Kapitel 8

Lowe gi wan boen ogri tiriman

JOSEF e wiki Maria foe froeteri en toemoesi prenspari njoensoe. Djonsrode na engel foe Jehovah sori ensrefi na en èn a taigi en: „Opo, teki a jongoe pikin nanga en mama, èn lowe go na Egipti, èn tan drape te leki mi sa taigi joe; bika Herodes e kon soekoe a jongoe pikin foe kiri en.”

Esi-esi den dri sma disi e lowe. Èn a de na a joisti ten, bika Herodes kon sabi taki den astroloog kisi en èn den gowe libi a kondre. Prakseri taki den ben moesoe go baka na en foe froeteri en te den ben feni Jesus. Herodes ati e bron foe troe. So boen, foe di a wani proeberi foe kiri Jesus, meki a e gi a komando foe kiri ala boi di de na Betlehem èn di abi toe jari noso di de moro jongoe, so srefi den wan di de na ini a heri kontren lontoe Betlehem. A e teki a libimarki disi tapoe a gron foe den sani di na fesi kaba a ben aksi den astroloog di ben kon foe Owstoesei.

A de wan toemoesi takroe sani foe si fa den e kiri ala den pikin boi! Den sroedati foe Herodes e broko go na ini a wan oso baka a trawan. Èn te den e feni wan pikin boi, den e graboe en poeroe foe en mama anoe. Wi no sabi omeni beibi den e kiri, ma a sarikrei nanga tranga babari foe den mama e meki wan bijbel profeititori kon troe, di Gado en profeiti Jeremia ben taki.

Ma now, Josef nanga en osofamiri doro Egipti sondro foe wan sani pasa nanga den, èn drape den e libi now. Ma wan neti na engel foe Jehovah e sori ensrefi baka na Josef na ini wan dren. „Opo, teki a jongoe pikin nanga en mama”, na engel e taki, „èn go na a kondre Israèl, bika den sma dede di ben soekoe a sili foe a jongoe pikin.” So boen, leki wan kontroe foe wan tra bijbel profeititori di e taki dati den sa kari a Manpikin foe Gado kon foe Egipti, na osofamiri e drai go baka na den eigi kondre.

Soleki fa a sori, dan Josef abi na prakseri foe go libi na Judea pe den ben libi na ini a foto Betlehem, bifo den ben lowe go na Egipti. Ma a e kon sabi taki Archelaus, na ogri manpikin foe Herodes, de kownoe now na Judea, èn ini ete wan dren Jehovah e warskow en gi a kefar. Foe dati ede Josef nanga en osofamiri e teki waka go na noordsei èn den e go libi na a foto Nasaret na Galilea. Djaso na ini a kontren disi, farawe foe a moro prenspari presi pe den djoe e libi akroederi a relisi foe den, Jesus e gro kon bigi. Mateus 2:13-23; Jeremia 31:15; Hosea 11:1.

▪ Sortoe kefalek ogri sani kownoe Herodes e doe, te den astroloog no e drai kon baka, ma fa Jesus e kisi kibri?

▪ Foe san ede Josef no e go libi baka na Betlehem, te a e drai kon baka foe Egipti?

▪ Sortoe bijbel profeititori e kon troe na ini a pisi ten dati?