Na a Wiwirikampoe-fesa
Kapitel 66
Na a Wiwirikampoe-fesa
NA INI den pikinmoro dri jari sensi Jesus dopoe, a kon de bekènti na alape. Foeroe doesoendoesoen sma si den wondroe foe en, èn den tori foe san a e doe, panja go na ini a heri kondre. Ala di den sma e kon makandra na Jerusalem gi a Wiwirikampoe-fesa, den e soekoe en. „Pe a man dati de?”, den wani sabi.
Jesus kon tron wan sma di foe en ede trobi doe kon. „Na wan boen sma”, son sma e taki. „A no troe, ma a e kori na ipi sma”, trawan e taki. Ini den fosi dei foe a fesa den e taki wan lo sani na a fasi disi. Tokoe no wan sma abi a deki-ati foe taki na poebliki foe a boen foe Jesus ede. Disi de so, foe di den sma frede taki den djoe fesiman sa strafoe den.
Jesus e doro te a fesa de afoe-pasi kaba. A e go na a tempel, pe den sma e froewondroe foe a bigi koni di a abi foe gi leri. Foe di Jesus noiti ben go na a skoro foe den rabi, meki den djoe e aksi densrefi: „Fa a man disi sabi someni, ala di a no studeri na skoro?”
„San mi e leri, a no foe mi,” Jesus e tjari kon na krin, „ma na foe en di ben seni mi kon. Efoe wan sma wani doe En wani, dan a sa sabi foe a leri disi efoe a kon foe Gado, noso efoe mi e taki foe misrefi.” A leri foe Jesus de soifri akroederi a wet foe Gado. Foe dati ede a moesoe de krin, taki a e soekoe a glori foe Gado èn no en eigi glori. „Moses ben gi oenoe a Wet, a no so?”, Jesus e aksi. Leki wan fasi foe piri-ai gi den, a e taki: „No wan foe oenoe e gi jesi na a Wet.”
„Foe san ede oenoe e soekoe foe kiri mi?”, Jesus e aksi dan.
Na ipi sma, di kande kon na a fesa, no sabi taki sma ben proeberi foe doe disi. Den no man bribi taki wan sma ben sa wani kiri so wan kefalek boen leriman. Foe dati ede den e bribi taki wan sani no boen nanga Jesus, taki a e bribi so wan sani. „Joe abi wan ogri jeje na joe tapoe”, den e taki. „Soema e soekoe foe kiri joe?”
Den djoe fesiman wani foe kiri Jesus, ala di na ipi sma no e froestan disi kande. Wán nanga afoe jari pasa kaba, di Jesus ben dresi wan man na Sabadei, den fesiman ben proeberi foe kiri en. Foe dati ede Jesus e meki sma si na onreidelekfasi foe den, foe di a e aksi den: „Efoe den e besnij wan man na wan sabadei, so taki a sma no e pasa a wet foe Moses, dan oen ati e bron srefisrefi nanga mi, foe di mi ben meki wan sma kon de gosontoe krinkrin na wan sabadei? Tapoe foe kroetoe san na ai e si, ma kroetoe sani na wan regtfardiki fasi.”
Sma di e libi na Jerusalem, di e froestan a situwâsi boen, e taki now: „A no disi na a man di den e soekoe foe kiri? Èn loekoe! a e tanapoe na poebliki e taki, èn den no e taigi en noti. Den tiriman sa kon sabi kaba nanga seikerfasi, taki disi na a Krestes?” Den sma disi di e libi na Jerusalem e tjari kon na krin foe san ede den no e bribi taki Jesus na a Krestes: „Wi sabi foe pe a man disi komoto; ma te a Krestes e kon, no wan sma sa sabi foe pe a komoto.”
Jesus e piki: „Oenoe sabi mi èn oenoe sabi foe pe mi komoto. Boiti dati, mi no kon foe misrefi, ma en di ben seni mi kon, de troetroe, èn oenoe no sabi en. Mi sabi en, foe di mi na wan sma di e teki presi gi en, èn a Sma dati ben seni mi kon.” Baka di Jesus taki disi, den e proeberi foe graboe en, kande foe trowe en go na ini doengroe-oso noso foe meki den kiri en. Tokoe den no man doe disi, foe di Jesus ten foe dede no doro ete.
Tokoe foeroe sma e poti bribi na ini Jesus, èn den abi leti. Ija, a waka na tapoe watra, a bedari bigi winti, a meki krasi se kon saka, na wan wondroe fasi a gi doesoendoesoen sma njanjan nanga wan toe brede nanga fisi, a ben dresi den sikiwan, a ben meki malengriwan e waka, a ben opo den ai foe breniwan, a ben dresi gwasiman, èn a ben opo dedewan srefi. Foe dati ede den e aksi: „Te a Krestes doro, a sa doe moro marki leki a man disi doe, a no so?”
Te den Fariseiman e jere na ipi sma e sjoesjoe foe den sani disi, dan den nanga den heipriester e seni skowtoe go foe kisi Jesus foe go sroto en. Johanes 7:11-32.
▪ O ten Jesus e doro na a fesa, èn san sma e taki foe en?
▪ Foe san ede son sma e taki kande, dati Jesus abi wan ogri jeje na en tapoe?
▪ San den sma foe Jerusalem e denki foe Jesus?
▪ Foe san ede foeroe sma e poti bribi na ini Jesus?