Na ini a snoga foe a presi pe Jesus e libi
Kapitel 21
Na ini a snoga foe a presi pe Jesus e libi
A NO abi misi taki sekiseki de na Nasaret te Jesus e drai kon baka na oso. Bifo Jesus ben gowe foe meki Johanes dopoe en, pikinso moro leki wán jari pasa kaba, sma ben sabi en leki wan temreman. Ma now, alape sma sabi en leki wan sma di e doe wondroe. Den sma foe Nasaret angri foe si fa a doe wan toe foe den wondroe wroko disi na den mindri.
A froewakti foe den e kon moro bigi te Jesus, soleki fa a gwenti foe en de, e go na a snoga drape. Na a konmakandra a e opo tanapoe foe leisi, èn den e gi en a lolo foe a profeiti Jesaja. A e feni a presi pe e taki foe a Sma di salfoe nanga a jeje foe Jehovah. Na ini a ten disi, a de kapitel 61 na ini wi bijbel.
Baka di Jesus leisi fa a Sma disi ben sa preiki gi den sma di de na ini katibo, taki den ben sa kon fri, taki den breniwan ben sa si baka èn foe a jari foe Jehovah pe a e teki sma, dan a e gi a lolo baka na a dinari èn a e go sidon. Ala sma e loekoe soso en. Dan a e taki, kande finifini foe sani, ala di a e tjari kon na krin: „Tide a tekst disi di oenoe ben jere djonsrode, kon troe.”
Den sma e froewondroe foe den „switi wortoe” foe en, èn den e taigi makandra: „Disi na wan manpikin foe Josef, a no so?” Ma foe di Jesus sabi taki den wani si fa a e doe wondroe, meki a e taki moro fara: „A no abi misi taki oenoe sa fiti na agersitori disi na mi: ’Datra, dresi joesrefi; ala sani di ben pasa na Kaperna-um soleki fa wi ben jere, doe den so srefi dja na ini a kontren pe joe e libi.’” A de krin, taki den sma di fosi ben de birtisma foe Jesus, e feni taki a wroko foe dresi sma moesoe bigin na oso, so taki en eigi pipel fosi kan abi wini foe dati. Dati meki den e feni taki Jesus ben handri nanga den leki den no ben teri.
Foe di Jesus e froestan san den e denki, meki a e froeteri den wan toe historia tori di fiti. Na ini den dei foe Elia foeroe weduwe ben de na Israèl, a e taki, ma na no wan foe den, den ben seni Elia go. Na presi foe dati, a ben go na wan weduwe na Sidon di no ben de wan Israèlsma èn drape a ben doe wan wondroe di ben kibri wan sma libi. Èn na ini den dei foe Elisa, foeroe gwasiman ben de, ma Elisa ben meki soso Na-aman foe Siria kon krin.
Den sma di de na ini a snoga e opo tanapoe èn den e jagi Jesus komoto na ini a foto, foe di den ati e bron foe den historia agersitori disi di no ben e sori na wan boen fasi fa den ben prakseri densrefi nomo èn a mankeri di den ben mankeri bribi. Drape, na tapoe wan hei pisi foe a bergi pe Nasaret bow na tapoe, den e proeberi foe poesoe en foe a lanki. Ma Jesus e hari ensrefi poeroe na den anoe èn a man lowe sondro foe den doe en wan sani. Lukas 4:16-30; 1 Kownoe 17:8-16; 2 Kownoe 5:8-14.
▪ Foe san ede sekiseki de na Nasaret?
▪ Fa den sma e feni den sani di Jesus e taki, ma san e meki den ati e bron?
▪ San den sma e proeberi foe doe nanga Jesus?