Kapitel 7

Jesus nanga den astroloog

WAN TOE man e kon foe Owstoesei. Den na astroloog — sma di e taki dati den kan tjari kon na krin san a posisi foe den stari wani taki. Di den ben de na oso na Owstoesei, den ben si wan njoen stari, èn den waka na a stari dati baka hondrohondro kilometer go na Jerusalem.

Te den astroloog doro Jerusalem, den e aksi: „Pe a sma de, di gebore leki kownoe foe den djoe? Bika wi ben si en stari di wi ben de na owstoesei, èn wi kon foe gi en grani.”

Te kownoe Herodes, di e libi na Jerusalem, e jere foe disi, dan a e broeja srefisrefi. Foe dati ede a e kari den granpriester kon èn a e aksi den pe a Krestes moesoe gebore. A piki foe den abi en gron tapoe den Boekoe foe bijbel èn den e taki: „Na Betlehem.” Baka dati, Herodes meki den tjari den astroloog kon na en èn a e taigi den: „Go soekoe finifini pe a jongoe pikin de, èn te oenoe feni en, dan oenoe moesoe kon baka èn froeteri mi, so taki mi toe kan go foe gi a pikin grani.” Ma foe taki en leti, Herodes wani feni a pikin foe kiri en!

Baka te den gowe, dan wan toemoesi froewondroe sani e pasa. A stari di den ben si di den ben de na Owstoesei, e waka na den fesi. A de krin, taki disi a no wan gewoon stari, ma a ben de spesroetoe foe sori den a pasi. Den astroloog e tan waka baka a stari, te leki a e tan tanapoe leti na tapoesei foe na oso pe Josef nanga Maria e tan.

Te den astroloog e go na ini na oso, den e feni Maria nanga en jongoe pikin, Jesus. Ne den alamala e boigi gi en. Èn na ini den tas foe den, den e poeroe kado: gowtoe, wierook nanga mirre. Baka ten, te den de so fara foe drai go baka foe froeteri Herodes pe a pikin de, dan Gado e warskow den na ini wan dren foe den no doe dati. Dati meki den e teki wan tra pasi go na den eigi kondre.

Soema joe denki ben poti a stari, di ben boeweigi ensrefi na hemel foe sori den astroloog a pasi? Prakseri taki, a stari no ben tjari den langalanga go na Jesus na Betlehem. Na presi foe dati, a ben tjari den go na Jerusalem pe den ben miti nanga kownoe Herodes di ben wani kiri Jesus. Èn Herodes ben o doe dati efoe Gado no ben kon na mindri èn ben warskow den astroloog foe no froeteri en pe Jesus ben de. A ben de a feanti foe Gado, Satan Didibri, di ben wani dati den ben moesoe kiri Jesus èn Satan ben gebroiki a stari dati foe proeberi foe doe san a ben abi na prakseri. Mateus 2:1-12; Mika 5:2.

▪ San e sori taki a stari di den astroloog ben si, no ben de wan gewoon stari?

▪ Pe Jesus de te den astroloog e feni en?

▪ Fa wi sabi taki na Satan ben poti a stari foe sori den astroloog a pasi?