Johanes ben mankeri bribi?
Kapitel 38
Johanes ben mankeri bribi?
JOHANES a dopoeman, di de na doengroe-oso wan sani foe wán jari now, e kisi njoensoe foe na opobaka foe a manpikin foe a weduwe na Na-in. Ma Johanes wani jere langalanga foe Jesus mofo srefi san disi wani taki, èn foe dati ede a e seni toe foe en disipel foe go aksi fa a tori sidon: „Joe na a Sma di e kon noso wi moesoe froewakti wan tra sma?”
Dati gersi wan freimde aksi kande, spesroetoe foe di, pikinmoro toe jari pasa kaba, Johanes ben si taki a jeje foe Gado ben saka kon na Jesus tapoe èn di Johanes ben dopoe Jesus, a ben jere a sten foe Gado taki a feni Jesus boen. Kande na aksi foe Johanes e meki son sma taki dati a bribi foe en kon swaki. Ma disi no de so. Jesus no ben sa prèise Johanes so, leki fa a e doe na a okasi disi, efoe Johanes kon degedege ini bribi. Foe san ede Johanes e poti na aksi disi dan?
Kande Johanes wani foe jere nomo foe Jesus mofo srefi taki En na a Mesias. Disi ben sa gi Johanes, di e dede gowe na ini doengroe-oso, foeroe deki-ati. Ma soleki fa a sori, dan moro de na baka na aksi foe Johanes. A de krin, taki a wani sabi efoe wan tra sma e kon ete, wan sma di sa kon baka Jesus, foe taki en so, di sa meki ala sani kon troe krinkrin, di a Mesias ben sa doe soleki fa den ben taki na fesi foe en.
Den bijbel profeititori di Johanes sabi, e taki dati a Salfoewan foe Gado ben sa de wan kownoe, wan froeloesoeman. Tokoe den e hori Johanes ete na ini doengroe-oso, ala di Jesus dopoe foeroe moen pasa kaba. Soleki fa a sori, dan Johanes e aksi Jesus so boen: ’Na joe na troetroe a sma di e opo a Kownoekondre foe Gado leki wan makti di sma kan si, noso wi moesoe froewakti wan tra sma, di e kon na joe baka, di sa meki ala moi profeititori kon troe di abi foe doe nanga a glori foe a Mesias?’
Na presi foe Jesus taigi den disipel foe Johanes: ’A no de foe taki dati mi na a sma di ben sa kon!’, a e sori wan aparti sani ini a srefi joeroe dati, te a e dresi boen foeroe sma foe ala sortoe siki nanga tra sani di e mankeri den. Dan a e taigi den disipel: „Go, taigi Johanes san oenoe ben si èn ben jere: den breniwan e si baka, den malengriwan e waka, den gwasiman e kon krin èn den dofoewan e jere, den dedewan e kisi wan opobaka èn na den pôtisma den e froeteri a boen njoensoe.”
Nanga tra wortoe, na aksi foe Johanes e sori kande taki a e froewakti taki Jesus sa doe moro leki san a e doe now èn kande a sa fri Johanes srefi. Ma Jesus e taigi Johanes, taki a no moesoe froewakti moro leki den wondroe di Jesus e doe.
Te den disipel foe Johanes gowe, dan Jesus e taki nanga den ipi sma èn e froeteri den taki Johanes na a „boskopoeman” foe Jehovah di Maleaki 3:1 ben taki foe en na fesi èn taki en na a profeiti Elia toe, di Maleaki 4:5, 6 ben taki foe en na fesi. Na so fasi Jesus e prèise Johanes te a e taki dati Johanes de a sèm leki ala profeiti di ben libi bifo en, ala di a e tjari kon na krin: „Foe troe, mi e taigi oenoe: Foe den wan di gebore foe oema, no wan ben opo di bigi moro Johanes a Dopoeman; ma wan sma di de wan moro mendriwan ini a kownoekondre foe hemel, de moro bigi leki en. Ma sensi den dei foe Johanes a Dopoeman te leki now, a kownoekondre foe hemel na a marki di sma e doe moeiti foe kisi.”
Djaso Jesus e sori taki Johanes no sa kon na ini a Kownoekondre foe hemel, foe di wan moro mendriwan di de drape, bigi moro Johanes. Johanes ben sreka a pasi gi Jesus, ma a dede fosi Jesus poti wan lakstampoe na tapoe a froebontoe, noso a kroederi di a meki nanga den disipel foe en, so taki den sa de kompe tiriman nanga en na ini a Kownoekondre foe en. Foe dati ede Jesus e taki dati Johanes no sa de na ini a Kownoekondre foe hemel. Na presi foe dati, Johanes sa de wan borgoe foe Gado en Kownoekondre na grontapoe. Lukas 7:18-30; Mateus 11:2-15.
▪ Foe san ede Johanes e aksi efoe Jesus na a Sma di e kon noso efoe den moesoe froewakti wan tra sma efoe no?
▪ Sortoe profeititori Johanes ben meki kon troe, leki fa Jesus e taki?
▪ Foe san ede Johanes a Dopoeman no sa de nanga Jesus na hemel?