Jesus e sreka den apostel gi a gowe di a o gowe
Kapitel 116
Jesus e sreka den apostel gi a gowe di a o gowe
DEN njan a memrefesa njanjan kaba, ma Jesus nanga den apostel foe en de ete na a kamra na tapoe sodro. Ala di a no de langa moro taki Jesus o gowe, tokoe a abi foeroe sani foe taki ete. „No meki oen ati kon broeja”, na so a e trowstoe den. „Sori bribi na ini Gado.” Ma a e taki moro fara: „Sori bribi toe na ini mi.”
„Na ini na oso foe mi Tata foeroe tanpresi de”, Jesus e go moro fara. „Mi e go drape foe sreka wan presi gi oenoe . . . so taki oenoe kan de toe pe mi de. Èn oenoe sabi a pasi pe mi e go.” Den apostel no e froestan taki Jesus e taki foe a go di a sa go na hemel, èn foe dati ede Tomas e aksi: „Masra, wi no sabi pe joe e go. Fa wi sabi a pasi dan?”
„Mi na a pasi nanga a waarheid nanga a libi”, Jesus e piki. Ija, soso te wan sma e teki en èn e waka na baka en waka nanga libi, dan a kan go na ini a hemel oso foe a Tata, bika, soleki fa Jesus e taki, „no wan sma e kon na a Tata sondro a jepi foe mi”.
„Masra, sori wi a Tata,” Filipus e aksi, „dan a boen kaba gi wi.” Soleki fa a sori, dan Filipus wani foe Jesus doe wan sani, so taki Filipus kan si Gado nanga en ai, neleki fa Moses, Elia nanga Jesaja na ini owroeten ben kisi a grani disi na ini fisjoen. Ma te joe loekoe en boen, dan den apostel abi wan moro betre sani leki den sortoe fisjoen dati, soleki fa Jesus e taki: „So langa kaba mi de nanga oenoe, èn tokoe joe no kon sabi mi ete, Filipus? A sma di si mi, si a Tata toe.”
Na so wan volmaaktifasi Jesus e sori a sma di en Tata de, taki, te joe de nanga en èn e loekoe finifini san a e doe, dan a de leki joe e si a Tata troetroe. Tokoe a Tata bigi moro a Manpikin, soleki fa Jesus e erken: „Den sani di mi e taigi oenoe, a no foe misrefi mi e taki den.” A fiti taki Jesus e gi en hemel Tata ala grani foe den leri foe en.
Disi moesoe de troetroe wan deki-ati gi den apostel foe jere Jesus e taigi den now: „A sma di e sori bribi na ini mi, a sma dati sa doe den wroko toe di mi e doe; èn a sa doe wroko di bigi moro den disi”! Jesus no wani taki, dati den bakaman foe en sa sori foe abi moro bigi krakti foe doe wondroe, leki a krakti di en ben abi. Nôno, ma a wani taki, dati den sa doe a diniwroko na ini wan moro langa pisi ten, na ini wan moro bigi kontren èn na moro foeroe sma.
Jesus no sa drai en baka gi den disipel foe en, baka te a gowe. „Awansi san oenoe e aksi na ini mi nen,” a e pramisi, „mi sa doe dati.” A e taki moro fara: „Mi sa aksi a Tata èn a sa gi oenoe wan tra jepiman, a jeje foe waarheid, foe de nanga oenoe foe têgo.” Baka ten, baka di Jesus opo go na hemel, a e kanti a santa jeje, a tra jepiman disi, kon na tapoe den disipel foe en.
A no sa de langa moro fosi Jesus o gowe, soleki fa a e taki: „Ete wan sjatoe pisi ten, dan grontapoe no sa si mi moro.” Jesus sa de wan jeje mekisani di no wan sma kan si. Ma agen Jesus e pramisi den getrow apostel foe en: „Oenoe sa si mi, bika mi e libi èn oenoe sa libi.” Ija, no wawan Jesus sa sori ensrefi na den na ini libisma skin baka te a opo baka, ma na wan tra ten a sa gi den wan opobaka foe den kisi libi nanga en na hemel leki jeje mekisani.
Now Jesus e taki na eenvoudig lin: „A sma di abi den komando foe mi èn e hori den, a sma dati na a sma di lobi mi. Ma a sma di lobi mi, mi Tata sa lobi en, èn mi sa lobi en èn sa sori misrefi na en krinkrin.”
Now na apostel Judas, a wan di den e kari Tadeus toe, e koti Jesus mofo: „Masra, san pasa taki joe wani sori joesrefi krinkrin na wi èn no na grontapoe?”
„Efoe wan sma lobi mi,”Jesus e piki, „dan a sa doe san mi taki, èn mi Tata sa lobi en . . . A sma di no lobi mi, no e doe san mi taki.” Grontapoe no wani sabi den leri foe Krestes, leki fa den bakaman foe en di e gi jesi na en, e doe dati. Foe dati ede a no e sori ensrefi na den.
Di Jesus ben doe en diniwroko na grontapoe, a ben leri den apostel foe en foeroe sani. Fa den sa memre ala den sani, spesroetoe foe di, te nanga a momenti disi srefi, den no man foe froestan someni? Kolokoe taki Jesus e pramisi: „A jepiman, a santa jeje, di a Tata sa seni kon na ini mi nen, a wan dati sa leri oenoe ala sani èn tjari ala den sani di mi ben froeteri oenoe kon baka na ini oen prakseri.”
Agen Jesus e trowstoe den, te a e taki: „Vrede mi e libi gi oenoe, mi e gi oenoe a vrede foe mi. . . . No meki oen ati kon broeja.” A troe, taki Jesus e gowe, ma a e tjari kon na krin: „Efoe oenoe ben lobi mi, dan oenoe ben sa prisiri taki mi e teki mi pasi go na a Tata, bika a Tata bigi moro mi.”
Jesus no sa de langa moro nanga den. „Mi no sa taki foeroe moro nanga oenoe,” a e taki, „foe di a tiriman foe grontapoe e kon. Èn a no abi makti na mi tapoe.” Satan Didibri, a sma di ben man foe go na ini Judas ati èn abi makti na en tapoe, na a tiriman foe grontapoe. Ma no wan swakifasi foe sondoe ede de na ini Jesus, di Satan kan gebroiki na wan fowtoe fasi foe drai Jesus poeroe foe a dini di a e dini Gado.
Njan boen foe wan krosibei matifasi
Baka di Jesus nanga den apostel foe en njan a memrefesa njanjan, dan a e gi den deki-ati, foe di a taki leki wan krosibei mati nanga den. Kande mindrineti pasa kaba. Foe dati ede Jesus e gi den tranga: „Oen opo, meki wi gowe foe djaso.” Ma bifo den e gowe, dan a lobi di Jesus abi gi den, e meki taki a e go doro foe taki nanga den, èn foe gi den wan agersitori di e gi den deki-ati.
„Mi na a troe droifibon, èn mi Tata na a sma di e kweki den droifi”, na so a e bigin. Jehovah Gado, a Bigi Sma di e kweki droifi, ben prani na agersi droifibon disi di a ben salfoe Jesus nanga santa jeje di Jesus ben teki dopoe na ini a herfst foe 29 G. T. Ma Jesus e go doro foe sori taki a droifibon e agersi moro leki en wawan, foe di a e taki: „Ibri taki na ini mi di no e meki froktoe, a e teki poeroe, èn ibriwan di e meki froktoe, a e krin, so taki a kan meki moro froktoe. . . . Neleki fa a taki no kan meki froktoe foe ensrefi efoe a no e tan na a droifibon, na a srefi fasi oenoe no kan meki froktoe toe, efoe oenoe no e tan na ini wánfasi nanga mi. Mi na a droifibon, oenoe na den taki.”
Feifitenti na wan dei baka dati, na a ten foe a Pinksterfesa, den apostel nanga trawan e tron taki foe a droifibon. Disi e pasa te santa jeje e kanti go na den tapoe. Te foe kaba, dan 144.000 sma e tron taki foe na agersi droifibon. Makandra nanga a bonskin foe a droifibon, Jesus Krestes, den wan disi e tron wan agersi droifibon di e meki den froktoe foe Gado Kownoekondre.
Jesus e tjari kon na krin fa den kan meki froktoe: „A sma di e tan na ini wánfasi nanga mi, èn mi na ini wánfasi nanga en, a sma disi e meki foeroe froktoe; bika sondro mi oenoe no man doe noti kwetikweti.” Ma efoe wan sma no e meki froktoe, na so Jesus e taki, dan „den e iti en go na dorosei leki wan taki èn a e drei gowe; èn den e piki den taki dati kon na wán èn e trowe den go na ini a faja èn den e bron den”. Na a tra sei Jesus e pramisi: „Efoe oenoe e tan na ini wánfasi nanga mi èn den wortoe foe mi e tan na ini oenoe, dan aksi awinsi san oenoe wani toe èn oenoe sa kisi en.”
Jesus e taigi den apostel foe en moro fara: „Mi Tata e kisi glori na ini disi, taki oenoe tan meki foeroe froktoe èn sori taki oenoe na mi disipel.” Den froktoe di Gado wani si foe den, na den kresten eigifasi di den moesoe sori, spesroetoe lobi. Boiti dati, foe di Krestes ben de wan preikiman foe Gado Kownoekondre, meki a froktoe di Gado wani si, abi na ini toe a wroko foe den foe meki disipel neleki fa en ben doe.
„Tan na ini mi lobi”, na so Jesus e gi deki-ati now. Ma fa den apostel foe en kan doe disi? „Efoe oenoe e hori den komando foe mi,” a e taki, „dan oenoe sa tan na ini mi lobi.” Moro fara Jesus e tjari kon na krin: „Disi na mi komando, taki oenoe lobi makandra neleki fa mi ben lobi oenoe. No wan sma abi moro bigi lobi leki disi, taki wan sma e gi en sili abra foe a boen foe den mati foe en.”
Baka wan toe joeroe, Jesus sa sori a lobi disi di e pasa ala tra sani, foe di a o gi en libi foe a boen foe den apostel foe en, èn foe ala trawan toe di sa sori bribi na ini en. Na eksempre foe en moesoe boeweigi den bakaman foe en foe abi a srefi lobi foe òfer densrefi gi makandra. Soleki fa Jesus ben taki na fesi kaba, dan a lobi disi sa meki sma kon sabi den: „Nanga disi ala sma sa sabi taki oenoe na mi disipel, efoe oenoe abi lobi gi makandra.”
Foe meki sma kon sabi den mati foe en, Jesus e taki: „Oenoe na mi mati efoe oenoe e doe san mi e komanderi oenoe. Mi no e kari oenoe srafoe moro, bika wan srafoe no sabi san en masra e doe. Ma mi kari oenoe mati, bika ala den sani di mi jere foe mi Tata, mi meki oenoe kon sabi dati.”
Dati na troetroe wan diri matifasi — foe de krosibei mati foe Jesus! Ma efoe den bakaman foe en wani tan abi a matifasi disi, dan den moesoe „tan meki froktoe”. Efoe den doe dati, na so Jesus e taki, dan „awansi san oenoe e aksi a Tata na ini mi nen, a [sa] gi oenoe dati”. Foe troe, dati na wan bigi pai di den e kisi foe di den meki Kownoekondre froktoe! Baka di Jesus e gi den apostel tranga ete wan tron foe „lobi makandra”, dan a e tjari kon na krin taki grontapoe no sa wani si den na ai. Tokoe a e trowstoe den: „Efoe grontapoe no wani si oenoe na ai, dan oenoe sabi taki a no ben wani si mi na ai, bifo a no ben wani si oenoe na ai.” Dan Jesus e tjari kon na krin foe san ede grontapoe no wani si den bakaman foe en na ai, te a e taki: „Bika oenoe no de wan pisi foe grontapoe, ma mi teki oenoe poeroe foe grontapoe, na foe dati ede meki grontapoe no wani si oenoe na ai.”
Jesus e tjari moro fara kon na krin foe san ede grontapoe no wani si den na ai, foe di a e go doro foe taki: „Ala den sani disi den sa doe na oenoe foe mi nen ede, foe di den no sabi en [Jehovah Gado] di ben seni mi kon.” Te joe loekoe en boen, dan den wondroe wroko foe Jesus, e kroetoe den wan di no wani si en na ai, soleki fa a e taki: „Efoe mi no ben doe den wroko na den mindri di no wan tra sma ben doe, dan den no ben sa abi sondoe; ma now den si mi nanga a Tata èn den no wani si mi nanga En na ai.” Foe dati ede, soleki fa Jesus e taki, den Boekoe kon troe: „Den no ben wani si mi na ai, sondro foe den abi wan reide.”
Neleki fa Jesus ben doe na fesi kaba, na so a e trowstoe den baka, foe di a e pramisi foe seni a jepiman, a santa jeje, di de a tranga wroko krakti foe Gado. „A wan dati sa gi kotoigi foe mi; èn oenoe, foe oen sei, moesoe gi kotoigi.”
Jesus e gi moro froemane bifo a e gowe
Jesus nanga den apostel de so fara foe gowe libi a kamra na a tapoe sodro. „Mi taki den sani disi nanga oenoe, so taki oenoe no sa naki foetoe”, a e go doro. Dan a e gi den a serjoesoe warskow: „Sma sa trowe oenoe komoto na a snoga. Ija, a joeroe e kon taki ibriwan sma di kiri oenoe, sa bribi taki a doe wan santa diniwroko gi Gado.”
A de krin, taki a warskow disi e broeja den apostel srefisrefi. Ala di Jesus ben taki kaba, dati grontapoe no ben sa wani si den na ai, tokoe noiti a no ben taki so krin dati sma ben o kiri den. „Ini a bigin mi no ben taigi oenoe den sani [disi],” Jesus e tjari kon na krin, „bika mi ben de nanga oenoe.” Ija, a de troetroe wan moi sani, taki a e sreka den na fesi nanga den tori disi bifo a e gowe!
„Ma now”, Jesus e go moro fara, „mi e go na en di ben seni mi kon, èn tokoe no wan foe oenoe e aksi mi: ‘Pe joe e go?’” A neti dati den ben aksi wan leisi kaba pe a ben o go, ma now a sani di a froeteri den, seki den so kefalek, taki den no e aksi moro foe a tori disi. Soleki fa Jesus e taki: „Foe di mi froeteri oenoe den sani disi, meki oen ati kon foeroe nanga sari.” Den apostel e sari, no wawan foe di den kon sabi taki den sa kisi hebi froefolgoe èn taki sma sa kiri den, ma foe di a Masra foe den e gowe libi den.
Foe dati ede Jesus e tjari kon na krin: „Na foe a boen foe oenoe meki mi e gowe. Bika efoe mi no e gowe, dan a jepiman no sa kon kwetikweti na oenoe; ma efoe mi go mi pasi, dan mi sa seni en gi oenoe.” Leki wan libisma, Jesus kan de soso na wán presi nomo na a srefi ten, ma te a de na hemel, dan a kan seni a jepiman, Gado santa jeje, kon gi den bakaman foe en, awansi pe foe grontapoe den sa de toe. Foe dati ede a gowe di Jesus o gowe sa tjari wini kon.
A santa jeje, na so Jesus e taki, „sa gi grontapoe na overtoigi boeweisi di abi foe doe nanga sondoe èn di abi foe doe nanga regtfardikifasi èn di abi foe doe nanga kroetoe”. A sondoe foe grontapoe, a sori di a no e sori bribi na ini a Manpikin foe Gado, sa tjari kon na krin. Boiti dati, wan overtoigi boeweisi foe a regtfardikifasi foe Jesus sa gi te a opo go na hemel na en Tata. Èn taki Satan nanga en ogri grontapoe no ben man foe broko a soifri retifasi foe Jesus, na wan overtoigi boeweisi taki a tiriman foe grontapoe kisi wan takroe kroetoe.
„Mi abi foeroe sani ete foe taigi oenoe,” Jesus e go moro fara, „ma oenoe no man tjari den now.” Foe dati ede Jesus e pramisi taki te a e kanti a santa jeje kon, san na a wroko krakti foe Gado, dan a jeje disi sa jepi den foe froestan den sani disi soleki fa den man froestan den.
San den apostel no e froestan na taki Jesus o dede èn taki baka dati a sa sori ensrefi na den, baka te a kisi wan opobaka. So boen, den e aksi makandra: „San a sani disi di a e taigi wi, wani taki: ’Ete wan sjatoe pisi ten, dan oenoe no sa si mi moro, èn agen, ete wan sjatoe pisi ten èn oenoe sa si mi’, èn: ’bika mi e go na a Tata’?”
Jesus e froestan taki den wani poti aksi gi en, foe dati ede a e tjari kon na krin: „Foe troe, foe troe mi e taigi oenoe: Oenoe sa krei èn bari krei, ma grontapoe sa prisiri; oenoe sa sari, ma a sari foe oenoe sa kon tron prisiri.” Moro lati na a dei dati, na bakadina, te den kiri Jesus, dan den grontapoe relisi fesiman e prisiri, ma den disipel e sari. Ma a sari foe den e tron prisiri, te Jesus e kisi wan opobaka! Èn a prisiri foe den e tan te a e gi den krakti na a Pinksterfesa foe de en kotoigi, foe di a e kanti a santa jeje foe Gado go na den tapoe!
Te Jesus e teki a situwâsi foe den apostel gersi di foe wan oema di abi skin-ati foe di a moesoe kisi wan pikin, dan a e taki: „Wan oema e sari, te a de foe meki, foe di a joeroe foe en doro.” Ma Jesus e taki dati na oema no e prakseri a banawtoe foe en moro, te a pikin foe en gebore kaba, èn a e gi den apostel foe en a deki-ati: „Foe dati ede, so srefi oenoe e sari now foe troe; ma mi sa si oenoe baka [te mi kisi wan opobaka na dede] èn oen ati sa prisiri, èn no wan sma sa poeroe a prisiri foe oenoe.”
Te na a momenti disi, den apostel noiti no ben aksi wan sani na ini a nen foe Jesus. Ma now a e taki: „Efoe oenoe aksi a Tata wan sani, dan a sa gi oenoe en na ini mi nen. . . . Foe di a Tata srefi abi safoe firi foe lobi gi oenoe, bika oenoe ben abi safoe firi foe lobi gi mi èn oenoe bribi taki mi komoto kon leki a sma di e teki presi gi a Tata. Mi komoto na a Tata èn kon na grontapoe. Now mi e gowe libi grontapoe èn e go na a Tata.”
Den wortoe foe Jesus de wan bigi deki-ati gi den apostel. „Foe den sani disi ede wi e bribi taki joe komoto na Gado”, den e taki. „Oenoe e bribi na a momenti disi?”, Jesus e aksi. „Loekoe! A joeroe e kon, ija, a doro, taki den sa panja oenoe, ibriwan sma go na en eigi oso èn oenoe sa gowe libi mi.” Ala di a gersi wan sani di no de foe bribi, tokoe disi e pasa bifo neti kaba!
„Mi taigi oenoe den sani disi, so taki oenoe kan abi vrede nanga jepi foe mi.” Jesus e tapoe: „Na ini grontapoe oenoe abi banawtoe, ma abi deki-ati! Mi wini grontapoe.” Jesus ben wini grontapoe, foe di a ben doe a wani foe Gado na wan getrowfasi ala di Satan nanga en grontapoe ben proeberi ala sani foe broko a soifri retifasi foe Jesus.
Wan lasti begi na ini a kamra na a tapoe sodro
Foe di Jesus firi dipi lobi gi den apostel foe en, meki a sreka den gi a gowe di a sa gowe djonsrode. Now, baka di a froemane den èn trowstoe den boen langa, a e opo en ai go na hemel èn a e begi en Tata: „Gi joe manpikin glori, so taki joe manpikin kan gi joe glori, soleki fa joe gi en makti na tapoe ala skin, taki, te joe loekoe a heri nomroe foe den wan di joe ben gi en, dan a kan gi den têgo libi.”
Dja Jesus e taki foe wan troetroe span tori — têgo libi! Foe di Jesus kisi „makti na tapoe ala skin”, meki a kan gebroiki den winimarki foe en loesoe-paiman gi a heri libisma famiri di e dede gowe. Tokoe a e gi „têgo libi” soso na den wan di en Tata feni boen. Te Jesus e taki moro fara foe a tori disi foe têgo libi, a e go doro nanga a begi foe en:
„Disi wani taki têgo libi, foe den teki sabi doronomo na ini den foe joe, a wan-enkri troe Gado, èn foe en di joe ben seni kon, Jesus Krestes.” Ija, efoe wi wani foe kisi froeloesoe, dan dati e anga foe a teki di wi e teki sabi na ini wi foe Gado èn foe en Manpikin. Ma moro de fanowdoe leki soso foe abi sabi na ini joe froestan.
Wan sma moesoe kon sabi den dorodoro, ala di a e meki wan krosibei matifasi gro kon na mindri en nanga den. Wan sma moesoe prakseri foe afersi neleki fa den e prakseri foe dati èn si sani leki fa den e si sani. Boiti dati, wan sma moesoe feti foe waka baka den eigifasi foe den di de sondro speri, te a e handri nanga tra sma.
Baka dati Jesus e begi: „Mi ben gi joe glori na grontapoe, foe di mi kaba a wroko di joe ben gi mi foe doe.” Foe di Jesus doe a wroko di a ben kisi foe doe te so fara èn foe di a de seiker taki sani sa waka boen gi en na ini a ten di e kon, meki a e begi: „Tata, gi mi a glori na joe sei di mi ben abi na joe sei bifo grontapoe ben de.” Ija, now a e aksi efoe nanga jepi foe wan opobaka a kan kisi a hemel glori baka di a ben abi fosi.
Te Jesus e loekoe sjatoe a moro prenspari wroko di a ben doe na grontapoe, dan a e taki: „Mi tjari joe nen kon na krin gi den sma di joe ben gi mi na grontapoe. Den ben de foe joe, èn joe ben gi den na mi, èn den ben doe san joe taki.” Jesus ben gebroiki a nen foe Gado, Jehovah, na ini en diniwroko èn a ben sori wan joisti fasi fa foe taki a nen, ma a ben doe moro leki dati foe tjari Gado nen kon na krin gi den apostel foe en. A ben meki a sabi di den ben abi foe Jehovah, foe a sma di A de, foe den prakseri foe en èn a warderi di den ben abi gi en, gro toe.
Jesus e gi Jehovah a grani leki a Sma di hei moro en, leki a Sma di a e wroko na en ondro, èn foe dati ede a e erken nanga sakafasi: „Den wortoe di joe ben gi mi foe taki, mi ben gi na den, èn den ben teki den èn den ben kon sabi troetroe taki mi ben kon leki a sma di e teki presi gi joe, èn den bribi taki joe ben seni mi kon.”
Foe di Jesus e meki wan difrenti na mindri den bakaman foe en nanga a tra pisi foe a libisma famiri, meki a e begi baka dati: „Mi no e begi gi grontapoe, ma gi den wan di joe gi mi . . . Di mi ben de nanga den, mi ben gwenti foe loekoe den . . . , èn mi kibri den, èn no wan foe den ben kisi pori, boiti a manpikin foe pori”, dati wani taki, Judas Iskariòt. Na a srefi momenti disi, Judas e doe a lagi wroko foe en foe tori Jesus. Na so fasi Judas e meki den Boekoe foe bijbel kon troe sondro foe a sabi.
„Grontapoe no ben wani si den na ai”, na so Jesus e go doro foe begi. „Mi e begi joe, no foe teki den poeroe foe grontapoe, ma foe loekoe den foe na ogriwan ede. Den no de wan pisi foe grontapoe, neleki fa mi no de wan pisi foe grontapoe.” Den bakaman foe Jesus de na ini grontapoe, a libisma libimakandra disi di orga èn di Satan e tiri, ma den de aparti foe a grontapoe disi nanga en ogridoe èn alaten den moesoe tan aparti foe en.
„Meki den kon santa nanga jepi foe a waarheid”, Jesus e go doro, „joe wortoe na waarheid.” Djaso Jesus e kari den Hebrew Boekoe foe bijbel di skrifi nanga jepi foe a santa jeje, „a waarheid”. Doronomo a ben teki wortoe taki foe den Boekoe disi. Ma san a ben leri den disipel foe en èn san den ben skrifi baka ten nanga jepi foe a santa jeje leki den Griki Boekoe foe bijbel, na „a waarheid” toe. A waarheid disi kan meki wan sma kon santa, kenki en libi krinkrin, èn meki en kon tron wan sma di de aparti foe grontapoe.
Now Jesus e begi „no wawan gi den wan disi, ma so srefi gi den wan di e poti bribi na ini [en] nanga a wortoe foe den”. Na so Jesus e begi gi den wan di sa tron den salfoe bakaman foe en èn gi tra disipel di a ben o kisi na ini a ten di ben o kon èn di den sa tjari kon ete na ini „wán ipi”. San a e aksi gi ala den wan disi?
„Taki den alamala kan de wán, neleki fa joe, Tata, de na ini wánfasi nanga mi èn mi de na ini wánfasi nanga joe, . . . taki den kan de wán neleki fa wi de wán.” Jesus nanga en Tata no de troetroe wán sma, ma den e agri nanga makandra na ini ala sani. Jesus e begi efoe den bakaman foe en kan abi a srefi sortoe wánfasi disi, so taki „grontapoe kan kon sabi taki joe ben seni mi kon èn taki joe ben lobi den neleki fa joe ben lobi mi”.
Now Jesus e aksi en hemel Tata wan sani gi a boen foe den wan di ben o tron en salfoe bakaman. San a e aksi? „Taki, pe mi de, den kan de nanga mi toe, so taki den si a glori foe mi di joe gi mi, bika joe ben lobi mi bifo grontapoe seti”, dati wani taki, bifo Adam nanga Eva ben kisi pikin. Langa ten bifo dati, Gado ben lobi en wan-enkri gebore Manpikin, di ben tron Jesus Krestes.
Jesus e tapoe nanga en begi, èn agen a e poti krakti na tapoe disi: „Mi meki joe nen bekènti na den èn mi sa meki en bekènti, so taki a lobi di joe ben lobi mi, kan de na ini den èn mi na ini wánfasi nanga den.” Foe di den apostel kon sabi a nen foe Gado, meki densrefi kon sabi a lobi foe Gado. Johanes 14:1–17:26; 13:27, 35, 36; 10:16; Lukas 22:3, 4; Exodus 24:10; 1 Kownoe 19:9-13; Jesaja 6:1-5; Galasiasma 6:16; Psalm 35:19; 69:4; Odo 8:22, 30.
▪ Pe Jesus e go, èn sortoe piki Tomas e kisi na ini a tori foe a pasi di e go drape?
▪ San Filipus e aksi foe Jesus, soleki fa a sori?
▪ Foe san ede a sma di si Jesus, si a Tata toe?
▪ Fa den bakaman foe Jesus sa doe moro bigi wroko leki san en ben doe?
▪ Na sortoe fasi Satan no abi makti na tapoe Jesus?
▪ O ten Jehovah ben prani na agersi droifibon, èn o ten èn fa trawan e tron wan pisi foe a droifibon?
▪ Omeni taki na agersi droifibon abi te foe kaba?
▪ Sortoe froktoe Gado wani si foe den taki?
▪ Fa wi kan de mati foe Jesus?
▪ Foe san ede grontapoe no wani si den bakaman foe Jesus na ai?
▪ Sortoe warskow foe Jesus e broeja den apostel foe en?
▪ Foe san ede den apostel no e aksi Jesus pe a e go?
▪ Sortoe sani spesroetoe den apostel no man foe froestan?
▪ Sortoe eksempre Jesus e gebroiki foe sori taki a sari di den apostel e sari, sa kenki kon tron prisiri?
▪ San Jesus e taki dati den apostel o doe heri esi?
▪ Fa Jesus e wini grontapoe?
▪ Na sortoe fasi Jesus e kisi „makti na tapoe ala skin”?
▪ San a wani taki dati wan sma e teki sabi na ini en foe Gado èn foe en Manpikin?
▪ Na sortoe fasi Jesus e tjari a nen foe Gado kon na krin?
▪ San na „a waarheid”, èn fa wan kresten e „kon santa” nanga jepi foe dati?
▪ Fa Gado nanga en Manpikin nanga ala troe bakaman de wán?
▪ O ten „grontapoe [ben] seti”?