Kapitel 40

Leri san na sari-ati

KANDE Jesus de ete na Na-in, pe no so langa pasa, a ben gi a manpikin foe wan weduwe wan opobaka, noso kande a de na wan foto di de krosibei. Wan Fariseiman, di nen Simon, wani foe kon sabi a sma di e doe den sortoe aparti wroko disi, moro boen. Foe dati ede a e gi Jesus wan kari foe kon njan na en oso.

Foe di Jesus e si a kari leki wan okasi foe jepi den sma di drape, meki a e teki a kari, neleki di a teki den kari foe kon njan nanga belastingman nanga sondari. Ma te Jesus e go na ini na oso foe Simon, dan sma no e teki en kon na ini oso na wan switi fasi, soleki fa den abi a gwenti foe doe nanga fisitiman.

Foetoe di weri sandaal, e kon faja èn den e doti, foe di den e waka na tapoe den foegoefoegoe santipasi, èn a de wan gwenti foe wasi den foetoe foe fisitiman nanga kowroe watra, foe sori taki den de klariklari foe teki den na den oso. Ma te Jesus doro, dan den no e wasi den foetoe foe en. Èn den no e gi en wan bosi toe foe gi en wan switi kon na ini, ala di disi na wan aladei gwenti gi den sma. Èn den no e lobi en wiwiri nanga oli, soleki fa sma gwenti foe doe foe sori taki den de klariklari foe teki trawan na den oso.

Te den e njan, ala di den fisitiman e didon na tafra, wan oema di no ben kisi kari, e kon na ini a kamra sondro foe wan sma si en. Na ini a foto sma sabi en leki wan oema di e libi wan jajolibi. Kande a jere foe den leri foe Jesus, so srefi a kari di a ben gi ’alamala di abi hebi lai, foe kon na en foe kisi kowroe-ati’. Èn foe di den sani di a si èn jere, ben boeweigi en srefisrefi, meki a go soekoe Jesus now.

Na oema e waka komoto na baka Jesus, di e didon na a tafra, èn a e saka kindi na Jesus foetoe. Te den watra-ai foe en e fadon na Jesus foetoe, na oema e drei den nanga en wiwiri. Na oema e teki switismeri-oli toe foe a batra di a abi, èn ala di a e bosi Jesus foetoe na wan safoe fasi, a e trowe na oli na tapoe Jesus foetoe. Simon e loekoe a tori, ala di a no e feni en boen. „Efoe a man disi ben de wan profeiti,” na so a e denki na ensrefi, „a ben sa sabi soema na a oema disi èn sortoe sma na en di e fasi en, taki a de wan sondari.”

Jesus, di sabi san a e denki, e taki: „Simon, mi abi wan sani foe taigi joe.”

„Leriman, taki!”, a e piki.

„Toe man ben abi wan paiman na wan seiker man di e leni sma moni”, Jesus e bigin. „Wán ben abi wan paiman foe feifihondro dinari, ma a trawan feifitenti. Di den no ben abi noti nanga san den ben kan pai a paiman foe den baka, a ben taigi den ala toe taki den no ben abi foe pai moro. Foe dati ede, soema foe den sa lobi en moro?”

„Mi denki”, Simon e taki, kande na wan mi-no-ke fasi, foe di a gersi taki na aksi disi no wani taki noti, „a sma di ben abi foe pai en moro.”

„Joe ben kroetoe a tori boen”, Jesus e taki. Èn te a e drai loekoe na oema now, a e taigi Simon: „Joe e si na oema disi? Mi ben kon na ini joe oso; joe no ben gi mi watra gi mi foetoe. Ma na oema disi ben nati mi foetoe nanga en watra-ai èn ben drei den nanga en wiwiri. Joe no ben gi mi wan bosi; ma na oema disi, sensi a joeroe di mi kon na ini, no ben tapoe foe bosi mi foetoe na wan safoe fasi. Joe no ben lobi mi ede nanga oli; ma na oema disi ben lobi mi foetoe nanga switismeri-oli”.

Na a fasi disi na oema sori opregti berow foe a jajolibi di a ben libi fosi. Foe dati ede Jesus e tapoe nanga den wortoe: „Tapoe a gron foe disi, na so mi e taigi joe, a kisi pardon foe den sondoe foe en, ala di den foeroe, bika a ben abi lobi gi foeroe sani; ma a sma di den e gi pardon pikinso, abi lobi gi pikinso sani.”

Na no wan fasi Jesus e feni hoeroedoe wan boen sani. A tori disi e sori moro foeroe, taki na wan sari-ati fasi a e froestan sma di e meki fowtoe ini a libi, ma di baka dati e sori taki den e sari foe disi èn foe dati ede den e kon na Krestes foe kisi froelekti. Jesus e gi na oema disi troetroe kowroe-ati, foe di a e taki: „Joe kisi pardon foe joe sondoe. . . . A bribi foe joe kibri joe; go ini vrede.” Lukas 7:36-50; Mateus 11:28-30.

▪ Fa Simon e teki Jesus na en oso?

▪ Soema e soekoe Jesus, èn foe san ede?

▪ Sortoe agersitori Jesus e gi, èn fa a e gebroiki disi?