Kapitel 37

Jesus e poeroe a sari di wan weduwe e sari

SJATOE baka di Jesus dresi a foetoeboi foe a legre-edeman, a e teki pasi go na Na-in, wan foto moro leki 30 kilometer zuid-west foe Kaperna-um. Den disipel foe en nanga wan bigi ipi sma de nanga en. Kande a de latilati bakadina kaba te den doro krosibei foe Na-in. Djaso den e miti wan beri. Den e tjari a dede skin foe wan jonkoeman komoto na ini a foto foe go beri en.

A situwâsi pe a mama de na ini sari srefisrefi, bika a de wan weduwe èn disi na a wan-enkri pikin foe en. Di en masra dede, a ben kan feni trowstoe na a prakseri taki a ben abi en manpikin ete. A ben poti ala en howpoe, en winsi nanga den plan foe en, na tapoe a tamara foe a manpikin. Ma now no wan sma no de, pe a kan feni trowstoe. A e sari foe troe, ala di den sma foe a foto e go nanga en na a beripe.

Te Jesus e si na oema, a e sari, foe di na oema e sari sote. Dati meki a e taki nanga na oema nanga wan safoe sten, èn tokoe na wan krakti fasi di e gi froetrow: „No krei moro.” A fasi fa a e doe, e hari a prakseri foe na ipi sma. Dati meki, te a e waka go fasi a dragi di den e tjari a skin na tapoe, dan den dragiman e tan tanapoe. Ala sma moesoe foe aksi densrefi san a e go doe.

A troe, taki den sma di de nanga Jesus, ben si fa a ben dresi foeroe sma nanga jepi foe wondroe. Ma soleki fa a sori, dan noiti ete den si fa a wiki wan sma na dede. A kan doe so wan sani? Jesus e taki nanga a dede skin, èn a e komanderi: „Jonkoeman, mi e taigi joe: Opo tanapoe!” Èn a man e opo sidon! A e bigin taki èn Jesus e gi en na en mama.

Te den sma e si taki a jonkoeman troetroe de na libi, den e bigin taki: „Wan bigi profeiti opo na wi mindri.” Trawan e taki: „Gado poti en prakseri na tapoe en pipel.” Leki wan faja a njoensoe foe a froewondroe wroko disi, e panja go na ini heri Judea èn na ala kontren ini a birti dati.

Johanes a Dopoeman de na doengroe-oso ete, èn a wani sabi moro foe den wroko di Jesus man doe. Den disipel foe Johanes e froeteri en foe den wondroe disi. San Johanes e doe? Lukas 7:11-18.

▪ San e pasa te Jesus e doro Na-in?

▪ Fa den sani di Jesus e si, e naki en ati, èn san a e doe?

▪ San den sma e doe tapoe a wondroe di Jesus doe?