no wan sma e taki wan sani baka. Lukas 13:22–14:6; Johanes 1:29.
▪ San de fanowdoe, soleki fa Jesus e sori, foe kisi froeloesoe, èn foe san ede foeroe sma sroto na dorosei?
▪ Soema na den „lastiwan” di e tron den fosiwan èn den „fosiwan” di e tron den lastiwan?
▪ Foe san ede den ben taki kande dati Herodes ben wani kiri Jesus?
▪ Foe san ede a no fiti foe kiri wan profeiti na dorosei foe Jerusalem?