Jesus e seni den seibitenti disipel go
Kapitel 72
Jesus e seni den seibitenti disipel go
A DE a herfst foe 32 G.T., krinkrin dri jari baka a dopoe foe Jesus. No so langa pasa kaba, en nanga den disipel foe en ben de na a Wiwirikampoe-fesa na Jerusalem, èn soleki fa a sori, dan den de krosibei ete foe a foto. Foe taki en leti, dan a moro bigi pisi foe den lasti siksi moen foe Jesus diniwroko, a de na Judea noso leti na abrasei foe Jordan liba na ini a distrikt Perea. A moesoe wroko ini a kontren disi toe.
A troe, taki baka a Paskafesa foe 30 G.T., Jesus ben preiki so wan aiti moen na Judea. Ma baka di den djoe ben proeberi foe kiri en drape na a ten foe a Paskafesa foe 31 G.T., a ben gebroiki a tra wán nanga afoe jari foe gi leri pikinmoro soso na Galilea. Na ini a ten dati, a ben meki wan bigi organisâsi kon foe preikiman di ben kisi boen leri, wan sani di fosi a no ben abi ete. Foe dati ede a e bigin now nanga wan lasti bigi kotoigiwroko na Judea.
Jesus e bigin a preikiwaka disi foe di a e froekisi 70 disipel èn a e seni den go toe na toe. Na so fasi, ala nanga ala 35 groepoe Kownoekondre-preikiman de foe wroko a kontren. Na den e go fosi na ibri foto èn ibri presi pe Jesus abi na prakseri foe go, soleki fa a sori, makandra nanga den apostel foe en.
Na presi foe Jesus e seni den 70 disipel go na den snoga, a e taigi den foe go na den sma oso, ala di a e tjari kon na krin: „Pe oenoe e go toe na ini wan oso, taki fosi: ’Vrede moesoe de nanga na oso disi.’ Èn efoe wan mati foe vrede de drape, dan a vrede foe oenoe sa rostoe na en tapoe.” San sa de a boskopoe foe den? „Tan taigi den”, Jesus e taki, „a kownoekondre foe Gado kon krosibei foe oenoe kaba.” Matthew Henry’s Commentary e froeteri foe a wroko foe den 70 disipel: „Awansi pe den ben e go, den ben preiki oso foe oso, neleki a Masra foe den.”
A leri di Jesus ben gi na den 70 disipel, gersi a leri di a ben gi na den twarfoe disipel di a ben seni den go foe hori wan preikiwaka na Galilea so wan wán jari pasa kaba. No wawan a e warskow den 70 disipel taki den sa kisi foe doe nanga gens, ala di a e sreka den fa den moesoe tjari a boskopoe go gi ososma, ma a e gi den a krakti toe foe dresi sikiwan. So boen, te Jesus e kon drape sjatoe baka dati, dan foeroe sma sa angri foe miti a Masra di den disipel foe en kan doe den sortoe froewondroe sani disi.
A preikiwroko foe den 70 disipel nanga a wroko di Jesus e doe baka dati, no e teki langa, te joe ben sa teki disi gersi den tra okasi. Heri esi den 35 groepoe Kownoekondre preikiman e bigin drai kon baka na Jesus. „Masra,” den e taki nanga prisiri, „srefi den ogri jeje wi kan saka na wi ondro, foe di wi e gebroiki joe nen.” So wan moi njoensoe foe a diniwroko di doe, e prisiri Jesus troetroe, bika a e piki: „Mi ben si Satan fadon komoto na hemel kaba neleki wan faja di ben koti na hemel. Loekoe! Mi gi oenoe a makti foe masi sneki èn kroektoe-tere nanga foetoe.”
Jesus sabi, taki baka te a Kownoekondre foe Gado opo na ini a ten foe a kaba, dan Satan nanga den ogri jeje foe en, sa trowe poeroe foe hemel. Ma now a trowe di sma di de libisma nomo, e trowe den ogri jeje di wi no man si, go na doro, na ete wan djaranti foe a sani dati di moesoe pasa ete. Foe dati ede, Jesus e taki foe a fadon di Satan sa fadon komoto na hemel na ini a ten di e kon, leki wan sani di wi kan de seiker foe dati krinkrin. Dati meki a de na wan agersi fasi taki den 70 disipel e kisi a makti foe masi sneki èn kroektoe-teri nanga foetoe. Ma tokoe Jesus e taki: „No prisiri foe a sani disi, taki oenoe e saka den jeje na oen ondro, ma prisiri bika oen nen skrifi na hemel.”
Jesus prisiri pasa marki èn a e prèise en Tata na poebliki taki a ben gebroiki den foetoeboi disi foe en di abi sakafasi, na so wan krakti fasi. A e drai loekoe den disipel foe en, èn a e taki: „Kolokoe den ai, di e si den sani di oenoe e si. Bika mi e taigi oenoe: Foeroe profeiti nanga kownoe ben angri foe si den sani di oenoe e si, ma den no ben si den, èn foe jere den sani di oenoe e jere, ma den no ben jere den.” Lukas 10:1-24; Mateus 10:1-42; Openbaring 12:7-12.
▪ Pe Jesus ben preiki na a ten foe den fosi dri jari foe en diniwroko, èn sortoe kontren a e wroko na ini den lasti siksi moen foe en libi?
▪ Pe Jesus e seni den 70 disipel go foe soekoe sma?
▪ Foe san ede Jesus e taki dati a ben si Satan fadon komoto na hemel kaba?
▪ Na sortoe fasi den 70 disipel kan masi sneki èn kroektoe-tere nanga foetoe?