Kapitel 42

Jesus e piri-ai gi den Fariseiman

EFOE Jesus e poeroe den ogri jeje na sma tapoe nanga jepi foe a makti foe Satan, na so Jesus e taki, dan Satan prati teige ensrefi. „Noso oenoe e meki a bon boen, èn e meki den froktoe foe en boen toe,” na so Jesus e go doro, „noso oenoe e meki a bon kon pori, èn e meki den froktoe foe en pori toe; bika na den froktoe sma sa sabi a bon.”

A de wan law sani foe kon nanga a kragi taki so wan boen froktoe leki a trowe di Jesus e trowe ogri jeje go na doro, na a bakapisi foe a dini di Jesus e dini Satan. Efoe a froktoe boen, dan a bon no kan de wan poriwan. Na a tra sei, den pori froktoe di den Fariseiman e meki foe di den e kragi èn e gens Jesus sondro foe abi wan gron gi dati, na a boeweisi taki densrefi pori. „Sneki pikin,” Jesus e taki, „fa oenoe kan taki boen sani te oenoe na ogrisma? Bika san foeroe na ati pasa marki, na dati mofo e taki.”

Foe di den wortoe foe wi, e sori fa na ati foe wi tan, meki san wi e taki, de wan fondamenti foe sma kroetoe wi. „Mi e taigi oenoe”, Jesus e taki, „dati den sma sa moesoe gi frantiwortoe na a Kroetoedei, foe ibri soso wortoe di den e taki; bika foe den wortoe ede di joe e taki, den sa froeklari joe regtfardiki èn akroederi den wortoe di joe e taki, den sa kroetoe joe.”

Ala di Jesus doe ala den krakti wroko foe en, tokoe den leriman foe Wet nanga den Fariseiman e aksi: „Leriman, wi wani si joe e doe wan marki.” Ala di den sma disi di kon foe Jerusalem no si den wondroe foe Jesus nanga den eigi ai kande, tokoe sma di ben si den, ben froeteri disi na wan fasi di sma no kan tweifri na dati. Foe dati ede Jesus e taigi den djoe fesiman: „Wan ogri geslakti di e doe soetadoe e tan soekoe wan marki, ma a no sa kisi no wan marki, boiti a marki foe Jona a profeiti.”

Jesus e tjari kon na krin san a abi na prakseri, èn a e taki moro fara: „Neleki fa Jona ben de dri dei nanga dri neti na ini a bere foe a kefalek bigi fisi, na so a Manpikin foe libisma sa de dri dei nanga dri neti na ini na ati foe grontapoe.” Baka di a fisi swari Jona, a ben kon na doro neleki a ben opo baka na dede, èn foe dati ede Jesus e taki na fesi dati a sa dede èn na a di foe dri dei, a sa opo kon na libi baka. Tokoe den djoe fesiman e weigri foe erken „a marki foe Jona”, srefi di baka ten Jesus opo baka na dede.

Foe dati ede Jesus e taki dati den man foe Ninifei, di ben abi berow di Jona ben preiki drape, sa opo na dede baka ini a kroetoe, foe kroetoe den djoe di e weigri foe erken Jesus. Na a srefi fasi a e agersi a tori nanga a di foe na oema-kownoe foe Scheba, di ben kon te foe den kaba pisi foe grontapoe foe jere foe a koni foe Salomo èn di ben froewondroe foe san a ben si èn ben jere. „Ma, loekoe!”, Jesus e taki, „móro leki Salomo de dja.”

Dan Jesus e gi na agersitori foe wan man di wan jeje di no krin, e komoto na en ini. Ma a man no e foeroe a leigi presi nanga boen sani, dati meki seibi tra jeje di ogri moro a fosiwan, e kon na en tapoe. „Na so a sa waka toe nanga na ogri geslakti disi”, Jesus e taki. A nâsi Israèl ben kon krin èn ben kon kenki — neleki te wan jeje di no krin, gowe foe wan pisi ten. Ma a weigri di a nâsi ben weigri foe erken den profeiti foe Gado, nanga leki heimarki a gens di a nâsi ben gens Krestes srefi, e tjari kon na krin, taki na ogri situwâsi di a nâsi de na ini, moro ogri leki na ini a bigin.

Ala di Jesus e taki, dan en mama nanga den brada foe en e kon drape èn den e go tanapoe pikinso na bakasei foe na ipi sma. So boen, wan sma e taki: „Loekoe! Joe mama nanga den brada foe joe e tanapoe na dorosei èn den e proeberi foe taki nanga joe.”

„Soema na mi mama, èn soema na mi brada?”, Jesus e aksi. A e sori na tapoe den disipel foe en, èn a e taki: „Loekoe! Mi mama èn mi brada! Bika ala sma di e doe a wani foe mi Tata di de na hemel, den dati na mi brada, èn mi sisa, èn mi mama.” Nanga disi Jesus e sori taki, awansi o warti a banti de toe, di e tai en nanga den famiriman foe en, tokoe a matifasi di a abi nanga den disipel foe en warti moro. Mateus 12:33-50; Markus 3:31-35; Lukas 8:19-21.

▪ Fa den Fariseiman no e meki a „bon” nanga a „froktoe”, boen?

▪ San na „a marki foe Jona”, èn fa den e weigri foe erken a marki dati baka ten?

▪ Fa a fosi jarihondro nâsi Israèl ben de leki a man di wan jeje di no krin ben komoto na en ini?

▪ Fa Jesus e poti krakti na tapoe a krosibei matifasi di a abi nanga den disipel foe en?