Kapitel 71

Na foe espresi den Fariseiman no wani bribi

A PAPA nanga mama foe a begiman di fosi ben breni, frede te den moesoe kon na fesi foe den Fariseiman. Den sabi taki a bosroiti ben teki, taki ibriwan sma di e sori bribi na ini Jesus, den sa jagi poeroe foe a snoga. Efoe den koti wan sma poeroe na so wan fasi, so taki a no abi demakandra nanga tra sma foe a libisma libimakandra, dan dati kan tjari boen foeroe problema kon gi a sma dati, èn spesroetoe te a de wan pôti osofamiri. Foe dati ede a papa nanga mama de na ai.

„Disi na oen manpikin di, soleki fa oenoe e taki, ben gebore breni?”, den Fariseiman e aksi. „Fa a doe kon dan, taki a e si na a momenti disi?”

„Wi sabi taki disi na wi manpikin èn taki a ben gebore breni”, a papa nanga mama e taki. „Ma fa a doe kon taki a e si now, wi no sabi, noso soema ben opo en ai, wi no sabi.” A no de foe taki, dati a manpikin foe den moesoe froeteri den ala sani di pasa, ma a papa nanga mama e taki nanga koni: „Aksi en. A bigi kaba. A moesoe taki gi ensrefi.”

Foe dati ede den Fariseiman e kari a man agen kon na den. A leisi disi den e proeberi foe tapoe skreki gi en, foe di den e froeteri taki den abi boeweisi teige Jesus èn den boeweisi disi di no e taki boen foe en. „Gi glori na Gado”, den e taigi en nanga tranga. „Wi sabi taki a sma disi na wan sondari.”

A man di fosi ben breni, no e taki dati a kragi foe den no troe, ma a e taki: „Efoe en na wan sondari, mi no sabi.” Ma a e taki moro fara: „Wán sani mi sabi, taki, ala di mi ben breni, mi e si na a momenti disi.”

Foe di den Fariseiman e proeberi foe feni wan fowtoe na ini a kotoigi di a man e gi, meki den e aksi baka: „San a ben doe nanga joe? Fa a ben opo joe ai?”

„Mi taigi oenoe kaba,” a man e kragi, „èn ete oenoe no ben arki. Foe san ede oenoe wani jere en baka?” Na wan spotoe fasi a e aksi: „Oenoe wani tron disipel foe en toe?”

A piki disi e meki den Fariseiman ati e bron srefisrefi. „Joe na wan disipel foe a man dati,” den e kragi en, „ma wi na disipel foe Moses. Wi sabi taki Gado taki nanga Moses; ma foe a man disi, wi no sabi pe a komoto.”

Nanga froewondroe, a begiman di abi sakafasi, e piki: „Disi na troetroe wan sani foe froewondroe, taki oenoe no sabi foe pe a komoto èn tokoe a ben opo mi ai.” Na sortoe bosroiti wi kan kon ini a tori disi? A begiman e sori go na a srefi sani di ala sma ben teki leki gwenti foe hori densrefi na dati: „Wi sabi taki Gado no e arki sondari, ma efoe wan sma abi frede gi Gado èn e doe a wani foe en, dan a e arki so wan sma. Foe granwe kaba sma noiti no jere taki wan sma ben opo na ai foe wan sma di ben gebore breni.” Foe dati ede a bosroiti moesoe de krin: „Efoe a man disi no ben de foe Gado, dan a no ben kan doe noti kwetikweti.”

Den Fariseiman no abi wan piki na tapoe a krin fasi fa a tori poti sondro foe drai a tori. Den no man si a waarheid, èn foe dati ede den e bari a man: „Joe ben gebore krinkrin na ini sondoe, èn tokoe joe e gi wi leri?” Te den taki disi, den e trowe a man go na doro, èn soleki fa a sori, den e jagi en poeroe foe a snoga.

Te Jesus kon sabi san den doe, a e miti a man èn a e taki: „Joe e poti bribi na ini a Manpikin foe libisma?”

Leki piki, a begiman di fosi ben breni, e aksi: „Meneer, soema na en, so taki mi kan poti bribi na ini en?”

„ A sma di e taki nanga joe, dati na en”, Jesus e piki.

Wantewante a man e boigi na Jesus fesi èn a e taki: „Mi e poti bribi na ini en, Masra.”

Dan Jesus e tjari kon na krin: „Na foe a kroetoe disi mi ben kon na a grontapoe disi: taki den sma di no e si, ben sa si èn den sma di e si, ben sa kon breni.”

Te den Fariseiman di e arki, e jere disi, den e aksi: „Joe wani taigi wi, taki wi breni toe?” Efoe den ben sa erken taki den breni na jejefasi, dan den ben sa abi wan reide foe gens Jesus. A de soleki fa Jesus e taigi den: „Efoe oenoe ben breni, dan oenoe no ben sa abi sondoe.” Tokoe, foe di den tranga-ede, den e horidoro taki den no breni èn taki a no de fanowdoe taki den e kisi leri na jejefasi. Foe dati ede Jesus e taki: „Now oenoe e taki: ’Wi e si’. Oenoe sondoe e tan.” Johanes 9:19-41.

▪ Foe san ede a papa nanga mama foe a begiman di fosi ben breni, frede te den moesoe kon na fesi foe den Fariseiman, èn fa den de na ai te den e piki?

▪ Fa den Fariseiman e proeberi foe tapoe skreki gi a man di fosi ben breni?

▪ Sortoe krin fasi foe denki di a man ben abi, e meki na ati foe den Fariseiman e bron srefisrefi?

▪ Foe san ede den Fariseiman no abi no wan reide foe gens Jesus?